यूएई बस दुर्घटना : १ को मृत्यु, घाइते १३ नेपाली महिला उपचाररत [अपडेट]

काठमाडौँ — यूएईको आबुधाबीमा भएको मिनी बस दुर्घटनामा घाइते १३ नेपाली महिलाको पहिचान खुलेको छ । आबुधाबीस्थित नेपाली दूतावासका अनुसार शुक्रबार दिउँसोसम्म १ को मृत्यु र १३ घाइतेको नाम र ठेगाना थाह भएको छ । घाइतेमध्ये १६ मध्ये ३ जना क्याम्प फर्किएका छन् ।
![यूएई बस दुर्घटना : १ को मृत्यु, घाइते १३ नेपाली महिला उपचाररत [अपडेट]](https://assets-cdn-api.kantipurdaily.com/thumb.php?src=https://assets-cdn.kantipurdaily.com/uploads/source/news/kantipur/2020/third-party/aabudhabi-1712020091438-1000x0.jpg&w=1000&h=0)
नेपाली दूतावासका प्रवक्ता रीता धितालले मृत्यु भएको ६ मध्ये १ जना मात्रै नेपाली महिलाको सनाखत भएको बताइन् । उनले कान्तिपुरसँग भनिन्, 'हामी अहिले पनि अस्पतालमै छौं, दुर्घटनामा अन्य देशका नागरिकसमेत परेको छ । जसको कारणले कति नेपाली महिलाको मृत्यु भयो भन्ने खुलिसकेको छैन ।' घाइतेमध्ये तीन जना कोमामा छन् ।
दुर्घटनामा झापाकी कृष्णकुमारी अधिकारीको मृत्यु भएको हो ।
दूतावासका अनुसार घाइतेहरुमध्ये पालुङ मकवानपुरकी रिता सिवाकोटी, चापागाउँ ललितपुरकी कमला नेपाली, खुदुनाबारी झापाकी मुना राना, दाङ घोराहीकी आशा घर्ती मगर र ठेगाना नखुलेको सुजला विश्वकर्माको माफ्राक अस्पतालमा उपचार भइरहेको छ ।
एनएमसी अस्पतालमा सिन्धुपाल्चोककी माया तामाङ, सरिता थापा, झापाकी तुलसा थापा, पवित्रा तामाङ र ईलामकी सिता सुब्बाको उपचार भइरहेको छ । हेटौंडाकी मिना थिङ, नुवाकोटकी सरिता तामाङ, धरानकी वर्षा विश्वकर्माको भने अलरहा अस्पतालमा उपचार जारी छ ।
उनीहरु एमबीएम क्लिनिङ कम्पनीमा कार्यरत थिए ।
..................
यूएईको आबुधाबीमा भएको मिनी बस दुर्घटनामा एक जना नेपाली नागरिकको मृत्यु भएको पुष्टि भएको छ । आबुधाबीस्थित नेपाली दूतावासका श्रम काउन्सिलर भेषबहादुर कार्कीका अनुसार दुर्घटनामा झापाकी कृष्णकुमारी अधिकारीको मृत्यु भएको हो ।
दुर्घटनामा पाकिस्तानी चालक तथा एक श्रीलंकाली महिलाको मृत्यु भएको छ । मृतकमध्ये ३ जनाको सनाखत भएको छैन ।
बिहीबार बिहान अधिकांश नेपाली कामदार चढेको मिनिबस आबुधाबीको शेख जायद बिन सुल्तान सडकमा लरीसँग ठोक्किएको थियो । दुर्घटनामा ६ जनाको मृत्यु भएको छ भने १९ जना घाइते भएका छन् । घाइतेमध्ये १६ जना नेपाली नागरिक रहेको दूतावासले जनाएकाे छ ।
घाइतेहरुको माफराक र अन्य अस्पतालहरुमा उपचार भइरहेको दूतावासले जनाएको छ । यूएईका लागि नेपाली राजदूत कृष्णप्रसाद ढकालले अस्पतालमा पुगेर घाइतेहरुलाई भेटेका छन्।
आबुधाबी प्रहरीका अनुसार एउटा कारको हेलचेक्र्याइँका बस दुर्घटनामा परेकाे हो । कामदार चढेको बसले गति कम गर्न नसक्दा अगाडि रहेको लरीसँग ठोक्किएको प्रहरीले सार्वजनिक गरेको भिडियोमा देखिन्छ । लरीले अगाडि गुडिरहेको कार एक्कासि रोकिएपछि गति कम गरेका थिए ।