नेविसंघका अध्यक्षसहित सयभन्दा बढी पक्राउ- समाचार - कान्तिपुर समाचार
कान्तिपुर वेबसाईट
AdvertisementAdvertisement

नेविसंघका अध्यक्षसहित सयभन्दा बढी पक्राउ

कान्तिपुर संवाददाता

काठमाडौँ — नेपाली भूमि फिर्ताको माग राख्दै माइतीघर मण्डलामा प्रदर्शन गर्ने क्रममा नेविसंघका अध्यक्ष राजीव ढुंगानासहित सयभन्दा बढी पक्राउ परेका छन् ।

नेविसंघको आयोजनामा सोमबार मण्डलामा विद्यार्थीहरुले प्रदर्शन गरेका थिए । लकडाउनबीच प्रदर्शनमा उत्रिएका नेविसंघ अध्यक्ष राजीव ढुंगाना, महमन्त्रीहरु बलदेव तिमल्सिना, उर्मिला थपलिया, युवराज पाण्डे, दिपक भटराई, प्रभात दाहालसहित नेता, कार्यकर्ता पक्राउ परेका हुन् । उनीहरुलाई महेन्द्र पुलिस क्लबमा राखिएको छ ।

भारतले दार्चुलाको लिपुलेक हुँदै तिब्बतको मानसरोवर जोड्ने सडक बनाएको विरोधमा काठमाडौंलगायत देशका विभिन्न ठाउँमा विरोध प्रदर्शन भइरहेको छ ।










प्रकाशित : वैशाख २९, २०७७ १७:४५
प्रतिक्रिया
पठाउनुहोस्

सुदूरमा ओपीडी सेवा सञ्चालनको तयारी

अर्जुन शाह

धनगढी — कोरोना भाइरसबाट संक्रमित बिरामीहरु देखिन थालेपछि बहिरंग सेवा (ओपीडी) बन्द गरेका सुदूरपश्चिमका सरकारी अस्पतालहरुले ओपीडी सेवा सुचारु गर्ने तयारी गरेका छन् ।

सबै संक्रमितहरु उपचारपछि निको भएर घर फर्किएका र नयाँ संक्रमितसमेत नदेखिएपछि अस्पतालहरुले सेवा पुनःसञ्चालनको तयारी गरेका हुन् ।

सुदूरपश्चिम स्वास्थ्य निर्देशनालयले यस प्रदेशमा सञ्चालनमा रहेका सबै अस्पतालहरुलाई ओपीडी सेवा सुचारु गर्न निर्देशन गरेपछि सरकारी अस्पतालहरुले सेवा सुचारु गर्ने निर्णय गरेका हुन् ।

ओपीडी सेवा बन्द भएपछि दैनिक ६ सय बिरामीको जाँच तथा उपचार हुँदै आएको धनगढीस्थित सुविधा सम्पन्‍न सेती प्रादेशिक अस्पताल विगतका तुलनामा सुनसान जस्तै छ । सुदूरपश्चिमको रेफरल सेन्टरका रुपमा रहेको यस अस्पताललाई प्रदेश सरकारले कोरोना उपचारका लागि डेडिकेटेड अस्पतालका रुपमा तोकेको थियो ।

त्यससँगै यहाँ देखिएका संक्रमितहरुलाई यसै अस्पतालमा भर्ना गरेर उपचार गर्न थालेपछि अन्य सेवाहरु प्रभावित भएका थिए । ओपीडी सेवा बन्द गरेपछि यस अवधिमा अस्अस्पतालले आकस्मिक उपचार गर्नुपर्ने र सुत्केरी सेवा लिन आउनेहरुबाहेकका बिरामीहरु अस्पताल आउन छाडेका थिए ।

