मैले आफ्नै खुसीले माओवादी रोजेकी हुँ : वली- समाचार - कान्तिपुर समाचार
कान्तिपुर वेबसाईट
AdvertisementAdvertisement

मैले आफ्नै खुसीले माओवादी रोजेकी हुँ : वली

कान्तिपुर संवाददाता

काठमाडौँ — लुम्बिनी प्रदेश सभा सदस्य विमला वलीले कसैको दबाबमा नभई आफ्नै खुसीले माओवादी केन्द्रलाई रोजेको बताएकी छन् । 

विमला वली । फाइल तस्बिर ।

आइतबार लुम्बिनीमा पत्रकार सम्मेलन गर्दै वलीले आफूलाई कसैले माओवादीमा लाग्न दबाब नदिएको र आफूले राजीखुसी पार्टी छानेको बताएकी छन् । 'निर्वाचनका बेला मैले माओवादीबाट सपोर्ट पाएको थिएँ । कसैले मलाई आउनुपर्छ भनेकाले होइन, मैले आफ्नै खुसीले यो दल रोजेकी हुँ,' उनले भनिन् ।

आफू निर्वाचित भएर आउँदा एमाले र माओवादी एकजुट रहेको, त्यतिबेला को माओवादी र को एमाले भन्ने आफूलाई थाहा नभएको उनको भनाइ थियो । 'म आउँदै गर्दा पार्टी एकजुट थियो । मैले नेकपाबाट निर्वाचन जितेँ,' पत्रकार सम्मेलनमा उनले भनिन् ।

विमलाका श्रीमान् उत्तरकुमार वली भने २०७४ सालमा एमालेबाट निर्वाचित भएका थिए । उनको सवारी दुर्घटनामा मृत्यु भएपछि विमला प्रदेश सभा सदस्यमा निर्वाचित भएकी थिइन् ।

उपनिर्वाचनमा आफूले माओवादी नेताहरूबाट नै बढी समर्थन र सहयोग पाएकाले सोही पार्टीमा लाग्ने निर्णय आफूले गरेको विमलाको भनाइ थियो ।

वली दाङ प्रतिनिधिसभा निर्वाचन क्षेत्र ३ को प्रदेश सभा निर्वाचन क्षेत्र (ख) मा भएको उपचुनावमा नेकपाबाट निर्वाचित भएकी थिइन् ।

लुम्बिनी प्रदेशमा एमालेले एकल बहुमतको सरकार गठन गर्ने निर्णय गरेलगत्तै वलीले आफू माओवादी केन्द्रमा प्रवेश गर्ने बताएकी थिइन् ।

प्रकाशित : वैशाख १९, २०७८ १५:५७
प्रतिक्रिया
पठाउनुहोस्

पोखरामा थप ८ जना कोरोना संक्रमितको मृत्यु

दीपक परियार

पोखरा — पोखरामा थप ८ जना कोरोना संक्रमितको मृत्यु भएको छ । गण्डकी प्रदेश स्वास्थ्य निर्देशनालयका अनुसार कास्कीका ५, पर्वत, दाङ र रुपन्देहीका १–१ जनाको पोखरामा उपचारका क्रममा मृत्यु भएको हो ।

दाङको राप्ती गाउँपालिका–५ का ४३ वर्षीय कोरोना संक्रमित पुरुषको शनिबार बिहान १:२२ मा गण्डकी मेडिकल कलेजमा मृत्यु भएको हो । उनलाई वैशाख १५ मा कोरोना पुष्टि भएको थियो । पोखरा–२६ की ५८ वर्षीया कोरोना संक्रमित महिलाको शनिबार बिहान मणिपाल शिक्षण अस्पतालमा उपचारका क्रममा मृत्यु भएको छ ।

पर्वतको कुश्मा नगरपालिका–५ की ७६ वर्षीया कोरोना संक्रमित महिलाले शनिबार बिहान गण्डकी मेडिकल कलेजमा उपचारका क्रममा ज्यान गुमाइन् । उनलाई शुक्रबार मात्रै कोरोना पुष्टि भएको थियो । पोखरा–१६ कै ७३ वर्षीया कोरोना संक्रमित महिलाको शनिबार दिउँसो मृत्यु भयो । वैशाख १२ मा कोरोना पुष्टि भएकोमा मेडिप्लस अस्पतालमा उपचारका क्रममा निधन भएको हो ।

पोखरा–१० कि कोरोना संक्रमित महिलाको शनिबार बेलुका मणिपाल शिक्षण अस्पतालमा मृत्यु भयो । पोखरा–१९ का ५४ वर्षीय संक्रमित पुरुषले शनिबार बेलुका गण्डकी मेडिकल कलेजमा उपचारका क्रममा मृत्यु भयो । रुपन्देहीको बुटवल नगरपालिका–३ का ७५ वर्षीय कोरोना संक्रमित पुरुषले आइतबार बिहान मेडिप्लस अस्पतालमा उपचारका क्रममा ज्यान गुमाए । उनलाई वैशाख ९ मा कोरोना संक्रमण पुष्टि भएको थियो । यस्तै, होम आइसोलेसनमा रहेका पोखरा–१६ का ७७ वर्षीय वृद्धको शनिबार दिउँसो मृत्यु भएको हो ।

आइतबार मात्रै पोखरामा १ सय ९१ कोराना संक्रमित थपिएका छन् । कास्कीमा १ हजार २ सय २ सक्रिय संक्रमित छन् । कास्कीमा मात्रै १ सय ३१ ले कोरोना संक्रमणबाट ज्यान गुमाएका छन् । गण्डकी प्रदेशमा यो संख्या २ सय ३१ पुगेको छ ।

प्रकाशित : वैशाख १९, २०७८ १५:४५
पूरा पढ्नुहोस्
प्रतिक्रिया
पठाउनुहोस्
थप केही समाचारबाट
×