नेकपाका नेता भन्छन्- तिब्बत कब्जा गर्न नेपालमा एमसीसी

शनिबार काठमाडौंमा आयोजित ‘नेपालको सन्दर्भमा एमसीसीको औचित्य’ विषयमा धारणा राख्दै नेकपा संसदीय दलका प्रमुख सचेतक देव गुरुङले चीनलाई कब्जा गर्ने अमेरिकाको रणनीति अनुरुप नेपालमा एमसीसी परियोजना लागू गर्न लागिएको बताए ।

उनले नेपाल कम्युनिष्ट पार्टी (नेकपा)को स्थायी कमिटी बैठकमा यो विषयले प्रवेश पाएपछि चर्चामा आएको र त्यस पछि नेपाल स्थित अमेरिकी दूतावासले समेत इन्डो प्यासिफिक रणनीति अनुरुपकै परियोजना भएको बताइसकेकाले अहिले फरक अवस्था आएको बताए । उनले फरक परिस्थिति आइसकेकाले पार्टीले विचार गर्ने विश्वास व्यक्त गरे । उनले नेपालमा एमसीसी अन्तर्गत हुने सम्झौता असमान रहेको मात्र नभई नेपालको भूमिमाथि कब्जा गर्ने रणनीति अनुरुप लागू गर्न लागिएको बताए ।

कार्यक्रममा नेता लीलामणि पोखरेलले सामान्य लगानी गर्ने प्रकृया र एमसीसीको प्रकृयाभिन्न रहेको बताए । उनले सम्झौता शर्त नै शर्तको भारी भएको समेत बताए । सम्झौतामा राखिएका प्रावधानहरूले नेपालको संविधानलाई नै तल पारेकोले राष्ट्रिय स्वाधीनतामाथि एमसीसीले घात गर्ने उनले बताए । उनले एमसीसीमा भएका कतिपय कुरा आँखामा नदेखिने तर पछाडिबाट भइराखेको बताए ।

त्यसैले संसदबाट एमसीसी समबन्धमा अनुमोदन नहुँदै कार्यान्वयनमा आइसकेकोले यसको बजेट व्यवस्थापन कसरी भइरहेको छ भन्ने गरेका थिए । उनले एमसीसी इन्डो प्यासिफिक रणनीति अन्तर्गत भएको पुष्टि अमेरिकी निकायहरूले नै गरिसकेकोले यसको कार्यान्वयनमा जान नहुने बताए ।

पछिल्लो समय नेपालस्थित अमेरिकी दूतावासका प्रवक्ताले नै यस क्षेत्रमा जे हुन्छ त्यो अमेरिकाको सैन्य रणनीति (इन्डो प्यासिफिक) अन्तर्गत नै हुन्छ र एमसीसी पनि सोहि अन्तर्गत भएको स्पष्ट पारिसकेको नेताहरूले बताए ।

त्यस्तै अ‍ेमरिकी रक्षा सहायकमन्त्री र विदेश सहायकमन्त्रीले पनि यस विषयमा स्पष्ट पारिसकेकाले एमसीसी इन्डोप्यासिफिक रणनीति अनुरुप नै भएको प्रमाणीत भइसकेकोले नेपालले कार्यान्वयन गर्न नहुने उनीहरूले बताए ।