१२ वर्षे बालिकाको बलात्कारपछि हत्याको आशंका : विह्वल छन् बाजेबज्यै- समाचार - कान्तिपुर समाचार
कान्तिपुर वेबसाईट
AdvertisementAdvertisement

१२ वर्षे बालिकाको बलात्कारपछि हत्याको आशंका : विह्वल छन् बाजेबज्यै

वसन्तप्रताप सिंह

बझाङ — बाजे गोरख र बज्यै हाँसुको सहारा थिइन् १२ वर्षीया सम्झना कामी । घरभित्रको सानोतिनो काम मात्र होइन, घाँस काट्ने, बस्तुभाउको स्याहार तथा बारी गोडमेल गर्नेलगायत काममा पनि उनी निपुण थिइन् ।

‘हामी बूढाबूढी बिरामी हुँदा पानी दिने उही थिई । केही परिहाल्यो भने नातिनी छँदै छ भनेर सोच्थ्यौं । मेरी फूलजस्ती नातिनीलाई राक्षसले चुँडिदियो,’ बज्यै हाँसुले भनिन् ।

बझाङको मस्टा गाउँपालिकाकी सम्झनाको बुधबार साँझ बलात्कारपछि हत्या भएको प्रहरीको प्रारम्भिक अनुमान छ । नातिनीको ‘हत्या’ ले कामी परिवार मात्र होइन, खिकाला गाउँ नै शोकमा डुबेको छ । घटनाको वास्तविकता तत्काल छानबिन गरी दोषीउपर कडा कारबाहीका लागि प्रहरीलाई दबाब दिन खिकालावासी सदरमुकाम चैनपुर आएका छन् । यस घटनाको सामाजिक सञ्जालमा समेत व्यापक निन्दा भइरहेको छ । विभिन्न अधिकारकर्मी संघसंस्था, राजनीतिक दल र तिनका भ्रातृ संगठनले अपराधीलाई कारबाही र पीडितलाई क्षतिपूर्तिको माग गर्दै विज्ञप्तिसमेत निकालेका छन् । आमाबाबु चार वर्षदेखि भारतको बेंग्लोरमा रहेकाले सम्झना दुई बहिनीसहित बाजेबज्यैसँग बस्दै आइरहेकी थिइन् ।

नातिनीको हत्यापछि उनका बाजेबज्यै विह्वल अवस्थामै चैनपुर आई प्रहरी, पत्रकार र अधिकारकर्मीहरूसँग हत्यारालाई कारबाही गराइदिन अनुरोध गरिरहेका छन् ।

घटनाको दिन दिउँसो ४ बजेतिर खाजा खाएर सम्झना आधा घण्टाको पैदल दूरीमा रहेको गोठमा गाईबस्तुलाई घाँस हाल्न डोको–नाम्लो बोकेर गएकी थिइन् ।

‘दिनभरि बाख्रा चराएर थाकेर आएकी थिई, गोठमा म जाउँला तँ आराम गर् भन्दा मानिन,’ बज्यै हाँसुले विलाप गर्दै भनिन्, ‘तपाईं बिरामी हुनुहुन्छ, म एकैछिनमा पुगेर आइहाल्छु भनेर गएकी हो, सबै साथीहरू आए ऊ आइन ।’ नातिनीलाई रोक्न घरबाट ५ मिनेट जति लाग्ने स्वास्थ्यचौकीसम्म आफूले पछ्याएको स्मरण गर्दै उनले भनिन्, ‘उसले नमानेपछि त्यहाँबाट फर्किएँ । १५ मिनेटजति टाढा पर्ने सिमथला डाँडासम्म सम्झना गएको घरबाट देखेकी थिएँ ।’

बझाङको मस्टा गाउँपालिकाकी १२ वर्षीया सम्झनाको हत्यापछि भावविह्वल भएकी बज्यै हाँसु कामी ।तस्बिर : वसन्तप्रताप सिंह/कान्तिपुर

डाँडा कट्नेबितिकै कसैले नियन्त्रणमा लिएको र केही तल रहेको सिममाडौं मन्दिरभित्र लगेर उनको बलात्कारपछि हत्या गरिएको परिवारको दाबी छ । उनले बोकेको नाम्लो र डोको मन्दिरभन्दा करिब सय मिटर तलको खोंचमा फालिएको अवस्थामा भेटिएको उनका काका ईश्वर कामीले बताए । घटनास्थल पुगेका स्थानीयका अनुसार मन्दिरभित्र हत्यारासँग सम्झनाको निकै घम्साघम्सी परेको जस्तो देखिने र छटपटाउँदा भुइँ खुट्टाले खोस्रिएको अवस्थामा रहेको छ ।