अस्पतालका सूचना अधिकारी दिलिप श्रेष्ठका अनुसार विगतमा बहिरंगमा दैनिक साढे ३ सय र आकस्मिकमा अढाई सय बिरामी आउने गरेका थिए । यस अस्पताललाई कोरोना उपचार केन्द्र बनाएदेखि बहिरंग सेवा बन्द गरिएको छ । आकस्मिक कक्षमा आउने बिरामीको संख्या पनि न्यून रहेको श्रेष्ठले बताए । उनले भने, ‘सर्वसाधारणमा त्रास पनि भयो । त्यसैमा लकडाउनका कारणले पनि हुन सक्ला ।’

‘मंगलबारदेखि ओपिडी सेवा सुचारु गर्ने तयारी गर्दैछौं,’ सेती प्रादेशिक अस्पतालका मेडिकल सुपरिटेन्डेन्ट डा. हेमराज पाण्डेले भने, ‘कोरोनाको त्रास कायमै रहेकाले आवश्यक सतर्कता र व्यवस्थापन मिलाउने तयारीमा कर्मचारीहरु खटिरहेका छन् ।’

सेती प्रादेशिक अस्पताललाई नै कोरोना उपचार केन्द्र तोकिएपछि यस क्षेत्रमा देखिएका ५ जना संक्रमितहरुको उपचार यही भएको हो । चार जना बिरामीहरु छोटै समयमा निको भएर फर्किएका भएपनि पाँचौ बिरामी महिला भने गत सातामात्रै डिस्चार्ज भएकी हुन् । उनी निको भएसँगै सुदूरपश्चिम हाललाई कोरोना संक्रमित बिरामी नरहेको प्रदेश भएको हो ।

नयाँ संक्रमित नदेखिएको अवस्थामा ओपीडी सुचारु गर्न निर्देशन दिइएको स्वास्थ्य निर्देशक डा. गुणराज अवस्थाले बताए । ‘लामो समयसम्म ओपीडी सेवा बन्द भएकाले सर्वसाधारण बिरामी उपचारबाट वञ्चित भएको परिस्थिती र हाललाई कोरोनाका नयाँ बिरामी पनि नदेखिएकाले ओपीडी पुनः सञ्चालन गर्न निर्देशन दिएका हौं,’ डा. अवस्थीले भने, ‘अस्पतालहरुलाई आवश्यक सतर्कता अपनाएर मात्रै सेवा प्रवाह गर्न भनेका छौं ।’

निर्देशनालयले संघीय मन्त्रालय अन्तर्गत सञ्चालित, प्रदेश सरकार मातहत सञ्चालित, स्थानीय तह अन्तर्गत सञ्चालित स्वास्थ्य संस्था र अस्पताल तथा निजी र गैरसरकारी क्षेत्रबाट सञ्चालित अस्पतालहरुलाई आइतबार ओपीडी सेवा सञ्चालन गर्न लिखित निर्देशन गरेको हो । यस बीचमा सुरुका दिनमा धनगढीमा सञ्चालित १० वटा निजी क्षेत्रका अस्पतालहरुलेसमेत ओपीडी सेवा बन्द गरेका थिए ।

निर्देशनालयद्वारा ओपीडी सेवा सुचारु गर्न निर्देशन दिइएपछि जिल्ला अस्पतालहरुलेसमेत सेवा सुचारु गर्ने तयारी गरेका छन् । बझाङ जिल्ला स्वास्थ्य कार्यालयका जनस्वास्थ्य अधिकृत भानुभक्त जोशीका अनुसार बझाङ अस्पतालले सोमबारदेखि सेवा सुरु गरेको बताए ।

जिल्ला अस्पताल बाजुराले सोमबारदेखि ओपीडि सेवा पूर्ववत रुपमा सुचारु गरेको अस्पतालका प्रमुख डा. रुपचन्द्र विश्वकर्माले बताए । डोटीका अस्पतालहरुले यसअघि नै सेवा सुरु गरिसकेको जिल्ला स्वास्थ्य प्रमुख रमेश मलासीले बताए ।

प्रकाशित : वैशाख २९, २०७७ १७:३५
पूरा पढ्नुहोस्
प्रतिक्रिया
पठाउनुहोस्
×