चितुवा घुम्न थालेपछि कीर्तिपुरमा त्रास- समाचार - कान्तिपुर समाचार

चितुवा घुम्न थालेपछि कीर्तिपुरमा त्रास

मातृका दाहाल

काठमाडौँ — कीर्तिपुरमा घरछेउमै चितुवा देखिन थालेपछि स्थानीय त्रासमा छन् । त्रिभुवन विश्वविद्यालय परिसर, चोभार, बाहिरी सडक, पाँगा, ट्याङलाफाँट क्षेत्रका झाडीमा चितुवा देखिएका हुन् ।

फाइल फोटो : शेरबहादुर सिंह/रासस


विश्वविद्यालय परिसरमा चितुवा देखेपछि स्थानीयले काठमाडौं वन सब डिभिजन कार्यालय थानकोटलाई खबर गरेका थिए । सहायक वन अधिकृत हरिप्रसाद खरेलले स्थानीयलाई आवतजावतमा सतर्कता अपनाउन आग्रह गरिएको बताए । शुक्रबारबाट त्यस क्षेत्रमा ४ वटा चितुवा आएको जानकारी पाएपछि वन कर्मचारी सोमबार कीर्तिपुर पुगेका थिए ।

सहायक वन अधिकृत खरेलले जंगलमा मानव अतिक्रमण बढेपछि आहार र वासस्थान खोज्दै चितुवा बस्ती पसेको बताए । सोमबार वन, नगरपालिका, सुरक्षाकर्मी र स्थानीयसहित छलफल बसेको थियो । छलफलमा बस्तीवरपर झाडी फँडानी गरेर खुला बनाउन सुझाव दिइएको र यसका लागि नगरपालिकाले पहल थाल्ने निर्णय भएको खरेलले जानकारी दिए ।

चितुवा भेटिन थालेसँगै स्थानीय बासिन्दा बिहान–बेलुका हिँडडुल गर्न छाडेका छन् । स्थानीय वीरेन्द्र शाक्यका अनुसार अत्यावश्यक काममा निस्कन समस्या भएको छ । केही दिनयता सडकमा कुकुरसमेत देखिन छाडेका छन् । चितुवाले आहाराका लागि कुकुर मारेको हुन सक्ने वन अधिकृत खरेलले बताए ।

यसअघि टीकाथली, थानकोट, टोखा, बानेश्वरलगायतका बस्तीमा पनि चितुवा देखिएको थियो । महानगरीय प्रहरी कार्यालयका डीआईजी विश्वराज पोखरेलले चितुवा सडकमा देखिनेबित्तिकै सुरक्षाकर्मीलाई खबर गर्न आग्रह गरिएको बताए ।

प्रकाशित : वैशाख २३, २०७७ ११:३४
प्रतिक्रिया
पठाउनुहोस्

प्रहरीको गाडीमा ढुंगामुढा भएपछि नेपालगन्जमा तनाव

मधु शाही, रुपा गहतराज

नेपालगन्ज — निषेधाज्ञा जारी गरिएको नेपालगञ्जमा स्थानीयले प्रहरीमाथि ढुंगामुढा गरेका छन् । त्रिवेणी चोकका एक युवालाई प्रहरीले पक्राउ गरेपछि बिहान साढे १० बजे प्रहरी र स्थानीयबीच झडप भएको हो । 

निषेधाज्ञाका बीच प्रहरीले बिहान ११ बजेसम्म अत्यावश्यक सामाग्री किन्नका लागि बजार खुला गरेको थियो । रानीतलाउ क्षेत्रमा रहेको तरकारी बजारमा तरकारी किन्नेको भीड बढेपछि प्रहरीले हटाउन खोज्दा विवाद उत्पन्न भएको थियो । विवाद गरेको भन्दै प्रहरीले त्रिवेणी चोकका एक युवालाई त्यहाँबाट पक्राउ गरेको र त्यसको विरोधमा निषेधाज्ञाबारे माइकिङ गर्दै हिँडेको प्रहरीको गाडीमा स्थानीयले ढुंगामुढा गरेको एसपी वीरबहादुर ओलीले बताए ।

तोडफोड गरिएको वडा प्रहरीको गाडी । तस्बिर : रुपा गहतराज/कान्तिपुर

‘माइकिङ गर्दै हिँडेको प्रशासनका कर्मचारी र प्रहरीलाई घेराउ गरेपछि केहीबेर तनाव पैदा भएको थियो । अहिले स्थिति नियन्त्रणमा आइसकेको छ,’ वलीले भने ।

स्थानीयले भने प्रशासनले पसल खोल्नु भनेको समयसमा खोल्दा पनि प्रहीले कुटपिट गरेको बताएका छन् ।


प्रकाशित : वैशाख २३, २०७७ ११:२५
पूरा पढ्नुहोस्
प्रतिक्रिया
पठाउनुहोस्
×