![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/ekantipur900x100-3082024084948.gif)
काठमाडौँ — ओमानबाट १ सय ४६ जना नेपाली कामदार बिहीबार स्वदेश फर्कंदै छन् । उनीहरु सलाम एयरको उडान नम्बर ओभी ४२७ मार्फत नेपाल आउँदै छन् । ओमानको स्थानीय समय ८:२० मा उडेको यो विमान त्रिभुवन अन्तराष्ट्रिय विमानस्थलमा २ बजे अवतरण हुँदैछ ।
![](https://assets-cdn.ekantipur.com/uploads/source/ads/comp-900x100-1672024010950.gif)
मस्कटस्थित नेपाली दूतावासले उनीहरुलाई स्वदेश पठाएको हो । उनीहरु सबै जनाको पीसीआर परीक्षण गरी स्वदेश पठाइएको हो । जसमा १ सय २० जना पुरुष र २६ जना महिला छन् । अधिकांश महिला घरेलु कामदार हुन् । ओमानबाट आएको यो दोस्रो उडान हो ।
ओमानको लागि नेपाली राजदूत सर्मिला पराजुलीका अनुसार अधिकांशको रोजगारदाताबाटै नै टिकट उपलब्ध गराइएको छ । ‘फर्किनेमध्ये भिसा समाप्त भएका, रोजगार गुमेको र कम्पनी छोडेर गैरकानुनी हैसियत भएकाहरु छन् । गैरकानुनी हैसियत भएकाहरुको जरिवाना मिनाहा गरेर यात्रामा लगाइएको प्रतिबन्ध हटाइएको छ’, उनले भनिन् ।
![](https://assets-cdn.ekantipur.com/uploads/source/ads/900-x-100-1-0282024055738.gif)