कान्तिपुर वेबसाईट
AdvertisementAdvertisement

जे सम्भव छ, त्यही माध्यमबाट पढौं : प्रधानमन्त्री

कान्तिपुर संवाददाता

काठमाडौँ — प्रधानमन्त्री केपी शर्मा ओलीले वैकल्पिक सिकाइसम्बन्धी अभियानको सुरुवातको अवसरमा शुभकामना सन्देश दिँदै सबैलाई यसमा सहभागी हुन आग्रह गरेका छन् ।

उनले विद्यार्थी, अभिभावक र शिक्षकहरुलाई स्थानीय स्तरमा जुन विधि सम्भव छ, त्यही माध्यमबाट पठनपाठन गर्न गराउन आह्वान गरेका छन् । अनलाइन, अफलाइन, टेलिभिजन, रेडियो र स्वअध्ययन सामग्रीको प्रयोग गरेर सिकाइ क्रियाकलापमा सहभागी हुन सकिने उनले जनाए । शिक्षा तथा मानव स्रोत विकास केन्द्रले सोमबारदेखि रेडियो र टेलिभिजनबाट वैकल्पिक कक्षा सञ्चालन थालेको छ । प्रधानमन्त्रीले ती कक्षामा सहभागी हुन आग्रह गरेका हुन् । ‘शैक्षिक सत्र प्रभावित हुन नदिन र विद्यार्थीको सिकाइलाई निरन्तरता दिन सरकारले वैकिल्पक कक्षा सञ्चालन गरेको हो,’ उनले भने ।

सरकारले कोरोना भाइरसको जोखिम आकलन गरी यथासम्वभ छिटो विद्यालयहरु पुन: सञ्चालन गर्ने समेत उनले बताए । वैकल्पिक कक्षाले विद्यार्थीको ज्ञानमा महत्वपूर्ण योगदान गर्ने प्रधानमन्त्रीले बताए । वैकल्पिक कक्षाका लागि आवश्यक सामग्री शिक्षा मन्त्रालयले व्यवस्थापन गर्ने प्रधानमन्त्री ओलीले जनाए ।

प्रधानमन्त्री ओलीले बालबालिकालाई सहयोग गर्न शिक्षक, अभिभावक र स्वयसेवकलाई अपिल समेत गरे । ‘वैकल्पिक शिक्षामा जोडिएका बालबालिका भोलिका कर्णाधार हुन्,’ विद्यार्थी, अभिभावकलाई निराश नहुन आग्रह गर्दै उनले भनेका छन्, ‘शैक्षिक प्रणाली परिमार्जन गर्ने अवसर आएको छ ।, यो प्रविधिलाई घरघरमा पुर्‍याउने अवसर पनि हो ।’ प्रधानमन्त्रीले वैकल्पिक कक्षामा सहभागी देशभरका ६० लाख विद्यार्थीको उज्ज्वल भविष्यको लागि शुभकामना व्यक्त गरे ।

घरघरमै सिकौं : शिक्षामन्त्री

त्यस्तै शिक्षामन्त्री गिरिराजमणि पोखरेलले सरकारले होमस्कुलिङको अवधारणा अघि बढाएको जानकारी दिए । उनले पनि यस अवसरमा शुभकामना सन्देश दिएका हुन् । छापा र प्रविधिका सामग्री प्रयोग गरेर स्व:सिकाइबाट होमस्कुलिङ गर्न सकिने उनले जनाए । शिक्षा मन्त्रालयले गत जेठ १८ गते वैकल्पिक विधि सिकाइ निर्देशिका जारी गरिसकेको छ । उनले भने, ‘अनौपचारिक, वैकल्पिक, खुला र दूरशिक्षाको पद्धतिबाट सिकाइलाई निरन्तरता दिन घरलाई नै शिक्षालय बनाउन सकिन्छ ।’ मन्त्रालयले रेडियो पाठशाला, टेलिभिजन कक्षा सुरु गरेको उनले जानकारी दिए ।

