‘प्रधानमन्त्रीद्वारा सर्वसत्तावाद र निरंकुशता लाद्‍ने प्रयास’- समाचार - कान्तिपुर समाचार

‘प्रधानमन्त्रीद्वारा सर्वसत्तावाद र निरंकुशता लाद्‍ने प्रयास’

प्रधानमन्त्री ओलीलाई ३० दिनमा सडकबाटै फाल्ने नेता भट्टराईको चेतावनी
देवनारायण साह

मोरङ — पूर्वप्रधानमन्त्री तथा जनता समाजवादी पार्टीका राष्ट्रिय परिषद् अध्यक्ष बाबुराम भट्टराई र कार्यकारी अध्यक्ष उपेन्द्र यादवले प्रधानमन्त्री केपी शर्मा ओलीले जनतालाई धोका दिई प्रतिक्रान्ति गरेर सर्वसत्तावाद र निरंकुशता लाद्न खोजेको आरोप लगाएका छन् ।

जनता समाजवादी पार्टीले विराटनगरमा शनिबार आयोजना गरेको विरोधसभाका सहभागी । तस्बिर : देवनारायण साह/कान्तिपुर

जसपाले विराटनगरमा शनिबार आयोजना गरेको जनप्रदर्शन तथा विरोधसभामा भट्टराईले प्रधानमन्त्री ओलीलाई ३० दिनमा सडकबाटै फाल्ने उद्घोष गरेका छन् ।

जननिर्वाचित प्रधानमन्त्रीले जनतालाई धोका दिएर राजा महेन्द्रको बाटोमा अगाडि बढेर प्रतिक्रान्ति गरेको भट्टराईले आरोप लगाए । ३० वर्ष लगाएर राजा महेन्द्र फालेका नेपालीले ३० दिन नभए ३० सातामा प्रधानमन्त्री ओलीको प्रतिगमनलाई फालेर अहिलेसम्म प्राप्त उपलब्धिको रक्षा गर्दै अघि बढ्ने उनको भनाइ थियो । ‘अहिलेसम्मको प्राप्त उपलब्धि सडकबाटै पुनस्र्थापित गरेपछि संविधानको अपूर्णता संघीयता, शासकीय स्वरूप, निर्वाचन प्रणाली, नागरिकतालगायतका विषयलाई संशोधन गरेर अगाडि जान्छौं,’ उनले भने, ‘अहिले प्रतिगमन सच्चिन संसद् पुनस्र्थापना गर्नुपर्छ र यो विषयमा सर्वोच्च अदालतको निर्णय के आउँछ, पर्खेर बसेका छौं, होइन भने जनताले आफ्ना अधिकार छाड्दैनन् ।’ प्रधानमन्त्री ओलीको निरंकुश र फासिस्ट प्रवृत्तिलाई परास्त गर्न भट्टराईले सबै दललाई आग्रह गरे । ‘नेकपा आधिकारिकताको टुंगो लागेको छैन । दाहाल–नेपाल समूह अहिले पनि प्रधानमन्त्री ओली सच्चिएर आउने आशमा छ तर यसबाट केही हुनेवाला छैन,’ उनले भने, ‘दाहाल–नेपाल समूहले छिट्टै आफ्नो कित्ता प्रस्ट गरोस् ।’

उनले कांग्रेसलाई ढुलमुले नीति त्यागेर आन्दोलनमा सँगै आउन आग्रह गरे । ‘कांग्रेसले चुनाव जित्छु भन्नु त्योभन्दा ठूलो भ्रम अरू केही पनि होइन । किनकि बीपी कोइरालाले पञ्चायतको र गिरिजाप्रसाद कोइरालाले राजा महेन्द्रको चुनावमा भाग लिएका थिएनन्,’ उनले भने, ‘त्यसैले कांग्रेसका नेताहरुले इतिहास सम्झिऊन् । ओलीसँग सती जाने काम नगरुन् ।’

कार्यकारी अध्यक्ष यादवले संविधानमा हुँदै नभएका अधिकार प्रयोग गरी प्रतिनिधिसभा विघटन गर्नु असंवैधानिक र प्रतिगामी कदम भएको बताए । ‘असंवैधानिक कदम खारेज गरी प्रधानमन्त्री ओलीलाई सत्ताबाट हटाउनु अहिलेको आवश्यकता हो,’ उनले भने, ‘प्रधानमन्त्री ओलीले संसद् भंग गरेर चुनाव गराउन नभई सर्वसत्तावाद र निरंकुशता लाद्ने दुष्प्रयास गरेका छन् ।’

