बर्दिबास प्रदर्शनमा प्रहरीको गोली लागेका युवकको मृत्यु- समाचार - कान्तिपुर समाचार

बर्दिबास प्रदर्शनमा प्रहरीको गोली लागेका युवकको मृत्यु

सुनिता बराल

महोत्तरी — बर्दिबासमा मंगलबार ६ वर्षीया बालिकाको बलात्कारपछि हत्या भएको भन्दै गरिएको प्रदर्शनमा प्रहरीको गोली लागेर घाइते भएका युवकको मृत्यु भएको छ । बर्दिबास–१ बुद्धिराज न्यौपाने (सञ्जय) को उपचारकै मंगलबार राति मृत्यु भएको हो ।

हत्या गरी बोरामा कोचेर फालिएको अवस्थामा स्थानीय गुलबसा खातुनको शव मंगलबार बिहान बर्दिबास–१४ स्थित उनको घरनजिकै फेला परेको थियो । बालिका दुई दिनदेखि बेपत्ता थिइन् । उनको बलात्कारपछि हत्या भएको भन्दै आफन्त तथा स्थानीय बासिन्दा दोषीलाई कारबाही गर्नुपर्ने मागसहित शव सडकमा राखेर प्रदर्शनमा उत्रिएका थिए । भिड नियन्त्रणमा लिन प्रहरीले गोली चलाएको थियो ।

गोली लागेर गम्भीर घाइते भएका न्यौपाने र बर्दिबास–५ का श्याम कार्कीलाई उपचारका लागि मंगलबार दिउँसो ३ बजे हेलिकप्टरबाट काठमाडौं लगिएको थियो ।

काठमाडौंको ग्रान्डी अस्पतालमा उपचारकै उनको मृत्यु भएको पारिवारिक स्रोतले जनाएको छ । मंगलबार राति १ बजे न्यौपानेको ज्यान गएको बर्दिवासका बासिन्दा बिस्नु बम्जनले जानकारी दिए ।

बालिकाको हत्या गरेकाे आरोपमा प्रहरीले एक जनालाई पक्राउ गरिसकेको छ ।

प्रकाशित : मंसिर १०, २०७७ ०७:१८
प्रतिक्रिया
पठाउनुहोस्

पाल्पामा ट्याक्टर दुर्घटना : एकको मृत्यु, तीन घाइते

माधव अर्याल

पाल्पा — रैनादेवी छहरा गाउँपालिका–६, जुठापौवामा मंगलबार राति भएको ट्याक्टर दुर्घटनामा एक जनाको मृत्यु भएको छ भने तीन जना घाइते भएका छन् ।

जुठापौवाको चहला भित्री कच्ची सडकमा दमारबाट माझीटोल जाँदै गरेको लु ३ त ७१५६ नम्बरको ट्याक्टर दुर्घटना हुँदासहचालक १९ वर्षीय रमन भट्टराईको मृत्यु भएको हो ।

दुर्घटनामा जुठापौवा चहलाकै १६ वर्षीय रक्षा केसी, १५ वर्षीय सविक्षा केसी र १४ वर्षीय विकास रायमाझी घाइते भएको जिल्ला प्रहरी कार्यालयका सूचना अधिकारी मदन गिरीले जानकारी दिए । घाइतेको उपचार भइरहेको छ ।

पराल बोकेको ट्याक्टर कच्ची सडकमा अनियन्त्रित भएपछि १० मिटर तल खसेको प्रहरीले जनाएको छ । ट्याक्टर चालकलाई नियन्त्रणमा लिएर अनुसन्धान भइरहेको प्रहरीले जनाएको छ ।

प्रकाशित : मंसिर १०, २०७७ ०७:०७
पूरा पढ्नुहोस्
प्रतिक्रिया
पठाउनुहोस्
×