ट्रकले उकालो पार गर्न नसक्दा...- समाचार - कान्तिपुर समाचार
कान्तिपुर वेबसाईट
AdvertisementAdvertisement

ट्रकले उकालो पार गर्न नसक्दा...

आश गुरुङ

लमजुङ — साइँलीआमाको अर्घुं (मृत्यु संस्कार) मा आउन नपाएपछि गुरुङ संस्कारअनुसार माइतीलाई पा ठोंब (रक्सी तीन सर्को खुवाउने) का लागि मनीषा गुरुङ र उनकी बहिनी जलकाशी छोराहरूलाई लिएर मनाङबाट लमजुङको जगत आएका थिए ।

लमजुङको बेंसीसहरबाट मनाङको चामे जाँदै गर्दा मनाङको नासो गाउँपालिका-३ स्थित मर्स्याङ्दी नदीमा खसेको ध१ख ५९२ नं. को ट्रक

मनाङको नासों गाउँपालिका–४ की नियोल र धारापानीस्थित होटल थ्री सिस्टरकी मनीषा छोराहरू लियोन र थियोनका साथ शनिबार बिहान जगत झरेका थिए । माइतीपक्ष (साइँलीआमाका श्रीमान् र छोरा) लाई पा ठोंब गरी उनीहरू फर्किन खोज्दा गाडी पाएनन् । बेंसीसहरबाट आएका जिप सबै भरिएका थिए ।

मनीषाकी साइँलीआमाकी छोरी (दिदी) श्रीकुमारी गुरुङका अनुसार मनाङ जाने कुनै पनि जिप खाली थिएनन् । मनीषा फर्किन जिद्दी गरिरहेकी थिइन् । ‘बहिनीहरू खाना खाएदेखि बाहिर गाडी कुर्दै थिए । म भित्र पसेकी मात्रै के थिएँ, ट्रक आइपुगेछ । नजाऊ भन्दाभन्दै जिद्दी गरेर ट्रक चढे । होटलमा पाहुना छ भन्दै हिँडेहाले । त्यस्तै २ जति बजेको थियो,’ उनले भनिन्, ‘डेढ घण्टापछि त गाडी पल्टियो भन्ने खबर आयो । परिवार नै परेछ ।’

मनीषाकी भाउजू नाता पर्ने सुमी गुरुङका अनुसार जताततै गाडीलाई फोन गर्दा नपाएपछि आउँदै गरेको एउटा गाडीमा बच्चालाई लगिदिन आग्रह गरेछन् । ‘मनाङीले रिजर्भ गरेको भन्दै पन्छिए पनि सँगै रहेका अनिशा गुरुङलाई चढाएछन् । बाँकी ५ जनाले गाडी कुर्दाकुर्दै ट्रक आएछ । चिनेजानेकाले भनेपछि चढाएछन्,’ उनले भनिन् ।

नासों गाउँपालिका–३ खोत्रोमा शनिबार दिउँसो ट्रक दुर्घटना हुँदा एकै परिवारका ४ जनासहित ६ जनाको मृत्यु भयो । नासों–४ ओडार माइती, वडा नम्बर १ तालगाउँ घर भई हाल वडा ३ को धारापानीमा होटल व्यवसाय गर्दै आएकी ३४ वर्षीया मनीषा गुरुङ, उनको डेढ वर्षका छोरा लियोन र बहिनी ३१ वर्षीया जलकाशीको घटनास्थलमै मृत्यु भयो । मनीषाका अर्का छोरा ४ वर्षीय थियोनको उपचार क्रममा शनिबार राति १२ बजेतिर चितवनको पुरानो मेडिकल कलेजमा निधन भयो ।

जलकाशीका छोरा ६ वर्षीय नियोल र ट्रकधनी तथा चालक तनहुँको भानु नगरपालिका–३ का २४ वर्षीय सुमन तामाङको चितवनमा उपचार भइरहेको छ । उद्धार गरेर बेंसीसहर ल्याउँदै गर्दा ट्रकका सहचालक मर्स्याङ्दी गाउँपालिका–५ घेर्मु खोरियाखेतका २१ वर्षीय लक्ष्मण नेपाली र चामे गाउँपालिका–४ का २८ वर्षीय राजु विकको बाटामै मृत्यु भयो ।

मनाङका डीएसपी सुवास ढकालका अनुसार बेंसीसहरबाट मनाङको चामेतर्फ आउँदै गरेको ध१ख ५९२ नम्बरको ट्रक नासों–३ खोत्रोमा सडकबाट करिब ४५ मिटर तल मर्स्याङ्दी नदीमा खसेर दुर्घटना भएको हो ।

