जागिरबाट निकालिएपछि आत्महत्या

अपमान गरिएको भन्दै मजदूर आन्दोलित
भरत जर्घामगर

सिरहा — गोलबजार– ९ स्थित मारुती सिमेन्ट उद्योग व्यवस्थापन पक्षले रोजगारीबाट हटाएको सूचना जारी गरेको केही घण्टामै एक महिला श्रमिकले आत्महत्या गरेकी छन् । गोविन्दपुरकी अनितादेवी पासवान मंगलबार बिहान उद्योग नजिकै झुन्डिएको अवस्थामा फेला परेकी हुन् ।

ZenTravel

१५ वर्षदेखि स्थायी श्रमिकका रुपमा कार्यरत उनले आत्महत्या गरेपछि मजदूरहरुले प्रदर्शन गरेका छन्। पासवानलाई अपमान जनक ढंगले कामबाट निकालेर आत्महत्या गर्न बाध्य पारेको भन्दै आफन्त, मजदूरले क्षतिपूर्तिको माग गर्दै उद्योग घेराउ गर्नुका साथै पूर्वपश्चिम राजमार्गमा चक्काजाम गरे। प्रहरीले दुई घण्टापछि राजमार्ग खुलाएको थियो।

Meroghar

उद्योग व्यवस्थापनले सोमबार अवकास दिएको सूचना टाँसेको थियो। नियमित कामका लागि मंगलबार बिहान ७ बजे उद्योग पुगेकी पासवान अवकासको सूचना पाएपछि त्यहाँबाट फर्किएकी थिइन्। उनी उद्योग नजिकैं रुखमा ११ बजेतिर झुण्डिएको अवस्थामा फेला परेको उद्योगका प्रशासकीय अधिकृत एवं सुरक्षा संयोजक मोहन शर्माले जानकारी दिए। पासवान दैनिक बिहान ८ देखि ४ बजेसम्म उद्योगमा काम गर्थिन्।

मजदूरहरुले सेवा सुविधाको विषयलाई लिएर माग गरी केही दिनदेखि उद्योगमा अवरोध गर्दै आएका थिए। अवरोधमा संलग्न अनितालाई उद्योग प्रशासनले मंसिर ६ र १३ गते दुई पटक स्पष्टीकरण सोधेको थियो। प्रशासकीय अधिकृत शर्माका अनुसार स्पष्टीकरणको चित्तबुझ्दो जवाफ नदिएको भन्दै सोमबार उनलाई सेवाबाट अवकाश दिएको थियो। उनी उद्योगको अखिल नेपाल औद्योगिक मञ्चकी सदस्य थिइन्।

सबै मजदुर काममा गएका बेला अनितालाई अपमानजनक ढंगले महिला प्रहरी लगाएर उद्योगबाट निकालेकाले हतोत्साहित भएर आत्महत्या गर्न पुगेको दाबी मजदुरहरुको छ। मजदुरहरुले उद्योग व्यवस्थापनसँग उचित क्षतिपूर्तिको माग गरेका छन।

आफूहरुले खाईपाई आएको तलब कात्तिक महिना देखि घटाएर आएको विषयमा व्यवस्थापनसँग छलफलको लागि माग गर्दा आफूहरुमाथि अनावश्यक आरोप लगाउँदै व्यवस्थापन पक्ष एकपक्षीय ढंगले कार्वाहीमा उत्रिएको मजदूर पक्षको आरोप छ।
उद्योग व्यवस्थापनले अनितासँगै मधेसी कारखाना मजदुर मञ्चका अध्यक्ष समेत रहेका विनोदकुमार महतो, सभ्यकुमार यादव, मोहनकुमार यादव र मिथिलेशकुमार यादवलाई पनि एक महिनाका लागि निलम्बन गरेको उनीहरुले जानकारी दिए।

उद्योगका मजदूरहरुले चिया, मिठा (सख्खर) वापत प्रत्येक दिन ५० रुपैयाँका दरले पाउँदै आएको सुविधा व्यवस्थापनले पछिल्लो कात्तिकबाट दिन छोडेको आरोप लगाएका छन्। यस विषयमा छलफल गर्न माग गरेकै कारण मृतक पासवानलाई रोजगारीबाट हटाएको मजदूरहरुको आरोप छ।

घटनापछि उद्योग व्यवस्थापनले मजदूरहरुलाई वार्ताका लागि बुधबार बिहान बोलाएको मधेसी कारखाना मजदुर मञ्चका अध्यक्ष विनोदकुमार महतोले जानकारी दिए।

प्रकाशित : मंसिर २४, २०७६ २१:४१
ADVERTISEMENT
प्रतिक्रिया
पठाउनुहोस्
ADVERTISEMENT

आयोगको म्याद थप

कान्तिपुर संवाददाता

काठमाडौँ — सरकारले सरकारी र सार्वजनिक जग्गा अतिक्रमणबारे जाँचबुझ गर्न गठित आयोगको म्याद ६ महिना थपेको छ ।

सोमबार बसेको मन्त्रिपरिषद् बैठकले मंसिर १५ गते नै म्याद सकिएको आयोगको म्याद थप्ने निर्णय गरेको हो । अब आयोगले आगामी जेठ १५ भित्र प्रतिवेदन बुझाउनेछ ।

पूर्वन्यायाधीश मोहनरमण भट्टराईको संयोजकत्वमा गठित आयोगले सिंहदरबारमा सचिवालय स्थापना गरी काम गरिरहेको छ ।

प्रकाशित : मंसिर २४, २०७६ २१:३८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×