संसदीय समितिलाई राजदूतहरूको आग्रह- नेपाल फर्किने हजारौं छन्, उडान थपिदिनुपर्‍यो- समाचार - कान्तिपुर समाचार

संसदीय समितिलाई राजदूतहरूको आग्रह- नेपाल फर्किने हजारौं छन्, उडान थपिदिनुपर्‍यो

कान्तिपुर संवाददाता

काठमाडौँ — वैदेशिक रोजगारी र अन्य कामले विदेश गएर कोरोना भाइरसको संक्रमण (कोभिड- १९) का कारण अन्तर्राष्ट्रिय हवाइ उडान नहुँदा उतै रोकिएका नेपालीलाई स्वदेश फर्काउन नियमित उडान संख्या थप्‍नुपर्ने सम्बन्धित देशका लागि नेपाली राजदूतहरुले बताएका छन् ।

केही मुलुकमा उद्धार उडान पनि गर्नुपर्ने अवस्था रहेको राजदूतहरूको भनाइ छ ।

कोरोना संक्रमणका कारण उडान बन्द हुँदा नेपाल आउन नपाएका, रोजगारी गुमाएका र भिसा अवधि सकिएका हजारौं नेपाली स्वदेश फर्किन तयार रहेकाले उडानको संख्या बढाउनका लागि पहल गरिदिन राजदूतहरूले संसदीय समितिलाई आग्रह गरेका हुन् ।

प्रतिनिधिसभाको उद्योग तथा वाणिज्य र श्रम तथा उपभोक्ता हित समितिसँगको भर्चुअल बैठकमा मलेसिया, खाडी लगायत श्रम गन्तव्य मुलुकका राजदूतहरूले उक्त आग्रह गरेका हुन् ।

मलेसियाका लागि नेपाली राजदूत उदयराज पाण्डेले ११ हजार बढी नेपाली श्रमिक स्वदेश फर्किए पनि अझै करिब ८ हजारले फर्किनका लागि दूतावासमा नाम दर्ता गराएको बताए । स्वदेश फर्किन नाम दर्ता गराएका बाहेक हरेक दिन ३ सय नेपालीहरूको भिसा अवधि सकिने गरेकाले पनि त्यो संख्या थपिँदै आएको उनले जानकारी दिए । दसैं र तिहारको समय नजिकिँदै गर्दा पनि त्यो संख्या बढ्ने भएकाले प्रत्येक साता मलेसियाका लागि १६ वटा नियमित उडान आवश्यक पर्ने उनको भनाइ थियो ।

परराष्ट्र मन्त्रालय, पर्यटन मन्त्रालय र श्रम, रोजगार तथा सामाजिक सुरक्षा मन्त्रालयलाई उक्त कुराको जानकारी गराएको बताउँदै राजदूत पाण्डेले समितिलाई पनि उक्त विषयमा मन्त्रालयसँग छलफल गरिदिन आग्रह गरेका थिए ।

कुवेतका लागि नेपाली राजदूत दुर्गाप्रसाद भण्डारीले राजदूतावासमा स्वदेश फर्किनका लागि भनेर नाम दर्ता गराउनेको संख्या ९ हजार २ सय भन्दा बढी रहेको बताए । कतारमा भने त्यसरी स्वदेश फर्किन चाहनेको संख्या २० हजारभन्दा बढी रहेको राजदूत नारदनाथ भारद्वाजले जानकारी दिए ।

कोरोनाका कारण रोजगारी गुमाएकालाई तत्काल उद्धार गर्न नसके समस्या उत्पन्न हुने उनको भनाइ थियो । '२० हजार बढीले स्वदेश फर्किनका लागि नाम दर्ता गराएका छन्,' उनले भने, 'अझै प्रतिदिन १ सय ५० भन्दा बढीले नाम दर्ता गराइरहनुभएको छ ।' कतारका लागि दैनिक ४ वटा उडान गर्न नसके अहिले कतारमा थन्किएका १६ हजार भन्दा बढी र दसैं-तिहारमा घर फर्किन चाहनेहरू समस्यामा पर्ने उनको भनाइ थियो ।

साउदी अरेबियाका लागि नेपाली राजदूत महेन्द्रप्रसाद सिंह राजपुतले २८ हजार बढीले स्वदेश फर्किन निवेदन दिएकोमा १० हजारलाई मात्रै पठाउन सकिएको बताए । उडान थपिदिन सरकारका सम्बन्धित निकायसँग कुरा गरेपनि समन्वय हुन नसक्दा समस्या थपिएको उनको भनाइ थियो ।

मलेसियाका लागि नेपाली राजदूत पाण्डेले कल्याणकारी कोषबाट उद्धार गर्ने नीति सरकारले लिएपनि व्यवहारिक हुन नसकेको भन्दै परिमार्जन गर्न संसदीय समितिलाई आग्रह गरेका थिए । उनले अव्यवहारिक निर्देशिकाका कारण विदेशी भूमिमा समस्यामा परेका नागरिक घर फर्कन नपाएको बताए ।