‘घटनाको प्रकृति हेर्दा ट्रक बढी लोडमा थियो । उकालोमा सापट भाँच्चियो । गाडी ब्याक भयो । केही तल गएर मर्स्याङ्दीमा झर्‍यो,’ उनले भने, ‘चालकले जोगाउन खोजेजस्तो छ । कुनातिर ल्याउन खोज्दा नसकेको जस्तो देखिन्छ ।’ उनका अनुसार केही उकालो सडकमा ढलान गरिएको छ । ढलानको उकालोमा घुम्ती छ । त्यही घुम्तीमा पुग्न नपाउँदै सापट भाँचेर ब्रेक फेल भएको हुन सक्ने उनले बताए ।

प्रत्यक्षदर्शी स्थानीय चोकबहादुर गुरुङका अनुसार ठूलो आवाजमा उकालोमा गइरहेको ट्रक ‘ब्याक’ भएको थियो । ‘ए ए भन्दाभन्दै १० मिटरजति ब्याक भएर ट्रक भीरबाट खोलातर्फ खस्यो,’ उनले भने । उनले यसअघि पनि ३/४ वटा गाडी ‘ब्याक’ भएर दुर्घटना भएको तर खोलातिर खस्नबाट जोगिएको सुनाए ।

प्रकाशित : चैत्र १०, २०७७ १२:२१
प्रतिक्रिया
पठाउनुहोस्

अस्ट्रेलियाको बाढी दुई दशकयताकै भयानक

एजेन्सी

सिड्नी — अस्ट्रेलियाको दक्षिण–पूर्वी राज्य न्यु साउथ वेल्समा लगातार वर्षापछिको बाढीका कारण जनजीवन निकै प्रभावित भएको छ । अधिकारीहरूले दुई दशकपछिको भीषण बाढीका कारण सडक तथा पुलहरू भत्केका, सयौं गाडी तथा चौपायाहरू बगेका जनाएका छन् । बाढीका कारण विद्यालयहरू बन्द गरिएका छन् । 

तस्बिर : रोयटर्स

सरकारले बाढी प्रभावितको उद्धारका लागि सयौं सुरक्षाकर्मी परिचालन गरेको जनाएको छ । अधिकारीहरूका अनुसार सोमबार साँझसम्म कम्तीमा १८ हजार बाढी प्रभावितलाई सुरक्षित स्थानमा सारिएको छ । जलवायु विभागका अनुसार मंगलबारसम्म भीषण वर्षा कायमै रहने भएकाले बाढीले थप क्षति पुर्‍याउन सक्ने चेतावनी दिएका छन् ।

प्रधानमन्त्री स्कट मरिसनले ‘गम्भीर जोखिम आउनै बाँकी रहेको’ बताएका बीबीसीले उल्लेख गरेको छ । सरकारले पश्चिमी अस्ट्रेलियाबाहेकका क्षेत्रका करिब १ करोड मानिसलाई बाढीको जोखिम रहेको भन्दै चेतावनी जारी गरेको छ । विभागले मंगलबार भारी वर्षा हुने, भीषण हावाहुरी आउने तथा समुद्रमा उछाल आउने पूर्वानुमान गरेको छ । विभागका बाढी व्यवस्थापक जस्टिन फिल्डले भने, ‘मैले विभागमा करिब दुई दशकदेखि बाढीको पूर्वानुमान गर्दै आएको छु । यसपटकको बाढी सबैभन्दा भयानक देखिएको छ ।’

यसअघि प्रधानमन्त्री मरिसनले बाढी प्रभावित क्षेत्रका वयस्क नागरिकलाई १ हजार डलर र बालबालिकालाई ४ सय डलर नगद दिने घोषणा गरेका थिए । यसैगरी, बाढीका कारण ज्यान गुमाएकालाई १३ सातासम्मका लागि आर्थिक सहयोग दिइने घोषणा गरिएको छ । हालसम्म बाढीका कारण मृत्यु भएकाको संख्याबारे उल्लेख गरिएको छैन ।

त्यसैगरी, न्यु साउथ वेल्स राज्यकी प्रिमियर ग्लाडिस बेरिजिक्लियनले बाढी प्रभावित क्षेत्रका बासिन्दालाई घरबाहिर ननिस्कन र सरकारको भनाइलाई गम्भीर रूपमा लिन सुझाव दिएकी छन् । न्यु साउथ वेल्स प्रहरीले बाढीका कारण समस्यामा परेको खण्डमा सूचना दिन आग्रह गरेको छ । बाढीका कारण न्यु साउथ वेल्स राज्यका कतिपय क्षेत्रमा कोरोना भाइरसविरुद्धको खोप ढुवानीसमेत प्रभावित भएको जनाइएको छ ।

प्रकाशित : चैत्र १०, २०७७ १२:०४
पूरा पढ्नुहोस्
प्रतिक्रिया
पठाउनुहोस्
×