![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/ekantipur900x100-3082024084948.gif)
काठमाडौँ — वैदेशिक रोजगार विभागले कामदारसँग रकम असुलिरहेको लाइफ इन्टरनेशनल ओभरसिजका जनसर्म्पक अधिकृत दानबहादुर सोमैलाई पक्राउ गरेको छ ।
![](https://assets-cdn.ekantipur.com/uploads/source/ads/comp-900x100-1672024010950.gif)
लाइफले मलेसियाको अविवा प्लास्टिक उद्योगमा जाने कामदारसँग रकम उठाइरहेको अवस्थामा विभागले सोमैलाई पक्राउ परेको हो । उनले गुल्मी रेसुंगाका अनिल विक, सन्दीप विक र दीपक बहादुर सुनार र बराह–सुनसरीका सन्तोष विष्टसँग ४ लाख ५० रुपैयाँ लिइरहेको अवस्थामा विभागको टोलीले फेला परेको थियो ।
कामदारले एकलाख भित्रै पठाउन निकै अनुनय विनय गरेका थिए । ‘मलेसिया जानु भनेको अमेरिका जानु सरह हो । १ लाख ३५ हजार भन्दा एक पैसा कम हुन्न’ भन्दै उनले पैसा लिइरहेको विभागका महानिर्देशक भीष्मकुमार भुसालले बताए । मलेसिया जाने कामदारले म्यानपावरलाई लागत शुल्क बुझाउनु पर्दैन ।
उक्त कम्पनीमा ५० जना कामदारको माग भएकोमा यी सहित ३६ जनाले श्रम स्वीकृति लिइसकेका छन् । ‘श्रम स्वीकृति निकाल्ने म्यानपावर वीन रिक्रुटमेन्ट हो । पैसा उठाउने काम लाइफ इन्टरनेशनलबाट भयो,’ भुसालले भने,‘दुवै म्यानपावर कारबाहीको भागिदार हुनेछन् ।’
![](https://assets-cdn.ekantipur.com/uploads/source/ads/900-x-100-1-0282024055738.gif)