वैदेशिक रोजगारीमा जाने घटे
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/ekantipur900x100-3082024084948.gif)
काठमाडौँ — सोल्टीमोड, तहाचलस्थित वैदेशिक रोजगार कार्यालय परिसरमा भीड दिन प्रतिदिन पातलिँदै छ । कामदार छनोटका लागि पूर्वस्वीकृति लिने काउन्टरमा वैदेशिक रोजगार व्यवसायीका प्रतिनिधि कमै देखिन्छन् । बिदामा आएर फेरि जाने (पुनः स्वीकृति) को लाइनमा पहिलाजस्तो ठेलमठेल छैन । खाडी क्षेत्रमा कोभिड–१९ को संक्रमण देखिएपछि यहाँको वैदेशिक रोजगार कार्यालयमा चहलपहल घटेको हो ।
![](https://assets-cdn.ekantipur.com/uploads/source/ads/ekantipur-1-1282024082932.gif)
![वैदेशिक रोजगारीमा जाने घटे](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2020/third-party/rojgarbivag-2482019013726-1000x0-2322020042941-1000x0.jpg&w=1001&h=0)
![](https://assets-cdn.ekantipur.com/uploads/source/ads/comp-900x100-1672024010950.gif)
रोजगारीका लागि खाडी तथा मलेसियालगायत देशमा जान अनुमति चाहिने सबैले नेपाली युवा त्यहाँ पुग्नैपर्छ । ‘सबैभन्दा बढी चहलपहल कतार शाखामा हुन्थ्यो । कतार शाखाको काम बुधबारदेखि अर्को सूचना जारी नभएसम्मका लागि बन्द गरिएको छ,’ वैदेशिक रोजगार कार्यालयका प्रमुख उमेश बस्नेतले भने ।
नेपाल वैदेशिक रोजगार व्यवसायी संघले खाडी तथा मलेसियामा कामदार पठाउने प्रक्रियामा ‘स्लो डाउन’ सुरु भइसकेको जनाएको छ । ‘पछिल्लो समय सबैभन्दा बढी कामदारको माग कतार र साउदी अरबबाट आएको छ । कतारले बन्द नै गर्यो । साउदीको पनि के हुने अब टुंगो छैन,’ संघका महासचिव सुजितकुमार श्रेष्ठले भने ।
महासचिव श्रेष्ठका अनुसार संयुक्त अरब इमिरेट्स (यूएई) बाट आएका मागपत्रअनुसार कामदार भर्ना प्रक्रियाका लागि तय भएका अन्तर्वार्ताका तालिका धमाधम रद्द भइरहेका छन् । कुवेतले कूटनीतिक कर्मचारीबाहेक सबै देशका नागरिकका लागि सबै प्रकारका भिसा जारी नगर्ने सूचना प्रकाशन गरेको छ । ‘पछिल्लो एक महिनामा म्यानपावर कम्पनीले सबै देशबाट झन्डै ३५ हजार नेपालीले रोजगारी पाउने मागपत्र ल्याएका थिए । त्यसमध्ये आधा पनि जान नपाउने भए,’ श्रेष्ठले भने । उनले व्यवसायीले गन्तव्य मुलुकमा गएर मार्केटिङ गर्ने काम पनि रोकिएको बताए ।
वैदेशिक रोजगार विभागका अनुसार सामान्य अवस्थामा दैनिक झन्डै ११ सय जनाले श्रमस्वीकृति लिन्छन् । पछिल्लो एक सातामा दैनिक झन्डै ३ सय मात्र श्रमस्वीकृतिका लागि आएका छन् । म्यानपावर कम्पनीले भिसा लागेका कामदारलाई अर्को सूचना नभएसम्म काठमाडौं नआउन सूचना दिइरहेका छन् ।
खाडी क्षेत्रमा कोभिड–१९ को संक्रमण देखिने क्रम बढेपछि रोजगारदाता कम्पनीहरूले नयाँ कामदार ल्याउन प्राथमिकता दिएको छैन । कामदार पनि त्यता गइहाल्न इच्छुक छैनन् । ‘मैले एक महिना अगाडि नै अन्तर्वार्ता दिएको थिएँ । भिसा पनि आयो । जानुपर्छ भनेपछि जान तयार भएँ । तर रोकिएको छ,’ दाङका सुरेश वलीले भने, ‘अब सबै स्थिति सामान्य भएपछि जान्छु ।’
बुधबारसम्म नेपाली कामदारको बाहुल्य रहेको दक्षिण कोरियामा ७ हजार ५ सय १३, मलेसिया १ सय १७, बहराइन १ सय १०, यूएईमा ७४, कुवेत ६९, साउदी अरबमा २०, कतारमा १८ र ओमानमा १८ जनालाई कोभिड–१९ को संक्रमण भएको छ । यूएईमा मात्रै दुई जना नेपालीमा भाइरस देखिएको पुष्टि भएको छ ।
![](https://assets-cdn.ekantipur.com/uploads/source/ads/900-x-100-1-0282024055738.gif)