कोभिड–१९ संक्रमित सबैको मुख्य लक्षण सुक्खा खोकी, चारै जनाको अवस्था ‘सामान्य’

अतुल मिश्र

काठमाडौँ — हालसम्म कोरोना भाइरस (कोभिड–१९) संक्रमण देखिएका पाँचै जना बिरामीमा मुख्य लक्षण सुक्खाखोकी देखिएको छ । यसपछि कसैलाई ज्वरो र अलिअलि श्वासप्रश्वासमा समस्या देखिएको थियो । हालसम्म उनीहरूलाई निमोनिया देखिएको छैन ।

चीनको वुहानबाट फर्किएका ३२ वर्षीय विद्यार्थीमा माघ ९ गते परीक्षणपछि पहिलोपटक कोरोना संक्रमण भेटिएको थियो । त्यसपछि एक सातायता चार जना संक्रमित फेला परेका हुन् ।


‘पाँचै जना संक्रमितको मुख्य लक्षण सुक्खा खोकी हो,’ इपिडिमियोलोजी तथा रोग नियन्त्रण महाशाखाका निर्देशक एवं भाइरोलोजिस्ट डा.वासुदेव पाण्डेले भने, ‘त्यसपछि कसैलाई ज्वरोसमेत देखियो भने कसैलाई साँझपख श्वासप्रश्वासमा समस्या देखिएको छ । स्वास्थ्य स्थिति भने सबैको सामान्य छ ।’


पाँचै जना १९ देखि ३४ वर्ष उमेर समूहका युवा हुन् । र, सबै विदेशबाट फर्किएका हुन् । यसअघि बेलायतमा दुई नेपालीको कोभिड–१९ ले मृत्यु भएकोमा एक जना ६६ वर्षका भुपू गोर्खा सैनिक थिए, अर्का ४० वर्षका व्यक्तिलाई उच्च रक्तचापको समस्या थियो ।


‘अझैसम्म नेपालमा संक्रमण भेटिएकामध्ये कसैलाई पनि निमोनिया देखिएको छैन,’ डा.पाण्डेले भने, ‘संक्रमणपछिको मुख्य स्वास्थ्य जटिलता निमोनिया हुने गरेकाले हरेक प्रभावितको फोक्सोको जाँचमा विशेष ध्यान दिइएको छ ।’


‘अझै तीन जना हामी कहाँ छन्, क्लिनिकल्ली उनीहरू राम्रो अवस्थामा छन्, कसैलाई ज्वरो आउने, कसैलाई नआउने तर सबै सुक्खा खोकीले सताइएका हुन्,’ शुक्रराज ट्रोपिकल तथा सरुवा रोग अस्पतालका कोरोना संक्रमित बिरामीको उपचार मा संलग्न एक चिकित्सकले भने, ‘साँझपख श्वासप्रश्वासमा समस्या छ तर स्थिति राम्रो छ ।’


बुटवलस्थित कोरोना अस्थायी अस्पतालको आइसोलेसनमा उपचाररत दुबईबाट फर्किएका एक ३४ वर्षीय पुरुषको आइतबार दिउँसो १२ बजे मृत्यु भएपछि चिकित्सकहरू थप चनाखो बनेका छन् । ज्वरो र खोकी सुरु भएपछि घरबाट आएर अस्पताल भर्ना भएका ती व्यक्तिको घाँटीको र्‍यालको नमूना आइतबारै काठमाडौं ल्याइसकिएको छ ।


‘हामी ती व्यक्तिलाई भएका अन्य जटिल रोगबारे हिस्ट्री पनि संकलन गरिरहेका छौं’, डा.पाण्डेले भने, ‘र्‍यालको नमुनाको प्रयोगशाला परीक्षण परिणाम आएपछि कोभिड–१९ संक्रमण भए/नभएकोबारे थप स्पष्ट हुन सक्छ ।’


विश्व स्वास्थ्य संगठन (डब्लुएचओ) ले कोभिड–१९ को मुख्य लक्षण ज्वरो, थकाइ र सुक्खा खोकी रहेको जनाएको छ । यसका करिब ८० प्रतिशत बिरामी कुनै विशेष उपचारबिना आफैं निको हुन्छन् । संक्रमण भएका ६ जनामध्ये एक जना गम्भीर रुपमा बिरामी पर्छन् । उनीहरुलाई श्वासप्रश्वासमा समस्या हुन्छ ।


