कान्तिपुर वेबसाईट
AdvertisementAdvertisement

चिनियाँ नेतासँगको भिडियो कन्फरेन्समा दाहालले भने- 'सुरक्षा स्वार्थ जोडिएका विदेशी सहायता लिन्नौं'

कान्तिपुर संवाददाता

काठमाडौँ — पूर्वप्रधानमन्त्री एवं नेकपा अध्यक्ष  पुष्पकमल दाहालले सैन्य गठबन्धनमा जोडिने अभिप्रायको कुनै पनि विदेशी सहयोग नेपालले स्वीकार नगर्ने बताएका छन् । अमेरिकी सहयोगको मिलेनियम च्यालेन्ज कर्पोरेसन (एमसिसी) सम्झौतालाई लिएर नेकपाभित्र विवाद भैरहेका बेला अध्यक्ष दाहालले नेपाल कम्युनिस्ट पार्टी र चिनियाँ कम्युनिस्ट पार्टीका नेताबीच शुक्रबार भिडियो कार्यशालामा अमेरिकाको नाम नलिई पार्टी नीतिबारे यस्तो बोलेका हुन् । 

दाहालले सुरक्षा स्वार्थ जोडिएका र नेपालको संविधानसँग बाझिने विदेशी सहायता नेपालले नस्वीकार्ने नीतिबारे भने, ‘संविधानको मर्मबाहिर हुने गरी तथा कुनै पनि प्रकारको सैन्य गठबन्धनमा संलग्न हुने अर्थ दिने सहयोग नेपाललाई कुनै स्वीकार्य छैन । नेपाल असंलग्न विदेश नीतिमा प्रतिबद्ध छ । नेपालको सार्वभौम स्वतन्त्रता, असंलग्न नीतिलाई समर्थन गर्ने मित्रराष्ट्रहरूको सहयोगको मात्रै हामी स्वागत गर्छौं ।’दाहालसहित नेकपामा धेरै नेता यथास्थितिमा एमसीसी अनुमोदनको पक्षमा छैनन् ।

यसबाहेक दाहालले भारतको नाम नलिई उसँगको सीमा विवादमा नेपालको पोजिसनबारे पनि बोलेका छन् । नेकपाको विदेश नीति संविधानले निर्देश गरेअनुसार असंलग्नतामा आधारित रहेको भन्दै दाहालले द्विपक्षीय विषय संवादबाट समाधान गर्न सकिने बताए । ‘मित्र राष्ट्रहरूसँगका द्विपक्षीय विषय वार्ता र संवादबाट समाधान गर्न चाहन्छौं । तर, वार्ता र संवाद सार्वभौम समानता, आपसी सम्मान र समझदारीको जगमा टेकेर मात्रै हुन्छ,’दाहालको भनाई थियो, ‘नेकपाको विदेश नीति संविधानले निर्देश गरेअनुसार असंलग्नतामा आधारित छ ।’

दाहाले नेपाल एक चीन नीतिप्रति प्रतिबद्ध रहेको दोहोर्‍याए । दाहालले भूकम्पमा जस्तै चीनले कोभिड–१९ को महामारीमा नेपाललाई सहयोग गरेकोमा प्रशंसा गरे । नेपाल र चीन सुख र दुःखका मित्र भएको उनको भनाई थियो । दाहालले कुनै पनि देशले कोरोना भाइरसबारे राजनीति गर्न नहुने बताए । दाहालले कोभिड– १९ को महामारी सकिएलगत्तै आफू चीन भ्रमणमा जाने पनि बताएका छन् ।

प्रकाशित : असार ५, २०७७ १८:३९
प्रतिक्रिया
पठाउनुहोस्

आइसोलेसनबाट बिदा भएका ७ जनालाई कोरोना संक्रमण

नवीन पौडेल

परासी — पश्चिम नवलपरासीको पाल्हिनन्दनका ७ जनामा पुन: संक्रमण देखिएको छ । बिहीबार प्रदेशसभा सदस्य, गाउँपालिका अध्यक्ष, वडाध्यक्षर स्वास्थ्य कार्यालयका प्रमुखले बिदाइ गरेका ७ जनामा शुक्रबार कोरोना संक्रमण पुष्टि भएको हो ।

१४ दिन पाल्ही प्राथमिक स्वास्थ्य केन्द्रको आइसोलेसनमा बसेका उनीहरुलाई रिपोर्ट नआउँदै स्वास्थ्य कार्यालयले घर पठाइएको थियो । दोस्रो पटक स्वाब संकलन गरेर पठाए पनि रिपोर्ट नआउर्दै घर पठाइएको हो । उनीहरुलाई भारतबाट आएपछि क्‍वारेन्टाइनमा राखिएको थियो । स्वाब संकलनका क्रममा पोजिटिभ देखिएपछि उनीहरुलाई आइसोलेसनमा राखिएको थियो ।

‘हामीलाई स्पष्ट निर्देशन छ । संक्रमण देखिएकालाई १४ दिनसम्म कुनै पनि लक्षण नदेखिएमा घर पठाउन सक्ने,’जिल्ला स्वास्थ्य कार्यालय पश्चिम नवलपरासीका प्रमुख गौरब ढकालले भने,‘रिपोर्ट कहिले आउने निश्चित भएन, बिहीबार घर पठाइयो तर रिपोर्ट पोजिटिभ आयो ।’

यसैगरी आरडीटी नेगेटिभ देखिएपछि घर पठाइएका पाल्हीनन्दन गाउँपालिकाका अर्का १ जनामा पोजिटिभ देखिएको छ । क्‍वारेन्टाइनमा बस्दा उनीसँगै बसेकाको रिपोर्ट पोजिटिभ आएपछि कन्ट्र्याक ट्रेसिङका क्रममा उनको स्वाब संकलन गरिएको थियो । क्वारेन्टाइनमा बस्दा संक्रमितसँग सुर्ती मागेर खाएको बताएपछि कन्ट्र्याक ट्रेसिङ गरिएको थियो । १५ दिनसम्म घर बसेका उनको पोजिटिभ रिपोर्ट आएको हो ।

पाल्हीनन्दनमा मात्र संक्रमितको संख्या १२ पुगेको छ । जिल्लाभर ५० जना संक्रमित फेला परेका छन् ।


प्रकाशित : असार ५, २०७७ १८:२५
पूरा पढ्नुहोस्
प्रतिक्रिया
पठाउनुहोस्
×