देउवाले एकलौटी गठन गरे १३ विभाग

देउवाले कांग्रेसको विधान, २०१७ (संशोधनसहित) को धारा ३७ (१) (ग) बमोजिम पार्टी केन्द्रीय सदस्यहरुलाई विभागको जिम्मेवारी सुम्पेका हुन् ।

देउवाले पूर्वउपसभापति गोपालमान श्रेष्ठलाई संगठन विभाग, रमेश रिजाललाई संघीय मामिला तथा प्रदेश समन्वय विभाग, फरमूल्लाह मन्सुरलाई मुस्लिम विभाग, अर्जुनप्रसाद जोशीलाई स्थानीय तह समन्वय विभाग संयोजकको जिम्मेवारी दिएका छन् ।

त्यस्तै, आनन्दप्रसाद ढुंगानालाई वित्तिय तथा सहकारी संस्था समन्वय विभाग, अजयकुमार चौरासियालाई तराई मधेस समन्वय विभाग, महेन्द्र यादवलाई यातायात व्यवसायी समन्वय विभाग र शंकर भण्डारीलाई तरुण विभागको जिम्मेवारी दिएका छन् ।

सीता गुरुङलाई आदिवासी जनजाति विभाग, गोविन्द भट्टराईलाई नेपाली जनसम्पर्क समिति समन्वय विभाग, चिनकाजी श्रेष्ठलाई उद्योग व्यापार विभाग र प्रवक्ता विश्वप्रकाश शर्मालाई सूचना, सञ्चार तथा प्रसार विभाग र शिवप्रसाद हुमागाईंलाई श्रमिक तथा ट्रेड युनियन विभागको संयोजकको जिम्मेवारी दिएका छन् ।

यीमध्ये हुमागाईं पार्टीभित्रको सिटौला समूहका हुन् । बाँकी सबै संस्थापन पक्षका हुन् । जनसम्पर्क समन्वय समिति विभागको जिम्मेवारी पाएका भट्टराई केही समयअघि मात्रै पौडेल समूह छोडेर संस्थापनतिर आएका थिए ।

देउवाले शुक्रबार नेता रामचन्द्र पौडेललाई टेलिफोन गर्दै आफू विभाग गठनको तयारीमा रहेकाले विभागमा राख्‍ने नेताहरुको नाम दिन आग्रह गरेका थिए । पौडेलले देउवालाई महाधिवेशनको तयारीमा लाग्‍न सुझाव दिँदै अहिले विभाग गठन गर्न नाम दिन नसक्‍ने बताएका थिए । त्यसअघि बिहीबार साँझ उपसभापति विमलेन्द्र निधि पनि विभागमा राख्‍ने नेताहरुको नाम दिन आग्रह गर्न पौडेल निवास बोहोराटार पुगेका थिए ।

प्रवक्ता विश्वप्रकाश शर्माले नेता पौडेलसँग नाम माग्दा नदिएपछि सभापतिले आफ्‍नो अधिकार प्रयोग गरेर विभाग गठन गरेको जानकारी दिए ।

देउवाले आफू पक्षीय ५ नेतालाई आमन्त्रित केन्द्रीय सदस्य मनोनीतसमेत गरेका छन् । देउवाद्वारा जारी विज्ञप्तिमा केन्द्रीय कार्यसमितिको आमन्त्रित सदस्य कृष्णकिशोर घिमिरे (दाङ), गोपालकुमार बस्नेत (झापा), सुधीरकुमार शिवाकोटी (झापा), मनोहर नारायण श्रेष्ठ (धनकुटा) र र ध्रुव वाग्ले (तनहुँ) लाई मनोनयन गरेको उल्लेख छ । आमन्त्रीत केन्द्रीय सदस्य भएकामध्ये शिवाकोटी र बस्नेत नेता सिटौला पक्षीय हुन् । बाँकी सबै संस्थापन पक्षीय हुन् ।