बुङमतीले लठ्यायो विदेशी मेयरलाई

सहरहरुको सञ्जाल सिटी नेटको कार्यसमिति बैठकमा सहभागी हुन विभिन्न देशका १४ नगरप्रमुखसहित ८८ जना विदेशी ललितपुरमा जम्मा भएका छन् 
प्रशान्त माली

(ललितपुर) — बुङमती मत्स्येन्द्रबहालको उत्तरपट्टिको ‘धोकासी फल्चा’ (पाटी) मा अखण्ड भजन खलकको भजनकीर्तन चलिरहेको थियो । विदेशी पाहुनाहरूलाई एक महिलाले टीका र फूल लगाएर स्वागत गरिन् । निकै प्रसन्न मुद्रामा ती विदेशीले भजन नियालिरहे । कतिपयले दक्षिणा चढाएर सम्मान व्यक्त गरे, कतिपय तस्बिर लिन थाले ।

बुङमती सहकालका देवता रातो मत्स्येन्द्रनाथ रहेको गाउँ हो । नेपाल भाषामा यसलाई ‘बुगं दे’ भनिन्छ ।

चक्रपथबाट करिब ८ किमि दक्षिणमा पर्ने गाउँको मुख्य आकर्षण रातो मत्स्येन्द्रनाथ, कुमारी, हस्तकला, चित्रकला र विभिन्न जातका नेवारहरूको बसोबास थलो हो । यही थलोमा विभिन्न देशका मेयरहरू बिहीबार पुगेका थिए ।
परम्पराअनुसार बुङमतीका जीवित देवी कुमारी रातो मत्स्येन्द्रनाथको जात्रामा मात्र बाहिर ल्याइन्छ । तर, सिटीनेटका प्रतिनिधिहरू आउने भएपछि मत्स्येन्द्रबहालको उत्तरपट्टिको ‘धोकासी फल्चा’ (पाटी) को सिंहासनमा राखिएको थियो । सिटीनेट एसिया प्रशान्त क्षेत्रका विभिन्न नगरपालिका र अन्य सरोकारवाला आबद्ध संस्था हो ।

चोहेल ननीः बुङमतीको सबभन्दा ठूलो चोकमध्ये एक हो । ननीःकी ५० वर्षीय कृष्णमाया माली पाहुनालाई बुङमतीको कला देखाउन हाकुपटासी र गुन्युचोलोमा सजिएकी थिइन् । उनले मोबाइल झुन्ड्याएर चार्ज गर्दा राख्ने खोयाको सामान, कलम राख्ने, साँचो झुन्ड्याउने, मुरा, ढकी (एक किसिमको सामान राख्ने भाँडो), मरे चरा (एक किसिमका चारा) को गुँडलगायतका सामान प्रदर्शनीमा राखेकी थिइन् ।

सिटीनेटका महासचिव जगन्नाथन त्यहाँ पुग्दा उनी कलम राख्ने भाँडो बुन्दै थिइन् । छक्क परेर महासचिवले मुसुक्क हाँसेर प्रतिक्रिया दिए । मालीसँग सेल्फी खिच्न ती विदेशी एकाएक झुम्मिए । विदेशीले एक सय रुपैयाँ पर्ने मोबाइल चार्ज गर्दा राख्ने भाँडो, बास्केट र पाँच सय रुपैयाँ पर्ने चराको गुँड खरिद गरे ।

बुङमतीवासीले मान्ने देवतामध्ये हेयगृव भैरव पनि एक हो । आँग छेँ (मनकामना मन्दिर) प्राङगणमा बुङमतीका चित्रकार सुर्जमुनि शाक्यले पौवा चित्रमार्फत भैरवको महत्व देखाउन कोसिस गरिरहेका थिए । प्रदर्शनीमा मनकामना, योगिनी, तारा, बुद्ध, बसुन्धरा गरेर १० देवीदेवताका चित्र थिए । बुङमती जावलाखेलबाट पश्चिमपट्टिको गल्लीमा प्रवेश गरेपछि गणेश मन्दिर भेटिन्छ । त्यहाँ परम्परागत वेशभूषामा सजिएकी पाँच युवतीले धिमे नाच देखाए । नजिकै भिपु माला (एक प्रकारको माला) मा सजिएकी युवतीहरूले काठको झ्यालमा बुट्टा भर्दै गरेको दृश्य देखेर पाहुनाहरू मोहित बने ।

त्यसछि उनीहरूलाई मत्स्येन्द्रबहाल लगिएको थियो । गल्लीमा उनीहरूले काष्ठकला अवलोकन गरे । त्यहाँ कल्पवृक्षमा विराजमान आकर्षक बुद्ध मूर्ति, विभिन्न ध्यानमुद्रामा बसेर बुद्ध, परालबाट बनाइएका जुट्टा, हात्ती, फ्रेम, माना, बज्र, चैत्य आर्कषक थिए ।

भूकम्पले ध्वस्त बनेको रातो मत्स्येन्द्रनाथ मन्दिर पुनर्निर्माण भइनसकेकाले देवतालाई टहरामा राखिएको छ । पुजारीले विधिवत पूजा गर्दा पाहुनाहरू अनौठो मानेर हेरिरहेका थिए । उनीहरूलाई परम्परागत टोपी र रातो पोसाकमा सजिएका रातो मत्स्येन्द्रनाथका पुजारीहरूले टीका र फूलमाला लगाएर ‘ढोका पिनी’ टोलमा स्वागत गरेका थिए । त्यहाँबाट चोहेल ननी–कोटा टोल–बाँ छेँ–बाथः–लाछी–मत्स्येन्द्रबहाल–बहिली (प्रथमपुर महाविहार) हुँदै कार्यविनायकसम्म पुर्‍याइएको थियो । दुई जना बालिका ‘वेलकम टु अल दी डिस्टिङगुस्ट गेस्ट फ्रम सिटीनेट मेम्बर सिटिज्’ लेखेको ब्यानरमा बोकेर अग्रपंक्तिमा थिए । उनीहरू खाल्टु दाफा भजन खलबाट सहभागी भएका हुन् ।

