कोरोनाविरुद्ध भर्चुअल बैठकमा जुटे चिनियाँ कम्युनिस्ट पार्टी र नेपालका दल- समाचार - कान्तिपुर समाचार
कान्तिपुर वेबसाईट
AdvertisementAdvertisement

कोरोनाविरुद्ध भर्चुअल बैठकमा जुटे चिनियाँ कम्युनिस्ट पार्टी र नेपालका दल

जगदीश्वर पाण्डे

काठमाडौँ — कोरोना महामारीविरुद्ध दुवै मुलुकका राजनीतिक दलले संयुक्त लडाइँ थाल्नुपर्ने जनाउँदै चिनियाँ कम्युनिस्ट पार्टी (सीसीपी) र नेपालका राजनीतिक दलहरू भर्चुअल बैठकमा जुटेका छन् । 

बेइजिङबाट प्राप्त सूचना र नेपाली नेताहरूका अनुसार ‘महामारीविरुद्ध लड्न र जनताको जीवन रक्षा गर्न सँगै काम गर्ने तथा चीन र नेपालका राजनीतिक दलहरूको महामारीविरुद्ध संयुक्त लडाइँ’ शीर्षकमा बैठक भइरहेको छ ।

सीसीपीको अन्तर्राष्ट्रिय सम्बन्ध विभागले आयोजना गरेको बैठकको नेतृत्व विभागका प्रमुख सोङ ताओले गरिरहेका छन् ।

बैठकमा नेकपा एमाले, नेपाली कांग्रेस, नेकपा माओवादी केन्द्र, जसपा, नेपाल मजदुर किसान पार्टीलगायतका नेताहरू सहभागी छन् । नेकपा एमालेबाट महासचिव तथा उपप्रधानमन्त्री ईश्वर पोखरेल, कांग्रेसबाट नेता नारायण खड्का, नेकपा माओवादी केन्द्रबाट अध्यक्ष पुष्पकमल दाहाल र कृष्णबहादुर महराले सहभागिता जनाएका छन् । जसपाबाट अध्यक्ष उपेन्द्र यादवले सहभागिता जनाएका छन् ।

सीसीपीले नेपालका राजनीतिक दलहरूसँग यसरी बैठक गर्न लागेको यो पहिलोपटक हो । यसअघि पनि विदेश विभागले भर्चुअल र नेपालमै आएर कार्यक्रम गर्दा एमाले र माओवादी केन्द्र मिलेर बनेको नेकपा पार्टीसँग मात्र गर्दै आएको थियो ।

नेकपा फुटेपछि सीसीपीले यसपटक एमाले र माओवादी केन्द्रसहित अन्य राजनीतिक दललाई पनि छलफलमा सहभागी गराएको हो ।

सीसीपीको विदेश विभागले यसअघि काठमाडौंमै आएर चिनियाँ राष्ट्रपति सी चिनफिङको ‘सी विचारधारा’ बारेमा समेत नेकपाका नेताहरूलाई कक्षा दिएको थियो ।

प्रकाशित : जेष्ठ १२, २०७८ १३:१८
प्रतिक्रिया
पठाउनुहोस्

निकुञ्‍जमा सैनिकको शव फेला, घटना रहस्यमय भएको परिवारको आरोप

रमेशकुमार पौडेल

चितवन — चितवन राष्ट्रिय निकुञ्जको सुरक्षाका लागि खटिएका एक जना सैनिक मृत भेटिएका छन् । निकुञ्जमा विशेष गस्तीका लागि आएको रेञ्जर बटालियनका हवल्दार गगनबहादुर शाही निकुञ्जको सिमाना भएर बग्ने राप्ती किनारमा मंगलबार बिहान मृत फेला परेको चितवन प्रहरीले जनाएको छ ।

मृत भेटिएका सैनिक गगनबहादुर शाहीका आफन्त

शाहीका परिवारले भने घटना रहस्यमय देखिएको हुँदा निष्पक्ष छानबिन गर्नुपर्ने माग गरेका छन् ।

