गड्डा चौकी नाकामा मंगलबारदेखि आवागमन बन्द, अत्यावश्यकबाहेक घरबाहिर ननिस्कन आग्रह

अत्यावश्यक सामाग्रीबाहेकका सबै पसल-उद्योगधन्दा आइतबार रातिबाट बन्द
भवानी भट्ट

कञ्चनपुर — भारतसँग आवागमनका लागि हाल खुला रहेका ४ वटा नाकामध्ये कञ्चनपुरको गड्डाचौकी नाकामा मंगलबारदेखि आवागमन बन्द हुने भएको छ । 

आइतबार जिल्लास्तरीय कोरोना संक्रमण जोखिम न्यूनीकरण उपसमिति बैठकले मंगलबार बिहानदेखि अर्को सूचना जारी नहुँदासम्मका लागि नाकामा आवागमन बन्द गर्ने निर्णय गरेको हो । ‘केही दिनयता घर फर्किनको चाप बढेसँगै यसले जोखिमसमेत त्यत्तिकै बढाएको छ,’ कञ्चनपुरका प्रमुख जिल्ला अधिकारी नुरहरि खतिवडाले भने, ‘हामीले आवागमन बन्द गर्नुपर्छ भन्ने महसुस गरेरै यस्तो निर्णय गरेका हौं ।’


उनले आइतबार राति १२ बजेदेखि अर्को सूचना नभएसम्म अत्यावश्यक सामग्री बाहेकका पसल, उद्योग धन्दालगायत सम्पूर्ण बजार बन्द रहने निर्णय भएको बताए । बैठकले सीमा नाकामा रहेका मदिरा पसल तत्काल बन्द गर्ने, आकस्मिक उपचारबाहेक अन्य कामका लागि अर्को सूचना नभएसम्म घर बाहिर ननिस्कनसमेत आव्हृान गरेको छ । अटेरी गरि बाहिर निस्कनेलाई कानुनबमोजिम कारबाही गरिने प्रजिअ खतिवडाले बताए ।


यसैगरी, बजार अनुगमनलाई तीव्रता दिनुका साथै कालोबजारी गर्नेलाई कडा कारबाही गर्ने निर्णय गरिएको छ ।

प्रकाशित : चैत्र ९, २०७६ १८:१३
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

११ हजार मास्क र ४ सय स्यानीटाइजर बरामद

देवनारायण साह

(मोरङ) — विराटनगर महानगरपालिका ९ बाट ११ हजार थान भन्दा बढी सर्जिकल मास्क र स्यानीटाइजर बरामद गरिएको छ । विराटनगर महानगरपालिका, औषधि व्यवस्था विभाग र प्रहरीको संयुक्त अनुगमन टोलीले सर्जीइम्पेक्सले लुकाइराखेको मास्क र ४ सय बढी स्यानीटाइजर बरामद गरेको हो ।

कालोबजारी भइरहेको सरोकारवालाहरुको गुनासोपछि अनुगमनमा पुगेको टोलीले उक्त परिमाणमा मास्क र स्यानीटाइजर बरामद गरेको प्रहरी उपरीक्षक विश्व अधिकारीले बताए । अनुगमन टोलीले सर्जिकल सामान र औषधिको थोक बिक्रेता रहेको सर्जीइम्पेक्सको गोदाममा राखेको ११ हजार थान मास्क बरामद गरेको औषधि व्यवस्था विभागका निमित्त प्रमुख सञ्‍जीव शर्मा कट्टेलले बताए । ‘कोरोना भाइरसको जोखिमबाट बच्न सर्वसाधारणले प्रयोग गर्ने मास्क र स्यानीटाइजरलाई अत्यावश्यक वस्तुसरह लिइएको छ,’ उनले भने, ‘तर थोक विक्रेताहरुले प्रकोपको बेलालाई समेत कमाउ धन्दाका रुपमा प्रयोग गर्न खोजेको सूचना आएपछि अनुगमन गरिएको र त्यो सत्य भएको प्रमाणित भयो ।’

राजेश अग्रवाल सञ्चालक रहेको सर्जीइम्पेक्सबाट बरामद स्यानीटाइजरमा एमआरपी मूल्यसमेत नखुलेको अवस्थामा भेटिएको हो । थप अनुसन्धान भइरहेको प्रहरी उपरीक्षक अधिकारीले बताए ।

प्रकाशित : चैत्र ९, २०७६ १८:००
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×