पोखरा — काठमाडौंलगायत देशका विभिन्न सहरमा जब ‘इनफ इज इनफ’ समूहको नारा घन्किरहेकै थियो । कोरोना कहरकै बीचमा अनेकन घटना क्रम विकसित भए । यसमा सबैका आ–आफ्नै कथाव्यथा थिए । अझ यो बेला सबैभन्दा बढी मारमा परेका गरिब, निमुखा, विपन्न समुदायलाई सम्बोधन गर्ने गरी राज्यका तर्फबाट उच्चतम व्यवस्था केही गरिएन ।

विदेशमा रहेर पनि देशका सबै घटनाक्रमसँग जानकार थिए सर्जक शिव सुवेदी । स्वदेशको अवस्था देखेर अध्ययनको सिलसिलामा स्विट्जरल्यान्डमा रहेका उनको मन बेचैन बन्यो । मनमा उठेका भावनालाई शब्दमा उतारे र संगीत भरे । चर्चित १० कलाकारको स्वरमा तयार भयो गीत ‘अति भयो अति’ । गीतमा उनले उपचार नपाएर गरिब कहिलेसम्म मरिराख्नुपर्ने हो भन्दै प्रश्न गरेका छन् । उनी यसलाई गरिबको गीत भन्न रुचाउँछन् । 

विकटमा जनता रुन्छन्, उपचार नपाई

मार्छ बरै गरिबीले तिनलाई धपाई–धपाई

अति भयो अति, इनफ इज इनफ

ए सरकार सुन सरकार, अति भयो अति

अस्पताल बन्न गाउँमा निमुखा 

मर्नुपर्छ कति ? 

कहिले चीन र कहिले भारतसँग शिर झुकाउनुपर्ने, देश विकास गर्न अर्कैको शरण लिनुपर्ने तर राजनीति गर्नेले अकुत सम्पत्ति कमाउन नछोड्ने प्रवृत्तिप्रति गीतमा व्यंग्य छ । नेपालमा बग्ने पानीको तालाचाबी अर्कैसँग हुने गरी नदीनाला बेच्ने सम्झौताप्रति गीतमा तिखो प्रहार छ । स्वदेशमै इलम गर्ने वातावरण नहुँदा विदेशमा आफ्ना सन्तान बेचिनुपरेको पीडा पनि उनले गीतमा उतारेका छन् । देश विधिविधानमा नचली व्यक्तिले चलाएकाले जनता विकल्प खोज्न बाध्य हुने प्रसंग गीतमा छ ।

‘देशमा भइरहेको विकृति र विसंगति तथा घटेका घटनालाई हेर्दा जोसुकैलाई पनि लाग्न सक्छ अब त अति भयो,’ उनी भन्छन्, ‘हामीलाई पनि यस्तै लागेकाले समसामयिक गीतको परिकल्पना गरिएको हो । यो गीतको उद्देश्य कुनै पनि वर्ग समुदाय तथा राजनीतिक दल विशेषको पक्ष वा विपक्षमा सन्देश प्रवाह गर्नु हुँदै होइन । हामी समग्र गलत प्रवृत्ति र पद्धतिका बारेमा केही बोल्ने जमर्को गरेका छौं ।’