जब प्रजातान्त्रिक मूल्य र मान्यता कुल्चिन्छन्, नागरिक समाज उठ्नै पर्छ : प्रा. माथेमा
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/ekantipur900x100-3082024084948.gif)
काठमाडौँ — त्रिभुवन विश्वविद्यालयका पूर्वउपकुलपति प्राध्यापक केदारभक्त माथेमाले मुलुकमा भयानक विकृति रहेको भन्दै नागरिक समाजले निरन्तर खबरदारी गर्नुपर्नेमा जोड दिएका छन् ।
![](https://assets-cdn.ekantipur.com/uploads/source/ads/ekantipur-1-1282024082932.gif)
![जब प्रजातान्त्रिक मूल्य र मान्यता कुल्चिन्छन्, नागरिक समाज उठ्नै पर्छ : प्रा. माथेमा](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2021/miscellaneous/kedar-bhakta-3112021115015-1000x0.jpg&w=1001&h=0)
![](https://assets-cdn.ekantipur.com/uploads/source/ads/comp-900x100-1672024010950.gif)
प्रतिनिधिसभा विघटनको विरोधमा 'बृहत् नागरिक आन्दोलन' ले आइतबार काठमाडौंमा आयोजना गरेको कार्यक्रममा बोल्दै प्राध्यापक माथेमाले संसद् पुन:स्थापना भएरमात्रै सबै कुरा समाधान नहुने भन्दै यहाँ देखिएका भयानक विकृतिमा खबरदारी गर्नुपर्ने बताएका हुन् । 'मेरो विचारमा संसद् पुन:स्थापना भएरमात्रै सबै कुरा सिद्धिने होइन । यहाँ भयानक विकृति देखेका छौं । भयानक विकृति हामीले खेपेका छौं ,' उनले भने, 'एउटा त इलेक्सन प्रोसेस नै हामीले कत्ति महँगो बनाएका छौं । यसलाई पनि एड्जस्ट गर्नुपर्छ । निर्वाचन प्रक्रियाका कारण भ्रष्टाचार, गडबढी हुने हो । नेपालले यो धान्न सक्दैन । नागरिक समाज एकदमै बढेर आओस् ।'
प्रजातान्त्रिक मूल्य, मान्यता खतरा पर्ने वित्तिकै नागरिक समाज उठनु पर्ने भन्दै उनले आन्दोलनमा प्राध्यापकहरु नदेखिनु दु:खको कुरा भएको बताए । 'जब प्रजातान्त्रिक मूल्य र मान्यता कुल्चिन्छन्, पछारिन्छन्, फालिन्छन् । नागरिक समाज उठ्नै पर्छ । नागरिक समाजको यो आन्दोलनमा प्राध्यापक देखिनु पर्ने मैले, दु:खको कुरो देखिरहेको छैन ।'
संघीयता र समाजवादप्रति सरकार र दलहरुको प्रतिबद्धता नदेखिएको भन्दै प्राध्यापक माथेमाले असन्तुष्टि जनाए । 'संघीयताप्रतिको प्रतिबद्धता आउनु पर्यो । भाषणमामात्रै होइन । अहिले के भयो, ६ महिनापछि के गर्नुहुन्छ ? अधिकार प्रत्यायोजन गर्दै जानुपर्ने हो । हामीले दुई/चार वर्षको अभ्यासमा प्रतिबद्धता देखिएन ,' उनले सुनाए, 'समाजवादी खालको रिपोर्ट आयो भने चकटीमुनि राखिदिने, बाहिर निकाल्दै, निकाल्दैनन् । हाम्रो चिकित्सा शिक्षाको प्रतिवेदन पनि उहाँहरुले डेढ महिनासम्म लुकाइदिनु भयो । यस्तो नि प्रजातन्त्र ? यो प्रजातन्त्र हो भने हामीलाई चाहिएन ।'
मन्त्रीकै अध्यक्षतामा भएको उच्चस्तरीय समितिको प्रतिवेदन लुकाइएको भन्दै उनले आपत्ति जनाएका हुन् । कार्यक्रममा तुलानारायण साह, रिता परियार लगायतले बोलेका थिए । पुस ५ गते प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले प्रतिनिधिसभा विघटन गरिदिएपछि उक्त कदम असंवैधानिक भन्दै नागरिक समाजले आन्दोलन थालेको हो ।
![](https://assets-cdn.ekantipur.com/uploads/source/ads/900-x-100-1-0282024055738.gif)