डव्लुएचओका अनुसार बुढापाका, उच्च रक्तचाप, मुटुको समस्या, मधुमेहलगायतका चिकित्सकीय समस्या भएकालाई कोभिड–१९ संक्रमणपछि गम्भीर रुपमा बिरामी हुने बढी सम्भावना हुन्छ । ज्वरो भएका, खोकी र सास फेर्न समस्या भएकाहरूलाई चिकित्सकीय स्याहार आवश्यक हुन्छ ।

प्रकाशित : चैत्र १६, २०७६ १९:२९
ADVERTISEMENT
प्रतिक्रिया
पठाउनुहोस्
ADVERTISEMENT

रौतहटमा अनिश्चित कालका लागि निषेधाज्ञा जारी

शिव पुरी

रौतहट — लकडाउनको समयमा पनि बजार तथा चोकमा मानिसहरुको भीड बढ्न थालेपछि रौतहट प्रशासनले आइतबारबाट जिल्लाभर निषेधाज्ञा जारी गरेको छ । स्थानीयहरु दिनभर घर बसे पनि साँझपख भने लकडाउनको पालना नगरेको पाइएकोले यस्तो कदम चालिएको प्रमुख जिल्ला अधिकारी बासुदेव घिमिरेले बताए । 



गौरस्थित प्रशासन कार्यालयमाआइतबार बसेको जिल्ला सुरक्षा समितिको बैठकले निषेधाज्ञा जारी गर्ने निर्णय गरेको हो । विश्वव्यापी महामारीको रुपमा फैलिरहेको कोभिड–१९ को सम्भावित संक्रमण रोकथाम, नियन्त्रणमा स्थानीय प्रशासन ऐन २०२८ को दफा ६ को उपदफा (३) बमोजिम प्रमुख जिल्ला अधिकारीलाई प्राप्त अधिकार प्रयोग गर्दै निषेधाज्ञा जारी गरिएको प्रशासन कार्यालयले जनाएको छ ।

आइतबारबाट अर्को आदेश नभएसम्मको लागि निषेधाज्ञा कायम रहने घिमिरेले स्पष्ट पारे । ‘आदेशको अवहेलनारबर्खिलाप हुने काम कसैले गरेको पाइए प्रचलित कानून बमोजिम कारबाही हुन्छ,’उनलेभने,‘यस्तो महामारीबाट जोगिन मानिसहरु घरभित्र बस्न उपयुक्त हुन्छ । अब बाहिर निस्केको भेट्टिए कारबाही हुन्छ ।’ अत्यावश्यक उपभोग्य सामग्री र औषधि उपचारबाहेकका लागि सार्वजनिक स्थानमा निस्कन, भेला हुन तथा आवतजावत गर्न निषेध गरिएको छ ।

साँझको समयमा खाद्यान्न तथा तरकारी लिने बहानामा धेरै मानिस सहर, बजारमा देखिन थालेपछि सोको नियन्त्रणका लागि यस्तो कदम चालिएको उनको भनाइ छ । सुरक्षाकर्मीको प्रयासका बावजुद पनि भिडभाड, आवतजावत नियन्त्रण हुन नसकेमा कोरोना भाइरस रोकथाम गर्न गरिएका सबै पूर्वतयारी प्रभावहीन हुने देखिएकोले निषेधाज्ञा जारी गर्नुपरेको प्रजिअ घिमिरेले बताए ।

खाद्यान्न र उपभोग्य सामग्री ढुवानीका सवारीसाधन, एम्बुलेन्स, स्वास्थ्यकर्मी, औषधि पसल, प्रशासनबाट पास लिएका व्यक्ति वा सवारीसाधनबाहेक अन्य सवारी, व्यक्ति तथा पसल पूर्णरुपमा बन्द गर्न भनिएको छ । कुनै सवारी, व्यक्ति वा समूहले यसको उल्लंघन गरेमा त्यस्तालाई नियन्त्रणमा लिई स्थानीय प्रशासन ऐन २०२८ तथा संक्रमण रोग ऐन २०२० बमोजिम आवश्यक न्यूनतम बल प्रयोग गर्ने लगायत अन्य कारवाही गर्ने निर्णय भएको छ ।

प्रकाशित : चैत्र १६, २०७६ १९:२०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
×