प्रकाशित : आश्विन ५, २०७७ १९:५४
प्रतिक्रिया
पठाउनुहोस्

नेतृत्वको नियत अधिवेशन गराउने छैन : पौडेल

महाधिवेशनबारे छलफल गर्न १९ गते बोलाइयो केन्द्रीय समिति 
समयभित्र महाधिवेशन गराउन नसक्ने अवस्थामा संवैधानिक संकटबाट पार्टीलाई जोगाउन पौडेलले विशेष महाधिवेशनको विकल्पसमेत अघि सारेका छन् । 
कुलचन्द्र न्यौपाने

काठमाडौँ — कांग्रेसका वरिष्ठ नेता रामचन्द्र पौडेलले पार्टी सभापति शेरबहादुर देउवाले महाअधिवेशन नगराई पार्टीलाई संकटतिर धकेल्ने खोजेको आरोप लगाएका छन् । 

संवैधानिक संकट निम्ताएर पार्टीलाई दुर्घटनामा जान नदिनका लागि विशेष महधिवेशनको विकल्पसमेत उनले अघि सारेका छन् ।

पार्टीको पुराना संरचनाको समायोजन, क्रियाशील सदस्यता वितरण र नवीकरणका कार्यमा उत्पन्न अन्यौलपूर्ण स्थितिको कारण देखाउँदै पौडेलले तोकिएकै मितिमा महाधिवेशन नगराउने नियत नेतृत्वमा देखिएको बताएका हुन् ।

‘अब बाँकी रहेको पाँच महिनाको सिंगै अवधिलाई सदुपयोग गरी समयमै महाधिवेशन सम्पन्न गरौं भन्ने हो, त्यो पनि नगरेर अधिवेशन टार्ने, नगर्ने नियत रहने हो भने पार्टीलाई संकटबाट जोगाउन विशेष महाधिवेशन बोलाएर भने पनि पार्टी बचाउन सकिन्छ भन्ने मेरो भनाई हो,’ पौडेलले सोमबार सामाजिक सञ्जालमार्फत् आफ्नो दृष्टिकोण राखेका छन ।

कांग्रेसको केन्द्रीय महाधिवेशन आगामी फागुन ७–१० गते काठमाडौमा हुने तय भएको छ । कोभिड–१९ संक्रमणका कारण क्रियाशील सदस्यता वितरण, नवीकरण र पार्टीको समायोजनको काम रोकिएपछि महाधिवेशनको तालिका प्रभावित हुने देखिएको छ ।

फागुनको तालिका प्रभावित हुँदा अर्को ६ महिनाभित्र पनि महाधिवेशन नगराउने चलखेल बढेको पौडेलको आशंका छ । फागुनमा महाधिवेशन हुन नसके संविधान अनुसार थप ६ महिनाको समय थप्न सकिन्छ । त्यसभित्र पनि महाधिवेशन नभए संवैधानिक संकट निम्तिने र त्यतिबेला वर्तमान कार्यसमितिलाई निरन्तरता दिनका लागि निर्वाचन आयोगमा पठाउने चाल संस्थापनबाट हुनसक्ने आशंका पौडेलले गर्दै आएका छन् ।

कांग्रेस सहमहामन्त्री प्रकाशशरण महतले महाधिवेशन नै गर्न नसक्ने स्थिति उत्पन्न नभएको बताए । ‘फागुनमै महाधिवशन गर्न चूनौती छ । एक/दुई महिना सार्नुपर्ने अवस्था आउन सक्छ, तर जे गर्नुछ सहमतिबाटै गर्छौंर्,’ महतले कान्तिपुरसँग भने, ‘पौडेल दाईले भनिरहनु भएकोजस्तो परिस्थिति अहिले खडा भएको छैन ।’

देउवाले महाधिवेशनकै बिषयमा छलफल गराउन असोज १९ गते केन्द्रीय कार्यसमितिको बैठक बोलाएका छन् । महाधिवेशनको बिषयमा विभिन्न आशंका बढ्दै जान थालेपछि केही दिनअघि उनले संवैधानिक संकट आउन नदिने गरी महाधिवेशन समयभित्रै गर्ने बताएका थिए ।

देउवाले फेरि गरे मनोनयन

तीव्र विरोधका बीच पार्टी सभापति देउवाले विभागहरुमा मनोनयनलाई जारी राखेका छन् । सोमबार उनले गोविन्द भट्टराई प्रमुख रहेको जनसर्म्पक समिति समन्वय विभागमा थप ३४ जना सदस्य मनोनयन गरेका छन् । देउवाले यसअघि १९ वटा विभागमा ९ सय बढीलाई मनोनयन गरिसकेका छन् । देउवा निकट स्रोतका अनुसार उनी अझै ९ वटा विभाग गठनको तयारीमा छन् । जसमा ३ वटा विभाग तत्कालीन फोरम लोकतान्त्रिकबाट कांग्रेस प्रवेश गरेका विजयकुमार गच्छदार समूहलाई दिने बताइएको छ ।

यता पौडेल पक्षले भने केन्द्रीय विभाग गठनको खारेजीको मुद्दा उठाउँदै क्रियाशील सदस्य वितरण र नवीकरणमा पारदर्शी हुन माग राख्दै पार्टी केन्द्रीय कार्यालयमा विरोध पत्र दर्ता गर्ने तयारी गरेको छ ।

प्रकाशित : आश्विन ५, २०७७ १९:५०
पूरा पढ्नुहोस्
प्रतिक्रिया
पठाउनुहोस्
×