संविधान संशोधनमा सबै दलबीच सहमति जुटाउन संसदको आग्रह- समाचार - कान्तिपुर समाचार

संविधान संशोधनमा सबै दलबीच सहमति जुटाउन संसदको आग्रह

जयसिंह महरा

काठमाडौँ — संविधान संशोधन विधेयकमा सबै राजनीतिक दलहरूबीच सहमतिको वातावरण बनाउन संघीय संसद प्रतिनिधिसभाको कार्यव्यवस्था समितिले सरकारलाई आग्रह गरेको छ ।

आइतबार बसेको प्रतिनिसभा कार्यव्यवस्था परामर्श समितिको बैठकले निशान छाप संशोधन गर्नका लागि संसदमा दर्ता भएको नेपालको संविधान (दोस्रो संशोधन) संविधान संशोधन, २०७७ विधेयकमा सबै दलहरूबीच सहमति जुटाउन आग्रह गरेको हो ।

प्रमुख प्रतिपक्षी कांग्रेसका प्रमुख सचेतक बालकृष्ण खाँणले भने, 'सरकारले संविधान संशोधन विधेयक ल्याएको छ । त्यसमा सबै दलहरूबीच पास गर्ने बेलासम्म सहमति जुटाउन सरकारलाई आग्रह गर्ने सहमति भयो ।' संविधान संशोधन विधेयक परिपक्‍व हुनका लागि ७ दिन लाग्‍ने कानुनी व्यवस्थाअनुसार सरकारले पहलकदमी लिएर यो बीचमा सबै राजनीतिक दलबीच सहमति जुटाउनुपर्ने विषयमा छलफल भएको खाँणले बताए ।

बैठकमा राजपाका नेता लक्ष्मणलाल कर्णले मधेसी दलहरूले विगतदेखि नै संविधान संशोधनको माग उठाउँदै आएकाले तिनलाई सम्बोधन गर्नुपर्ने माग राखेका थिए ।

सभामुख अग्नि सापकोटाले राष्ट्रियताको विषयमा एकमत भएर अगाडि बढ्नुपर्ने भएकाले सर्वदलीय बैठकका लागि आफूले पहल गर्ने बताएका थिए । 'अहिलेको राष्ट्रिय आवश्यकता सहमति हो । राष्ट्रिय आवाज लगेर जानुपर्छ । हामीबीच सुदृढ एकता भएर जानुपर्छ,' उनले बैठकमा भनेका थिए ।

बैठकले सांसदहरूले लगाउने लोगो रोष्ट्रममा भएको प्रतीक चिन्हलाई अद्यावधिक नक्साअनुसार परिमार्जन गर्ने निर्णय भएको छ ।

सरकारले भारतीय अतिक्रमणमा परेका कालापानी, लिपुलेक र लिम्पियाधुरा समेटेर नक्सा सार्वजनिक गरेको थियाे । साेहीअनुसार निसान छाप परिमार्जन गर्ने संविधान संशोधन विधेयक दर्ता गरिएको छ ।

प्रकाशित : जेष्ठ ११, २०७७ १४:४४
प्रतिक्रिया
पठाउनुहोस्

आइसोलेसनको ढोका फोडेर संक्रमित फरार

अजित तिवारी

जनकपुर — प्रादेशिक अस्पताल जनकपुरको आइसोलेसन वार्डमा उपचाररत सर्लाहीका एक कोरोना संक्रमित शनिबार राति ढोका फोडेर भागेका छन् ।

वैशाख २९ गते संक्रमण पुष्टि भएपछि उनलाई जनकपुरको आइसोलोसन वार्डमा राखेर उपचार भइरहेको थियो । जिल्ला प्रहरी कार्यालय, धनुषाका प्रमुख एसपी रमेश बस्नेतले शनिबार राति आइसोलेसन वार्डको तेस्रो तलाको ढोका फोडेर संक्रमित फरार भएको जानकारी दिए । उनका अनुसार ती व्यक्ति सुस्त मनस्थितिका छन् ।

‘सुस्त मनस्थितिका भएकाले आइसोलेसनमा आएदेखि उपद्रो मच्चाइरहेका थिए,’ बस्नेतले भने, ‘तीन दिनअघि सीसी क्यामेरा फुटाइदिए । अहिले फरार नै भए ।’ उनको खोजीमा धनुषा र सर्लाहीबाट प्रहरी खटाइएको छ । ‘पीपीई लगाएका प्रहरी उनको खोजीमा खटिएका छन्,’ बस्नेतले भने, ‘शनिबार राति नै फरार भए पनि प्रहरीलाई आइतबार बिहान मात्र जानकारी दिइयो । फरार भएको हो कि भगाइयो, दुवै कोणले अनुसन्धान भइरहेको छ ।’

प्रादेशिक अस्पतालको आइसोलेसनमा तीन दिनयता संक्रमितको संख्या बढेको छ । अहिले ३० जना उपचाररत छन् ।

फरार संक्रमितलाई मानसिक रोगको औषधि चलाइएको थियो । ‘मानसिक स्थिति ठीक नभएकाले आइसोलेसनमै दिनदिनै होहल्ला र उपद्रो गरिरहेका थिए,’ प्रादेशिक अस्पतालका मेसु नागेन्द्र यादवले भने, ‘चार दिनअघि झ्याल फोडेर त्यहीँबाट पिसाब फेरिदिए ।’ उनका ती संक्रमितको दोस्रो पटक स्वाब परीक्षण भइसकेको छ ।

सर्लाहीका एसपी विश्वमणि पोखरेलले जनकपुरको आइसोलेसनबाट फरार भएकाको खोजी त्यहाँ पनि भइरहेको बताए । ‘हिँडेरै आउने होला । उसको गाउँ र नाकाहरूमा प्रहरी खटाइएको छ,’ उनले भने, ‘राजमार्गका प्रहरीलाई पनि चनाखो राखिएको छ ।’

प्रकाशित : जेष्ठ ११, २०७७ १३:५३
पूरा पढ्नुहोस्
प्रतिक्रिया
पठाउनुहोस्
×