कोरोनाविरुद्ध चिनियाँ मोडलको तयारी भइरहेको छ : मन्त्री भट्ट 

जयसिंह महरा

काठमाडौँ — कोरोना भाइरस (कोभिड- १९) विरुद्ध सरकारले चिनियाँ मोडलमा तयारी थालेको उद्योग, वाणिज्य तथा आपूर्तिमन्त्री लेखराज भट्टले बताएका छन् । कोरोना संक्रमण नेपाल प्रवेश गरेमा कसरी रोक्ने भन्नेबारे चीन सरकारसँग सहकार्य भइरहेको पनि उनले जानकारी दिएका छन् । 


संघीय संसद्‍का दुवै सदनको संयुक्त समिति राज्यका निर्देशक सिद्धान्त, नीति र दायित्वको कार्यान्वयन, अनुगमन तथा मूल्यांकन समितिको आइतबार बसेको बैठकमा मन्त्री भट्टले भने, 'कोरोनाविरुद्ध नयाँ मोडलमा जाने तयारी भएको छ । चिनियाँहरूको मोडलमा जाने भन्ने तयारी गरिरहेका छौं ।'


सुरक्षाकर्मीका अस्पताललाई ठूलो मात्रामा उपचार गर्ने क्षमताका रूपमा अभिवृद्धि गर्न लागिएको मन्त्री भट्टले जानकारी दिए । उनले भने, 'मुख्यरूपमा सशस्त्र प्रहरीको अस्पताललाई जिम्मेवारी दिएर अगाडि बढिएको छ । सेनाले आन्तरिक तयारी पूरा गरेको छ र प्रदेशहरूमा पनि सुरक्षाकर्मीका अस्पताललाई र सुरक्षा केन्द्रमा अस्पताल बनाउने तयारी भएको छ ।' चीनमा सुरक्षा निकायलाई कोरोनाविरुद्ध उपचारमा संलग्न गराइएको उनले उल्लेख गरे ।


मन्त्री भट्टले कोरोनाको उपचारमा संलग्न हुने चिकित्सकहरूलाई चिनियाँ चिकित्सकले प्रशिक्षण दिने कार्यक्रम रहेको जानकारी दिए । यताबाट चीन लगेर प्रशिक्षण दिनुभन्दा पनि अस्पतालमा भिडियो कन्फेरेन्स गर्ने र चीनबाट प्रशिक्षक मगाउने तयारी भएको उनले बताए ।


चीनबाट कोरोनाको उपचारमा प्रयोग हुने औषधि र स्वास्थ्य उपकरण ल्याउने तयारी अन्तिम चरणमा पुगेको पनि मन्त्री भट्टले जानकारी दिए ।

प्रकाशित : चैत्र ९, २०७६ १६:१२
ADVERTISEMENT
प्रतिक्रिया
पठाउनुहोस्
ADVERTISEMENT

धरानमा कोरोना परीक्षणका लागि भाइरल सेफ्टी क्याबिन जडान

प्रदीप मेन्याङ्बो

सुनसरी — बीपी कोइराला स्वास्थ्य विज्ञान प्रतिष्ठानमा कोभिड–१९ (कोरोना भाइरस) संक्रमण पहिचान र परीक्षण गर्नका लागि प्रयोगशाला स्थापना गरिएको छ ।

सरकारले रिएजेन्ट, किट, रसायन, भाइरल ट्रान्सपोर्ट मेडियम (भिटिएम), व्यक्तिगत सुरक्षा सामाग्री (पीपीपी) पठाइदिए जुनसुकै बेला पनि कोरोना परीक्षण गर्न सकिने प्रतिष्ठानले जनाएको छ ।

कोरोना परीक्षणका लागि प्रतिष्ठानसँग एउटामात्र भाइरल सेफ्टी क्याबिन रहेकोमा सरकारले पठाएको नयाँ क्याबिन आइतबार प्रतिष्ठानको माइक्रोबायोलोजी विभागको प्रयोगशालामा जडान गरिएको हो । प्रतिष्ठानका अस्पताल निर्देशक एवं र्‍यापिड रेस्पोन्स कमिटिका संयोजक प्रा. डा गौरिशंकर साहले प्रतिष्ठानसँग कोरोना परीक्षणका लागि भौतिक पूर्वाधार र दक्ष जनशक्ति भएकाले थप नयाँ भाइरल सेफ्टी क्याबिन जडान गरेको बताए ।

यसैबीच कोरोना संक्रमण फैलिन नदिनका लागि प्रतिष्ठानले तत्काल उपचार नगर्दा थप जोखिम नहुने बिस्तारित स्वास्थ्य सेवालाई आइतबारदेखि आगामी दुई साताका लागि स्थगन गरेको छ । अस्पताल निर्देशक साहका अनुसार कोभिड–१९ को रोकथाम तथा नियन्त्रणको लागि स्वास्थ्य तथा जनसंख्या मन्त्रालयले शनिबार गरेको निर्णयअनुसार प्रतिष्ठानले केही सेवाहरु दुई साताका लागि स्थगित गरेको हो ।

उनका अनुसार तत्कालका लागि सबै प्रकारका पेइङसहितका इन्स्टीच्युसनल प्राक्टिस, स्वास्थ्य बीमा स्थगित गरिएको छ । उनले भने, ‘तत्काल उपचार नगर्दा पनि थप जोखिम नहुने खालका स्वास्थ्य सेवालाई स्थगित गरेर कोरोना संक्रमण रोकथाममा बढी ध्यान दिएको हो ।’

प्रकाशित : चैत्र ९, २०७६ १६:०७
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
×