हामी विरुद्ध फेरि अनर्गल प्रचार सुरु भयो : भुसाल- समाचार - कान्तिपुर समाचार

हामी विरुद्ध फेरि अनर्गल प्रचार सुरु भयो : भुसाल

कान्तिपुर संवाददाता

काठमाडौँ — एमाले नेता घनश्याम भुसालले आफूहरुका विरुद्ध अनर्गल प्रचार सुरु भएको बताएका छन् ।

सोमबार सामाजिक सञ्जालमा आफ्ना धारणा सार्वजनिक गर्दै भुसालले समूह नै तयार गरेर आफूहरुका विरुद्ध अनर्गल प्रचार गरिएको बताएका हुन् । ‘फेरि हाम्रा विरुद्ध अनर्गल प्रचार सुरु भएको छ । हामीले एकताको कुरा गर्दा त्यसलाई आत्मसमर्पणको रुपमा व्याख्या गर्ने र विवादको कुरा गर्दा विभाजनको रुपमा व्याख्या गर्ने एउटा समूह नै तयार भएको छ,’ भुसालले लेखेका छन् ।

एमालेको राजनीतिलाई विकृत बनाउन पञ्चायतकालका सुकुलगुण्डा जस्तै समूह खडा भएको त होइन भन्ने प्रश्न पनि भुसालले गरेका छन् ।

‘पञ्चायतकालमा राजनीतिलाई विकृत बनाउने सत्ता संरक्षित समूह मण्डलेका रुपमा स्थापित भयो । पञ्चायत धराशायी हुनुमा त्यस समूहको कम्ति योगदान थिएन । त्यसबेलाका कतिपय पञ्चहरु नै त्यस समूहसँग आजित भएर संसदमै ‘सुकुलगुण्डा’ भनेर विरोध गरेको सम्झिन्छु,’ उनले लेखेका छन्, ‘आज नेकपा एमालेको राजनीतिलाई विकृत बनाउन त्यस्तै समूह त खडा भएको छैन ? अनि परिणाम पनि त्यस्तै हुने त होइन ? धेरैजसो सपेराहरु सर्पबाटै टोकिएका छन् ।’

पार्टी एकताका नाममा ओलीपक्षका नेताहरुसँग भएका संवादलाई लिएर आफ्नो समूह र सामाजिक सञ्जालमा उनको आलोचना भएपछि भुसालले प्रष्टिकरण दिएका हुन् ।

भुसालसहित गोकर्ण विष्ट, योगेश भट्टराई र सुरेन्द्र पाण्डे पछिल्लो समय ओलीपक्षका नेताहरुसँग अनौपचारिक संवादमा थिए ।

प्रकाशित : जेष्ठ २४, २०७८ १६:२९
प्रतिक्रिया
पठाउनुहोस्

सिन्धुलीमा ओली र महतोको पुत्ला दहन

राजकुमार कार्की

सिन्धुली — सिन्धुलीमा प्रधानमन्त्री केपी शर्मा ओली र उपप्रधान तथा शहरी विकास मन्त्री राजेन्द्र महतोको पुत्ला दहन गरिएको छ । 

बहुराष्ट्र र बहुराज्य बनाउन मुक्ति आन्दोलन गर्नुपर्ने महतोले दिएको अभिव्यक्ति र कोरोना महामारीको समयमा बढेको महँगी फिर्ता माग गर्दै प्रधानमन्त्री ओलीको कांग्रेसले सुनकोसी गाउँपालिका झाँगाझोली रातमाटामा पुत्ला दहन गरेको हो । उनीहरुले केही बेर बीपी राजमार्गमा चक्का जाम गरेका थिए ।

कोरोना संकटका बेला महँगी बढेको, चुरे उत्खनन् गरी ढुंगा, गिट्टी र बालुवा निकासी गर्न दिने सरकारी निर्णयको विरोध र महतोले मन्त्री भएलगत्तै बहुराष्ट्र र बहुराज्य बनाउने भनी दिएको अभिव्यक्ति प्रति कांग्रेसले आपत्ति जनाएको हो ।

पुत्ला दहन र सडक अवरुद्ध गरेपछि प्रहरीले हस्तक्षेप गरेको थियो । केहीबेर आन्दोलनकारी र प्रहरीबीच धकेलाधकेल भएपनि कुनै अप्रिय घटना नभएको कांग्रेस नेता बोधविक्रम थापाले जानकारी दिए । बीपी राजमार्ग यातायात सुचारु भएको प्रहरीले जनाएको छ ।

प्रकाशित : जेष्ठ २४, २०७८ १६:२६
पूरा पढ्नुहोस्
प्रतिक्रिया
पठाउनुहोस्
×