न्यून आर्थिक अवस्था भएका सम्झनाका बाजे गोरख बुढेसकालमा पनि आरनको काम गर्छन् । आरनमा कृषिऔजार बनाउने र मर्मत गरेबापत पाइने अन्न (खलो) को सहाराले कामी परिवारको गुजारा चलिरहेको छ । आफूहरूको आर्थिक अवस्था र पहुँच कमजोर भएका कारण अपराधी उम्किने हो कि भन्ने गोरखलाई चिन्ता छ । ‘हामी त आरनको काम गरी खाने मान्छे, हाम्रो लागि बोलिदिने न मान्छे छन्, न पैसा । कतै पैसा पेलेर अपराधी उम्काउने हुन् कि भन्ने चिन्ता छ । तपाईंहरू सबैले बोलिदिनुपर्‍यो,’ उनले भने ।

प्रहरीले पनि सम्झनाको बलात्कारपछि हत्या भएको आशंका गरेको छ । मृतकको पोस्टमार्टम रिपोर्ट आउन बाँकी रहेकाले यस विषयमा ठोकुवा गरेर भन्न नसकिने बझाङका प्रहरी प्रमुख डीएसपी रूपक खड्काले बताए । ‘घटनाको प्रारम्भिक अनुसन्धानका क्रममा घटनास्थलको अवस्था र शवको प्रकृति हेर्दा बालिकाको बलात्कारपछि हत्या भएको हुन सक्ने देखिन्छ,’ घटनास्थल पुगेका उनले भने, ‘अपराधमा संलग्न भएको आशंकामा एक जनालाई नियन्त्रणमा लिएर अनुसन्धान भइरहेको छ ।’

उनले पक्राउ परेका व्यक्ति नै अपराधमा संलग्न रहेको खुल्ने केही बलिया प्रमाण फेला परेको खुलाए । यद्यपि अभियुक्तले अपराध स्वीकार नगरेको र थप प्रमाणहरू संकलन गर्न प्रहरी टोली घटनास्थलमै रहेको उनले बताए । ‘गम्भीर अनुसन्धान भइरहेको छ, छिट्टै अपराधी पत्ता लाग्नेछ,’ उनले भने ।

प्रकाशित : आश्विन १०, २०७७ ०७:३२
प्रतिक्रिया
पठाउनुहोस्

डिन जोन्सको त्यो मद्रास इनिङ्स

डिन जोन्ससँग जोडिएका धेरै कथा छन् । उनी कति धेरै आक्रामक खेलाडी थिए भने विपक्षी खेलाडीलाई कुटौंलाझैं गरेर पेस हुन्थे । उनी खासमा यस्तै प्रवृत्तिका मान्छे थिए । खेल्दा नि आक्रामक, व्यवहार पनि आक्रामक ।
द डेलिमेल

लन्डन — सन् १९८६ को त्यो प्रसिद्ध मद्रास टेस्टको बेला गर्मी ४२ डिग्रीको थियो । त्यही टेस्टमा डिन जोन्सले यो खेलकै सबैभन्दा बहादुरीपूर्ण इनिङ्स खेलेका थिए । जोन्सको बिहीबार अप्रत्याशित निधन भयो, उनी ५९ वर्षका मात्र थिए । अहिले सबैले त्यही टेस्टको इतिहासमा फर्केर सम्झने प्रयास गरेका छन् । यो टेस्ट क्रिकेट इतिहासमै दोस्रो टाइ मात्र थियो । जोन्सका लागि भने त्यो तेस्रो टेस्टमात्रै थियो । उनले त्यसमा २ सय १० रनको अद्वितीय प्रदर्शन दिए ।

उनी क्रिकेटमा ८ घण्टा २३ मिनेट क्रिजमा रहे, ब्याटिङकै क्रममा अविश्वसनीय रूपमा आठ किलो गुमाए । खेल्दै गर्दा उनले एक दर्जनभन्दा बढी पटक त बान्ता नै गरे । खेलपछि उनलाई सिधै अस्पताल लगिएको थियो । पछि जोन्सले भनेका थिए, ‘मलाईले १ सय २० रन बनाइसकेपछि के भएको थियो, त्यो याद नै छैन ।’ उनी एक प्रकारले बेहोसीकै स्थितिमा थिए, तर दोहोरो शतक भने पूरा गरे । प्रस्ट छ, उनले कस्तो विषम परिस्थितिमा खेले भनेर । अहिले भएको भए, यस्तो स्थितिमा कसैलाई खेल्न नै दिने अवस्था हुँदैनथ्यो ।