निकुञ्ज सुरक्षाका लागि तैनाथ खड्गदल गणका प्रमुख कर्णेल सुधीर केसीले घटनाका बारेमा अनुसन्धान भइरहेको बताए । निकुञ्ज क्षेत्रमा नियमित तैनाथ रहने सेनाको गणका साथै बेलाबेलामा अन्य विशेष टोलीहरु पनि आउने गर्दछन् । त्यस्ता टोलीहरु निश्चित सयम निकुञ्जमा बसेर फिर्ता हुन्छन् । शाही त्यस्तै विशेष टोलीको सदस्य भएको कर्णेल केसीले बताए ।

चितवन जिल्ला प्रहरी कार्यालयका प्रवक्ता प्रहरी नायब उपरीक्षक (डीएसपी) सूर्य थापाले सोमबार साँझ निकुञ्जबाट शाहीसहित तीनजना सैनिक गाउँ आएर दुईजना पोस्टमै फर्केको तर शाही मंगलबार बिहान मृत फेला परेको बताए । ‘उनीहरु बस्ने गरेको पोस्टबाट तीनजना बाहिर आएका रहेछन् । मेघौलीको गोलाघाट आएर साँझ फर्कंदा दुई जना डुंगा चढेर गएछन् । शाहीले म डुंगा तर्दिनँ भनेको रहेछन्,’ डीएसपी थापाले भने ।

निकुञ्जको पश्चिम क्षेत्र लामितालनजिक बाघमारामा उनीहरु पोस्ट खडा गरेर बसेका थिए । ‘डुंगा तरेर आएकाहरु आफ्नो पोस्टमा आएछन् तर शाही आएनन् । बीचमा अर्को पोस्ट पनि रहेछ । उनीहरुले शाही सायद त्यतै बस्यो होला भन्ने ठानेछन् र सुतेछन् । हिजो बिहान अरु पोस्टमा पनि नगएको पत्ता लागेपछि खोजी भएछ । हामीलाई भने बिहान पौने १० बजेतिर शव भेटिएको जानकारी आएको थियो,’ डीएसपी थापाले भने ।

कर्णेल केसीले ढुंगा तर्ने ठाउँभन्दा झन्डै पाँच ६ सय मिटर तल शाहीको शव भेटिएको बताए । शाही दैलेख नौमुले गाउँपालिका–१ राइली गाउँका हुन् । परिवारले उनको निधन भएको खबर मंगलबार दिउँसो पायो । ‘त्यसपछि रातारात गाडी चढेर हामी आज (बुधबार) बिहान भरतपुर आयौं । त्यो शव त चिन्है गाह्रो छ । हामीलाई गगनको शव हो भन्ने नै विश्वास लागेन,’ मृतकका जेठान लालबहादुर चन्दले भने ।

राप्ती खोलाले यो बेला मान्छे बगाउन सक्ने अवस्था नरहेको र आफ्नो ज्वाइँ शाही पौडन पनि जानेका कारण खोलाले बगाएर मृत्यु भएको कुरा आफूहरुलाई विश्वास नलागेको चन्दले बताए । ‘शव चिन्न पर्‍यो भनेर लगे तर चिन्ह नै सकिएन । अनुहार पूरै फुलेको छ । चोट पनि देखिन्छ । यो गगनकै शव हो भन्ने यकिन गर्न पहिला डीएनए परीक्षण गर्नु पर्‍यो । अनि बल्ल अरु प्रक्रिया अगाडि बढोस्,’ चन्दले भने ।

डीएसपी सूर्य थापा भने मृतकको निधारको माथि खस्रेको जस्तो दाग देखिए पनि पहिचान गर्न नै नमिल्ने गरेर शव नबिग्रेको बताउँछन् । शाहीसँग त्यो साँझ साथमा रहेका दुई जनासँग प्रहरीले सोधपुछ सुरु गरेको उनले बताए । मृतकका जेठान लालबहादुर चन्दले डीएनए परीक्षण भएपछि मात्रै पोस्टमार्टम हुनु पर्ने र दोषी पत्ता लगाएर कारबाही गर्ने पक्का नहुँदासम्म शव नबुझ्ने बताएका छन् ।



प्रकाशित : जेष्ठ १२, २०७८ १२:३५
पूरा पढ्नुहोस्
प्रतिक्रिया
पठाउनुहोस्
x
×