मन्त्री पोखरेलले बालबालिकाको स्वास्थ्यको ख्याल गर्दै अभिभावकहले ती कक्षामा छोराछोरीलाई सहभागी गराउनुपर्ने धारणा व्यक्त गरे । स्थानीय तहले वैकल्पिक कक्षा सञ्चालन अभियानको नेतृत्व गर्ने, प्रदेश र संघीय सरकारले सघाउने उनको भनाइ थियो । शिक्षकहरुलाई सिकाइ क्रियाकलापको अनुगमन र निरीक्षणसहित विद्यार्थीलाई मार्ग निर्देशन गर्न उनले आग्रह गरे । ८३ दिनको लकडाउनपछि सोमबार विद्यालय प्रशासन खोल्ने र शिक्षकहरु विद्यालय जाने निर्णय सरकारले गरेको छ । ३ हजार २ सय विद्यालयमा क्वारेन्टाइन निर्माण भएको छ ।

प्रकाशित : असार १, २०७७ ११:४३
प्रतिक्रिया
पठाउनुहोस्

वीरगन्जमा वडाध्यक्षकै निर्देशनमा एक परिवारलाई समाजबाट बहिष्कार

भूषण यादव

वीरगन्ज — वीरगन्ज महानगर–२१ परवानीपुरमा वडाध्यक्षकै संलग्नतामा एक परिवारलाई समाजबाट बहिष्कार गरिएको छ । उक्त परिवारले कोरोनाका बेला मस्जिदमा धेरै जना भेला नहुन भन्दा आफूहरूलाई समुदायबाट अलग गरिएको आरोप लगाएको छ ।

वडाध्यक्ष हबिब मियाँले आफ्नै समुदायका राजमहमद मियाँको परिवारसँग कुनै लेनदेन र सहयोग नगर्न टोलबासीलाई उर्दी गरेका हुन् । आइतबार परवानीपुर मस्जिदछेउ स्थानीयसहितको बैठक डाकी उनले राजमहमदको परिवारलाई साथ दिने र सहयोग गर्नेलाई पनि त्यही कारबाही गर्ने निर्णय गराएका छन् ।

जेठ १२ गते इदका दिन राजमहमद, उनका छोरा र श्रीमतीले मस्जिदका इमाम मौलानालाई गालीगलौज तथा हातपात गरेको वडाध्यक्षको आरोप छ । इदपछि पनि त्यस्तै व्यवहार दोहोर्‍याएपछि आइतबार भेला बसी समाजबाट अलगथलग गर्ने निर्णय भएको भेलाको माइन्युटमा उल्लेख छ ।

राजमहमदले भने कोरोना महामारीका कारण इदका दिन मस्जिदमा ५ जनाभन्दा बढी भेला भई नमाज नपढ्न सरकारले गरेको आह्वानविपरीत वडाध्यक्षलगायत करिब ५० जना व्यक्ति भेला भएकाले विरोध गरेको बताएका छन् । ‘इदका दिन वडाध्यक्ष हबिब मियाँ र खुस महमद मियाँले हामी मस्जिदको कोषाध्यक्ष र जमाती अमिर हौँ, हामीलाई तिमीले सिकाउन पर्दैन, हामीलाई जे मन लाग्छ त्यही गर्छौं भनेपछि विरोध गरेका हौँ,’ उनले भने, ‘विरोधपछि मस्जिदबाट सबै जना निस्केर वडाध्यक्षको घरअगाडिको खाली जग्गामा नमाज पढेका थिए ।’

त्यही रिसइबीमा आफ्नो परिवारलाई जात–समुदायबाट अलग गरी गाउँकालाई आफ्नो परिवारसँग कुनै लेनदेन, खानपिन र व्यवहार नगर्न उर्दी गरिएको उनको भनाइ छ । ‘कोरोना नफैलोस् भनेर मैले सामाजिक कुरा नै गरेको हुँ,’ कान्तिपुरसँग उनले भने, ‘तर, मलाई नै समाजबाट निकाल्ने निर्णय गरे ।’

उनले आफूहरूलाई दुर्व्यवहार गरेकाले वडाध्यक्ष, जमातीका अमिरलगायत १६ जनामाथि कारबाहीको मागसमेत गरे । ‘कुनै जात समूह वा वर्णको हिसाबले कसैले कसैलाई छुवाछुत वा भेदभाव गरी जातबाट निकाला गर्न हुँदैन भन्ने कानुनी व्यवस्था छ,’ उनले भने, ‘अहिले त्यो पुरानो जमाना छैन ।’

प्रकाशित : असार १, २०७७ ११:२८
पूरा पढ्नुहोस्
प्रतिक्रिया
पठाउनुहोस्
×