त्यतिबेला स्थिति बेग्लै थियो । अस्ट्रेलियाली साथीहरू जोन्सलाई अझ बहादुरीपूर्वक खेल्न उक्साइरहेका थिए । कप्तान थिए, एलान बोडर । उनले खाली यति भनेका थिए, ‘डिन्सले सकेनन् भने अर्का ब्याट्सम्यानलाई पठाउँला ।’ त्यतिबेला जोन्सका रुम पार्टनर थिए, स्टिभ वा । उनी ती दिन सम्झेर भन्छन्, ‘जोन्स गम्भीर समस्यामा देखिन्थे, उनको अनुहारमा कुनै प्रकारको भाव थिएन । उनको शरीरले राम्रोसँग काम गरिरहेको थिएन, तर उनले ब्याटिङ गर्न भने छाडेनन् ।’


जोन्सलाई सबैले सधैंका लागि सम्झने कारण यही टेस्ट हो । उनले एक दशकजतिको समय अस्ट्रेलियाका लागि खेले र उनी टेस्ट क्रिकेटका गज्जबका खेलाडी थिए । नत्र उनको औसत ४६ रन हुने थिएन । तर उनी एकदिवसीय क्रिकेटका अझ जबरदस्त खेलाडी थिए । अझ उनी यो ढाँचाको क्रिकेटका प्रखर खेलाडी नै हुन् । उनले नै एकदिवसीय क्रिकेटलाई लोकप्रिय बनाउन धेरै मदत गरेभन्दा हुन्छ । एकदिवसीय क्रिकेटमा दोस्रोपल्ट ब्याटिङ गर्दा उनको औसत ६५ रहेको छ ।

अर्थात उनी विजय लक्ष्य पछ्याउने क्रमका अब्बल दर्जाका बेजोड खेलाडी थिए । धेरै समय उनी एकदिवसीय क्रिकेटमा नटआउट रहे । उनको त्यो समयको एकदिवसीय क्रिकेटको प्रदर्शन सम्झेर धेरै भन्ने गरेका छन्, अहिलेको ट्वान्टी–२० क्रिकेटका लागि उनी निकै उपयुक्त खेलाडी थिए । अझ उनको खेल नै ट्वान्टी–२० पाराको थियो । उनको पुस्ताका कोही खेलाडीले अहिले ट्वान्टी–२० क्रिकेट उत्तिकै जोसले खेल्न सक्थे भने ती जोन्समात्रै हुन्थे ।


उनीसँग जोडिएका यस्ता धेरै कथा छन् । उनी कति धेरै आक्रामक खेलाडी थिए भने विपक्षी खेलाडीलाई कुटौंलाझै गरेर पेस हुन्थे, जुन कुनै पनि प्रकारले राम्रो थिएन । उनी खासमा यस्तै प्रवृत्तिका मान्छे थिए । खेल्दा नि आक्रामक, व्यवहार पनि आक्रामक । हुँदाहुँदै उनको कमेन्ट्री गर्ने पारा पनि त्यस्तै थियो, चर्को आवाज, अचम्मको फरक शैली । उनलाई जति मन पराउने थिए, उत्तिकै मन नपराउने थिए । तर ती सबैले एक तथ्य भने पक्कै मान्ने छन्, ‘जोन्स सायद अलि चाँडै सबैबाट बिदाइ भए ।’

जोन्स बिहीबार हृदयघातका कारण मृत्यु भएको हो । उनले अस्ट्रेलियाका लागि ५२ टेस्ट र १ सय ६४ एकदिवसीय खेलेका छन् । उनी सन् १९८४ देखि १९९४ सम्म खेलाडीका रूपमा १० वर्ष सक्रिय थिए । उनले टेस्ट क्रिकेटमा ४६.५५ को औसतले ३ हजार ६ सय ३१ रन बनाए । त्यसमा ११ शतक र १४ अर्धशतक सामेल थियो । यस्तै उनले सात शतक र ४६ अर्धशतकसहित ६ हजारभन्दा माथि एकदिवसीय रन बनाए ।

सन् १९९८ मा सबैखाले क्रिकेटबाट संन्यास लिएका उनी त्यसपछि प्रशिक्षक र कमेन्टेरको भूमिकामा देखापरे ।

प्रकाशित : आश्विन १०, २०७७ ०७:३२
पूरा पढ्नुहोस्
प्रतिक्रिया
पठाउनुहोस्
×