१८.१२°C काठमाडौं
काठमाडौंमा वायुको गुणस्तर: १२४

मन्त्री त्रिपाठी नआएपछि राज्य व्यवस्था तथा सुशासन समितिको बैठक स्थगित

जयसिंह महरा

काठमाडौँ — संघीय मामिला तथा सामान्य प्रशासन मन्त्री हृदयश त्रिपाठी उपस्थित नभएपछि राज्य व्यवस्था तथा सुशासन समितिको बुधबारको बैठक स्थगित भएको छ । ‘संघीय निजामती सेवाको गठन, सञ्चालन र सेवाका सर्तसम्बन्धमा व्यवस्था’ गर्न बनेको विधेयकका बारेमा छलफलका लागि बुधबार दिउँसो एक बजेका लागि बैठक बोलाइएको थियो । तर महत्वपूर्ण बैठकमा मन्त्री त्रिपाठी अनुपस्थित भएपछि स्थगित गरिएको समितिकी सभापति शशि श्रेष्ठले जानकारी दिइन् । 

मन्त्री त्रिपाठी नआएपछि राज्य व्यवस्था तथा सुशासन समितिको बैठक स्थगित

निजामती कर्मचारीको नियुक्ति र व्यवस्थापन गर्नका लागि प्रस्तुत गरिएको यो विधेयक करिब एक वर्षदेखि छलफलका क्रममा रहेको छ । संघीय मामिला तथा सामान्य प्रशासन मन्त्रीका रुपमा जिम्मेवारी सम्हालेसँगै त्रिपाठीले यसमा आफ्नो विरोध जनाइसकेका छन् । प्रदेशमा मुख्यसचिव र सचिव संघीय लोक सेवा आयोग वा प्रदेश लोक सेवा आयोगले पठाउनेभन्नेबारे तथा स्थानीय तहमा प्रमुख प्रशासकीय अधिकृत कसले पठाउने भन्नेबारेमा उनको मत र विधेयकमा गरिएको व्यवस्था बाझिएको छ । त्यस्तै कर्मचारी युनियनसम्बन्धी व्यवस्थामा पनि त्रिपाठीको फरक मत रहेको छ ।


यसअघिको बैठकमा विधेयक अध्ययनका लागि भन्दै मन्त्री त्रिपाठीले आजसम्मका लागि समय मागेका थिए । तर आजको बैठकमा आफू अस्वस्थ रहेको जानकारी दिँदै मन्त्री त्रिपाठी नआएको सभापति श्रेष्ठले जानकारी दिइन् ।

प्रकाशित : चैत्र ५, २०७६ १३:५१
प्रतिक्रिया
पठाउनुहोस्
जनताको राय

त्रिभुवन विश्वविद्यालयमा बारम्बार परीक्षार्थीको उत्तरपुस्तिका हराउने गरेको छ। यसको समाधान कसरी हुन्छ?