![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/ekantipur900x100-3082024084948.gif)
काठमाडौँ — ठूलो संख्यामा नेपाली कार्यरत मध्यपूर्वका चार मुलुकका लागि श्रम, रोजगार तथा सामाजिक सुरक्षा मन्त्रालयले श्रम काउन्सिलर र श्रम सहचारी छनोट गरेको छ । छिट्टै उनीहरू नियुक्तिपत्र बुझेर सम्बन्धित मुलुकमा जाने मन्त्रालयले जनाएको छ ।
![](https://assets-cdn.ekantipur.com/uploads/source/ads/comp-900x100-1672024010950.gif)
साउदी अरेबियाको श्रम काउन्सिलरमा उपसचिव जीवनकुमार राई, संयुक्त अरब इमिरेट्स (यूएई) का लागि निर्मला थापा, बहराइनका लागि श्रम सहचारीमा शाखा अधिकृत दामोदर दाहाल र कतारका लागि अनुज गौतम छनोट भएका छन् । श्रम काउन्सिलर र सहचारीले आफू खटिएको मुलुकमा गएर नेपाली कामदार समस्यामा पर्दा उद्धार तथा सहजीकरणको भूमिका निर्वाह गर्नेछन् । काउन्सिलर (श्रम) तथा श्रम सहचारी छनोट तथा नियुक्तिसम्बन्धी कार्यविधि तथा मापदण्ड–२०७३ मा भएको व्यवस्थाबमोजिम उनीहरूलाई छनोट गरिएको हो ।
मापदण्डअनुसार श्रम मन्त्रालय, वैदेशिक रोजगार विभाग, श्रम विभाग, वैदेशिक रोजगार बोर्ड, सामाजिक सुरक्षा कोष तथा व्यावसायिक तथा सीप विकास तालिम केन्द्र र मातहतका कार्यालयमा कार्यरत उपसचिव र अधिकृतमा मात्र काउन्सिलर र सहचारी छनोट प्रक्रियामा सहभागी हुन पाउने व्यवस्था छ ।
![](https://assets-cdn.ekantipur.com/uploads/source/ads/900-x-100-1-0282024055738.gif)