मन्त्रिपरिषद्‌द्वारा फागुन २३ गते संसद् अधिवेशन बोलाउन राष्ट्रपतिसमक्ष सिफारिस- समाचार - कान्तिपुर समाचार

मन्त्रिपरिषद्‌द्वारा फागुन २३ गते संसद् अधिवेशन बोलाउन राष्ट्रपतिसमक्ष सिफारिस

कान्तिपुर संवाददाता

काठमाडौँ — सरकारले यही फागुन २३ गते संसद् अधिवेशन बोलाउन राष्ट्रपति विद्यादेवी भण्डारीसमक्ष सिफारिस गरेको छ । 

शुक्रबार प्रधानमन्त्रीको सरकारी निवास बालुवाटारमा बसेको मन्त्रिपरिषद् बैठकले फागुन २३ गते प्रतिनिधिसभा बैठक बोलाउन राष्ट्रपतिसमक्ष सिफारिसको निर्णय गरेको भूमि व्यवस्था, सहकारी तथा गरिबी निवारणमन्त्री शिवमाया तुम्बाहाङ्फेले जानकारी दिइन् । उनका अनुसार बैठकमा मन्त्रालयगत नियमित एजेन्डाहरुमा पनि छलफल भएको थियो ।

प्रधानमन्त्री केपी शर्मा ओलीको सिफारिसमा पुस ५ गते राष्ट्रपति विद्यादेवी भण्डारीले असंवैधानिक रूपमा प्रतिनिधिसभा विघटन गरेकी थिइन् । विघटनविरुद्ध सर्वोच्च अदालतमा मुद्दा परेका थिए । सर्वोच्चले ती मुद्दाहरूमाथि सुनुवाइ गर्दै फागुन ११ गते प्रधानमन्त्रीको सिफारिस र राष्ट्रपतिको विघटन घोषणा असंवैधानिक भन्दै प्रतिनिधिसभा पुन:स्थापना गरेको थियो ।

सर्वोच्चले १३ दिनभित्र बैठक बस्ने गरी व्यवस्था गर्न राष्ट्रपति, प्रधानमन्त्री र सभामुखका नाममा परमादेश जारी गरेको थियो । सोही बमोजिम मन्त्रिपरिषद्ले संघीय संसद् अधिवेशन आह्वान गर्न सिफारिस गरेको हो ।

प्रकाशित : फाल्गुन १४, २०७७ १९:४६
प्रतिक्रिया
पठाउनुहोस्

चन्द समूहका कार्यकर्ता भएको आरोपमा पक्राउ

अवधेशकुमार झा

राजविराज — सप्तरी प्रहरीले शुक्रबार साँझ ७ बजे प्रतिबन्धित नेत्रविक्रम चन्द नेतृत्वको नेकपाका कार्यकर्ता भएको आरोपमा राजविराजबाट एक जनालाई पक्राउ गरेको छ ।

राजविराज ५ स्थित एक घरमा भाडामा बस्दै आएका उदयनाथ मण्डललाई घरबाटै प्रहरीले नियन्त्रणमा लिएको जिल्ला प्रहरी प्रमुख एसपी राजेन्द्रप्रसाद धमलाले जानकारी दिए । पक्राउ गरिएका मण्डल टेलिफोनबाट विभिन्न व्यक्तिलाई फोन गरी चन्दाका लागि धम्क्याउने गरेको सूचनापछि प्रहरीले उनीमाथि निगरानी सुरु गरेको एसपी धमलाले जनाए ।

शुक्रबार साँझ प्रहरी निरीक्षकको कमाण्डमा खटिएको प्रहरी टोलीले उनको घर घेरा हाली मण्डललाई नियन्त्रणमा लिएको थियो । एसपी धमलाका अनुसार प्रारम्भिक अनुसन्धानका क्रममा मण्डल चन्द समूहका सप्तरी सिरहा जिल्ला कमिटीका सदस्य रहेको बताए पनि उनी कुन जिम्मेवारीमा छन् भन्ने विषयमा अनुसन्धान भइरहेको छ ।

प्रहरीले उनको घरमा चन्द समूहका केही दस्तावेजहरु फेला पारेको बताएको छ । ‘अहिले उदयनाथ मण्डललाई पक्राउ गरेका छौं, उनको घरबाट प्रतिबन्धित समूहका दस्तावेजहरु फेला परेको छ, थप अनुसन्धान भइरहेको छ’, एसपी धमलाले भने,‘अनुसन्धान जारी रहेकाले थप कुरा खुल्न बाकी छ ।’

प्रकाशित : फाल्गुन १४, २०७७ १९:३३
पूरा पढ्नुहोस्
प्रतिक्रिया
पठाउनुहोस्
थप केही समाचारबाट
×