मेलम्चीको विपत्ति : ‘दुईतले घर पूरै डुबे, बजार तहसनहस भइरहेछ’- समाचार - कान्तिपुर समाचार
कान्तिपुर वेबसाईट
AdvertisementAdvertisement

मेलम्चीको विपत्ति : ‘दुईतले घर पूरै डुबे, बजार तहसनहस भइरहेछ’

कान्तिपुर संवाददाता

काठमाडौँ — अविरल वर्षासँगै आएको बाढीले मेलम्ची बजारमा क्षति पुर्‍याएको छ । मेलम्ची खोला उर्लिंदा बस्ती डुबानमा पर्नुका साथै घर र पुलहरू बगाएको छ । बाढीमा स्थानीयहरूसमेत बगेको आशंका गरिए पनि कति बेपत्ता भए भन्ने यकिन भइनसकेको प्रहरीले जनाएको छ ।

तस्बिर सौजन्य : टंक खड्का

जिल्ला प्रहरीका अनुसार अहिलेसम्म दुई पक्की मोटरबेलसहित आधा दर्जन झोलुंगे पुल र घर बगेको विवरण छ । इन्द्रावती र मेलम्ची जोड्ने मोटरेबल पुल बगेको प्रहरी नायब उपरीक्षक प्रकाश सापकोटाले बताए ।

मेलम्चीको पछिल्लो अवस्थाबारे मेलम्ची नगरपालिका–११ का सचिव मधुविलास देवकोटाको भनाइ

हिजो बेलुका ५ बजेतिरबाटै मेलम्चीमा अब के हुने हो भन्ने छटपटी सुरु भइसकेको थियो । लार्केबाट मेलम्चीमा पानी ल्याउने भनिएको मुहानमा पहिरो गएर खोला थुनिएको खबर सुनेको केही घन्टापछि नै थुनिएको भाग फुटेर मेलम्ची बजारमा पानी पस्न थालिसकेको थियो ।

पहिलो बाढी आएको केही बेरमा हेलम्बुबाट पनि उस्तै खालको बाढी आयो । पानी मात्रै नभएर पहिरोको लेदोसहितको पानी बगिरहेको छ । एकैछिनमा खोला शान्त भएजस्तो हुन्छ अनि एकैछिन खोला उर्लेर आउँछ । सायद ठाउँठाउँमा पहिरो जाने, खोला थुनिने, थुनिएको भाग फुटने र फेरि बाढी आउने भएजस्तो देखिन्छ ।

हामी मेलम्ची बजार छेउको इन्द्रावती क्याम्पस छेउमा बसेर बजार पूरै तहसनहस भएको हेरिरहेका छौं । बजारका मानिसहरु हिजो रातिदेखि सुतेका छैनन् । सबैजना छटपटीमा यता र उता कुदिरहेका छन् । कोही भने बग्न लागेको घरभित्रबाट केही सामान निकाल्न सकिन्छ कि भन्ने प्रयासमा छन् । कोही भने बगेका सामान समात्न सकिन्छ कि भन्ने आशमा छन् । कोही भने आफ्नो ज्यान जोगाउन भागदौड गरिरहेका छन् ।

अहिले पनि खोलामा पानीको सतह घटेको छैन । मेलम्ची बजारको सडकको खोला छेउका घरहरु अधिकांश पानीभित्र छोपिएका छन् । दुई तलाका घरसम्म पानीले छोपिएका छन् । प्रदेश सरकारको पहलका करिब ८ करोडको लागतमा बनेर अन्तिम चरणमा पुगेको कर्भड हल पानीले पूरै छोपिएको छ । रेडियो मेलम्चीको तीन तलाको भवनमध्ये दुई तला पूरै पानीमा परेको छ ।

२ वटा पक्की पुल र ३ वटा कच्ची पुल बगिसकेको छ । बगेको पुल अलिक अगाडि पुगेर छडके परेर बसेको देख्न सकिन्छ । बगेको पुलले पानीको बहाव रोकेको र खोला बस्तीतिर पसेको देखिन्छ । केही बेरअघि मात्रै नेपाली सेनाको हेलिकप्टरले घरको छतमा फसेका दुईजनाको उद्धार गरेको छ ।

हिजो बेलुकादेखि नै मेलम्चीमा बिजुली गएको छ । बिजुलीका पोलहरु पनि कतिपय ठाउँमा बगाएको छ । बिजुली नभएका कारण मोबाइल पनि धेरैको बन्द हुने देखिन्छ । सञ्चार सम्पर्क विच्छेद भयो भने मेलम्ची कटेर जाने गाउँको कुनै खबर नआउने अवस्था हुनसक्छ । अहिले मेलम्ची बजार कटेर अगाडि बढन सकिने अवस्था छैन् । स्थिति भयावह छ ।

–जनकराज सापकोटाले गरेको कुराकानीमा आधारित

प्रकाशित : असार २, २०७८ १०:०३
प्रतिक्रिया
पठाउनुहोस्

३ वर्षदेखि विद्युत् उत्पादन ठप्प

कान्तिपुर संवाददाता

हेटौंडा — मकवानपुरको दुर्गम गाउँमा ८ वर्षअघि सञ्चालनमा ल्याइएको वायु–सौर्य ऊर्जा परियोजना अलपत्र अवस्थामा छ ।

फाइल तस्बिर

हावा र घामवाट विद्युत् उत्पादन गर्ने उक्त परियोजनाका ब्याट्री बिग्रेकाले विगत तीन वर्षदेखि विद्युत् उत्पादन बन्द छ । हावाबाट १० किलोवाट र सोलारबाट १५ किलोवाट गरी २५ किलोवाट विद्युत् उत्पादन हुँदै आएको थियो । उक्त विद्युत् १ सय १० घरले प्रयोग गर्दै आएका थिए ।

वाग्मती गाउँपालिका–५ भोर्लेनीमा रहेको परियोजनाका सोलार, पंखा र ब्याट्रीको संरक्षण गर्न हम्मे परेको स्थानीय बताउँछन् । ‘ब्याट्री एक्कासि पड्किएपछि बन्द भएको विद्युत् उत्पादन अहिलेसम्म पनि सुरु भएको छैन,’ परियोजना उपभोक्ता समिति अध्यक्ष पदम घलानले भने, ‘यसबारे वैकल्पिक ऊर्जा प्रवर्द्धन केन्द्र काठमाडौंका सरहरूलाई जानकारी दियौं । तर अहिलेसम्म उहाँहरू आउनुभएको छैन । मैले बेलाबेला फोन गरिरहन्छु, आउँछौं भन्नुहुन्छ, खै आउनुभएको छैन ।’

भोर्लेनीमा १ सय २६ वटा सोलार प्लानल छन् भने हावावाट विद्युत् उत्पादन गर्ने २ वटा पंखा ठडिएका छन् । केन्द्रबाट प्राविधिक आएर मर्मत नगरिदिएकाले टुकी बालेरै बस्नुपरेको स्थानीयले दुःखेसो पोखे । यहाँ राष्ट्रिय प्रसारण लाइन भर्खर पुगे पनि पहिलाको जस्तो क्षमता र सेवा नपुगेको उनीहरूको भनाइ छ ।

प्रकाशित : असार २, २०७८ ०९:५०
पूरा पढ्नुहोस्
प्रतिक्रिया
पठाउनुहोस्
×