कामचलाउ सरकार भएर पनि मन्त्रिपरिषद् विस्तार गर्नुले प्रधानमन्त्री ओलीको नियतमा खोट रहेको भन्दै यादवले संघीयता, लोकतन्त्र, गणतन्त्र, समावेशिता उल्लेख भएको संबिधान जोगाउन प्रतिनिधिसभा पुनस्र्थापनाका लागि सडक संघर्षमा उत्रिनुपरेको बताए । प्रदेशसभा र स्थानीय तहलाई खारेज गर्ने, संकटकाल लगाउने तथा सेना परिचालन गर्नेजस्ता प्रधानमन्त्री ओलीको धम्कीले उनैलाई समाप्त पार्ने यादवको भनाइ छ । ‘न्यायालयमा पनि प्रधानमन्त्री ओलीले सेटिङ गरेको हल्ला छ, सेटिङकै आधारमा जनताको अधिकार खोस्ने र संविधान, लोकतन्त्र, गणतन्त्र, संघीयता, समावेशितामाथि प्रहार भयो भने जनअदालतमा जान्छौं,’ उनले भने, ‘जनताको अदालत जनसंघर्षबाटै विरोधी र प्रतिगमनकारी शक्तिलाई फाल्छौं ।’ प्रतिगमनलाई परास्त गर्न कांग्रेसलाई संयुक्त आन्दोलनमा आउन आह्वान गर्दै उनले थपे, ‘प्रधानमन्त्री ओलीको दुष्कर्मलाई साथ दिए कांग्रेसको इतिहासमाथि प्रश्न उठ्छ ।’

प्रकाशित : पुस २५, २०७७ २१:३५
प्रतिक्रिया
पठाउनुहोस्

६२ जना सवार इन्डोनेसियाली विमान बेपत्ता

उडेको चार मिनेटमै सम्पर्कविहीन 
कान्तिपुर संवाददाता

‍जकार्ता — इन्डोनेसियाको राजधानी जकार्ताबाट शनिबार अपराह्न उडेको श्रीविजय एयरको बोइङ–७३७ विमान बेपत्ता भएको छ । विमानमा ५० यात्रु र १२ चालक दल सदस्य थिए ।

श्रीविजय एयरको बेपत्ता विमानमा सवार यात्रुका आफन्त इन्डोनेसियाको पोन्तियानकस्थित सुपेडियो विमानस्थलमा । तस्बिर : एएफपी

इन्डोनेसियाकै वेस्ट कालिमान्ताक प्रान्तको राजधानी पोन्तियानकका लागि उडेको विमान जकार्ताको उत्तरी समुद्रमा खसेको आशंका गरिएको छ ।

भारी वर्षा भइरहेका बेला सुकार्नो हात्ता अन्तर्राष्ट्रिय विमानस्थलबाट स्थानीय समयअनुसार २ बजेर ३६ मिनेटमा उडेको उक्त विमानले चार मिनेटमै सम्पर्क गुमाएको थियो । उडानको विवरण राख्ने फ्लाइटराडार२४ डट कमका अनुसार श्रीविजय एयरको विमान सम्पर्कविहीन हुनुअघि एक मिनेटभन्दा कम समयमै १० हजार फिट तल झरेको थियो । विमानमा सवारको जीवित उद्धार हुने सम्भावना न्यून रहेको सम्बन्धित अधिकारीहरूको भनाइ उद्धृत गर्दै समाचार एजेन्सीहरूले उल्लेख गरेका छन् । विमानमा ७ बालबालिकासमेत थिए ।

विमान बेपत्ता भएको क्षेत्र नजिकैको टापुका बासिन्दाले पानीमा केही तार र धातुका टुक्रा भेटेर तिनको तस्बिर सामाजिक सञ्जालमा राखेका छन् । ती सामग्री त्यही विमानको भएको आशंका गरिएको छ । ती सामग्रीको अनुसन्धान नेसनल ट्रान्सपोर्टेसन सेफ्टी कमिटीले गर्ने जनाइएको छ ।

माछा मार्दै गरेका एक व्यक्तिले भने विमान समुद्रमा खसेको देखेको दाबी गरेका छन् । ‘विमान बिजुली चम्किएजसरी समुद्रमा खस्यो र पड्कियो । विमानको एउटा टुक्रा हाम्रो पानीजहाजमा झन्डै ठोकिएको थियो,’ उनले सञ्चारमाध्यमलाई भनेका छन् । इन्डोनेसियाली एयरलाइन्स श्रीविजय एयरले विमानबारे विस्तृत विवरण संकलन गरिरहेको जनाएको छ । उसले विमान उड्नुअघि राम्रो ‘कन्डिसन’ मा रहेको दाबी गरेको छ ।

बोइङ ७३५–५०० मोडलको उक्त विमान २६ वर्ष पुरानो रहेको जनाइएको छ । उक्त विमानले १ सय ३० जनासम्म बोक्न सक्छ । जकार्ताबाट पोन्तियानक पुग्न विमानलाई करिब ९० मिनेट लाग्छ । सन् २००३ मा स्थापना भएको श्रीविजय एयर ग्रुपले बढीजसो आन्तरिक उडान गर्ने गर्छ । इन्डोनेसियाली सरकारले बेपत्ता विमानको खोजी भइरहेको जनाएको छ । नेसनल सर्च एन्ड रेस्क्यु एजेन्सी र नेसनल ट्रान्सपोर्टेसन सेफ्टी कमिटीको समन्वयमा उद्धार तथा खोजी गर्ने टोली परिचालन गरिएको हो ।

प्रकाशित : पुस २५, २०७७ २०:४०
पूरा पढ्नुहोस्
प्रतिक्रिया
पठाउनुहोस्
x
×