नेकपा दाहाल-नेपाल केन्द्रीय कमिटीको निर्णय : नेम्बाङलाई स्थायी कमिटीबाट निलम्बन - समाचार - कान्तिपुर समाचार
कान्तिपुर वेबसाईट
AdvertisementAdvertisement

नेकपा दाहाल-नेपाल केन्द्रीय कमिटीको निर्णय : नेम्बाङलाई स्थायी कमिटीबाट निलम्बन 

नेम्बाङलाई ३ दिनभित्र उपनेताबाट समेत राजीनामा दिन निर्देशन
प्रभु साह, सूर्य थापा, कर्ण थापा, शान्ता चौधरीलाई केन्द्रीय सदस्यबाट निष्कासन 
कान्तिपुर संवाददाता

काठमाडौँ — पुष्पकमल दाहाल–माधवकुमार नेपाल नेतृत्वको नेकपाले सुवास नेम्बाङलाई स्थायी कमिटीबाट निलम्बन गर्ने भएको छ ।

बुधबार पार्टी कार्यालय पेरिसडाँडामा बसेको केन्द्रीय कमिटी बैठकले नेकपा संसदीय दलका उपनेतासमेत रहेका नेम्बाङलाई तीन दिनभित्र उपनेताबाट समेत राजीनामा गर्न निर्देशन दिएको केन्द्रीय सदस्य युवराज चौलागाईंले जानकारी दिए ।

बैठकले प्रधानमन्त्री केपी शर्मा ओलीको कदमलाई असंवैधानिक र अलोकतान्त्रिक भन्ने सबै दलहरुलाई संयुक्त सरकारका लागि अपिल गर्ने पनि निर्णय गरेको छ । आन्दोलनका क्रममा देश भर भएका दमनको भर्त्सना गर्ने र विशेष गरी जनकपुरमा भएको निश्रंस दमनको निन्दा गर्ने निर्णय पनि बैठकले गरेको छ ।

त्यस्तै केही दिनअघि नेकपा संसदीय दलका नेतासमेत रहेका प्रधानमन्त्री केपी शर्मा ओलीबाट मुख्य सचेतकको जिम्मेवारी पाएका विशाल भट्टराईले केन्द्रीय सदस्यबाट निलम्बन गर्ने निर्णय बैठकले गरेको छ । त्यस्तै सहरी विकासमन्त्री प्रभु साह, प्रधानमन्त्रीका प्रेस सल्लाहकार सूर्य थापा, कर्ण थापा, शान्ता चौधरीलाई केन्द्रीय सदस्यबाट निष्कासन गर्ने निर्णय गरिएको छ । पितृशोकमा रहेका कारण गोकुल बाँस्कोटालाई केन्द्रीय सदस्यबाट हटाउने निर्णयबाट दाहाल-नेपाल समूह पछि हटेको छ ।

त्यस्तै बैठकले सबै नेताहरुलाई पार्टीको पक्षमा फर्कन आग्रह गर्दै बिनापूर्वाग्रह जिम्मेवारी दिइने पनि निर्णय गरेको छ । पार्टीको आधिकारिकताबारे निर्वाचन आयोगले हालसम्म केही निर्णय नगरेकोमा पनि बैठकले दु:ख व्यक्त गरेको छ ।

प्रकाशित : फाल्गुन १९, २०७७ १४:१५
प्रतिक्रिया
पठाउनुहोस्

दाहाल-नेपाल समूहको केन्द्रीय कमिटी बैठक पेरिसडाँडामा सुरु

कान्तिपुर संवाददाता

काठमाडौँ — नेकपा दाहाल–नेपाल समूहको केन्द्रीय कमिटीको बैठक सुरु भएको छ । केही बेरअघि पेरिसडाँडास्थित पार्टी कार्यालयमा केन्द्रीय कमिटीको बैठक सुरु भएको हो । स्थायी कमिटीको बैठकपछि केन्द्रीय कमिटीको बैठक सुरु भएको हो । 

केन्द्रीय कमिटी बैठकमा सर्वोच्च अदालतको फैसलापछिको राजनैतिक स्थितिबारे, प्रधानमन्त्रीसमेत रहेका पार्टी अध्यक्ष केपी शर्मा ओलीलाई अनुशासनको कारबाही र पार्टीको आधिकारिकता दाबीबारे छलफल हुने बताइएको छ ।

पार्टीको आधिकारिकता विवादका विषयमा निर्वाचन आयोगले गरेको ढिलासुस्तीका विषयमा छलफल हुने पार्टीका स्थायी कमिटी सदस्य गणेश साहले बताए । केन्द्रीय सदस्यहरुलाई नागरिकता र पार्टीको परिचयपत्रसहित बैठकमा उपस्थित हुन भनिएको थियो ।


प्रकाशित : फाल्गुन १९, २०७७ १३:४७
पूरा पढ्नुहोस्
प्रतिक्रिया
पठाउनुहोस्
×