काठमाडौँ — २४ घण्टामा देशभर १ हजार ५२७ जनामा कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयका अनुसार शनिबार विभिन्न जिल्लामा गरिएको ५ हजार ८३७ पीसीआर परीक्षणमा १ हजार ५२७ जनामा कोरोना पुष्टि भएको हो।
यसैगरी, ४ हजार २९६ एन्टिजेन परीक्षणमा ८०१ जनामा कोरोना संक्रमण देखिएको छ । पीसीआर र एन्टिजेन परीक्षणबाट कुल २ हजार ३२८ जनामा संक्रमण पुष्टि भएको मन्त्रालयले जनाएको छ । योसँगै नेपालमा पीसीआर परीक्षणमा कोरोना देखिनेको संख्या ६ लाख ४३ हजार ५८० पुगेको छ ।
यस्तै, २४ घण्टामा ३ हजार ६६ जना कोरोना संक्रमणमुक्त भएका छन् । योसँगै कोरोना संक्रमण भइ निको हुनेको संख्या ६ लाख ६ हजार ६६६ पुगेको छ ।
मन्त्रालयले दिएको जानकारी अनुसार देशभर गरी थप १९ जनाको मृत्यु भएको छ । योसँगै नेपालमा कोरोनाबाट मृत्यु हुनेको संख्या ९ हजार १९८ पुगेको छ ।