लगत्तै बाँसुरी खलले धिमे बाजाले उनीहरूलाई स्वागत गरेको थियो । दे नामक पुखु पनि चिटिक्क देखिन्थ्यो । यो क्षेत्रमा महिलाहरूले नेवारी परम्पराअनुसार रक्सी पारिरहेको दृश्यसमेत देखाइएको थियो । लाछी टोलमा एकजना पुरुषले बारा बनाएर बिक्री गरिरहेका थिए । गल्लीका पाटीहरूमा परम्परागत भजन गाइरहेका टोली थिए । लाछी टोलको पाटीमा भने महिलाहरू भजन गाउन व्यस्त देखिन्थे ।

भ्रमणमा ललितपुर महानगरपालिकाका मेयर चिरीबाबु महर्जन र ललितपुर महानगरपालिका २२ का वडाध्यक्ष अम्बिरराज शाक्यलगायत उपस्थित थिए । सहरहरूको सञ्जाल सिटीनेटको ३८औं कार्यसमितिको तीनदिने बैठकमा सहभागी हुन विभिन्न देशका १४ नगरप्रमुखसहित ८८ विदेशी ललितपुरमा जम्मा भएका छन् ।

शुक्रबारसम्म चल्नेबैठकमा नेपालका विभिन्न स्थानीय तहका ४३ प्रतिनिधिसमेत सहभागी छन् । बैठकमा सहभागी हुन आएका विदेशीलाई बुधबार ललितपुर महानगरले पाटन ढोकाबाट पिम्बाहल पोखरी हुँदै पाटन दरबारसम्म नगरको सम्पदा अवलोकन गराएको थियो ।

सिटी नेटमा आबद्ध सदस्य नगरहरूबीच सिप, प्रविधि, शिक्षालगायतका क्षेत्रमा आपसी साझेदारी गर्न बैठकले सहयोग पुर्‍याउने आयोजक ललितपुर महानगरपालिकाका मेयर महर्जनले बताए ।


प्रकाशित : कार्तिक २२, २०७६ ०८:५८
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

एक पदमा १९ उम्मेदवारी

भक्तपुरमा हुने उपनिर्वाचनमा राजनीतिक दलका ११ र स्वतन्त्रबाट १० जना गरी २१ जनाले उम्मेदवारी दिएका छन् । तीमध्ये दुई जनाको उम्मेदवारी बदर भएको छ ।
कान्तिपुर संवाददाता

(भक्तपुर) — मंसिर १४ मा हुने उपनिर्वाचनमा भक्तपुर क्षेत्र नम्बर १ प्रदेशसभा १ (क) मा २१ जनाको उम्मेदवारी परेको छ । मुख्य निर्वाचनको कार्यालय भक्तपुरमा बिहीबार राजनीतिक दलका ११ र स्वतन्त्रबाट १० जना गरी २१ जनाले उम्मेदवारी दिएका हुन् । यसमध्ये दुई जनाको उम्मेदवारी बदर भएको जिल्ला निर्वाचन कार्यालय भक्तपुरले जनाएको छ ।


प्रतिनिधिसभा निर्वाचन–२०७४ मा समानुपातिक प्रणालीअन्तर्गत निर्वाचित हुने अन्तिम सूचीमा नाम भएका आमूल परिवर्तन पार्टीका डिल्लीप्रसाद चौंलागाईं र राप्रपा संयुक्त पार्टीका रामशरण लामिछानेको उम्मेवारी बदर गरिएको निर्वाचन कार्यालय भक्तपुरका सूचना अधिकारी भीम बिसीले बताए ।

तत्कालीन एमालेबाट निर्वाचित हरिशरण लामिछानेको हृदयघातबाट निधन भएपछि उपनिर्वाचन हुन लागेको हो । उपनिर्वाचनमा सत्तारुढ नेपाल कम्युनिस्ट पार्टी (नेकपा) बाट देवीप्रसाद ढकाल (डीपी) ले उम्मेदवारी दर्ता गराएका छन् । २०७४ को निर्वाचनमा माओवादी केन्द्रबाट उनले उम्मेदवारी दिएका थिए । कांग्रेसबाट कृष्ण भँडेलले उम्मेदवारी दिएका छन् ।

नेपाल मजदुर किसान पार्टीले निरज लवजुलाई उम्मेदवार बनाएको छ । लवजु पनि ०७४ को प्रदेशसभाका उम्मेदवार बनेका थिए । राप्रपाबाट श्यामप्रसाद नेपाल, समाजवादी पार्टीबाट सुदर्शन मुनंकर्मी, नेकपा मालेबाट सुदर्शन लामिछाने, साझा पार्टीबाट सुरज प्रधान, संघीय लोकतान्त्रिक राष्ट्रिय मञ्चबाट मिङमार लामा, नेपाली कांग्रेसबीपीबाट मधुसूदन न्यौपानेको उम्मेदवारी दिएका छन् ।

स्वतन्त्रबाट कृष्णप्रसाद ह्योंगो, जीवन नेपाली, कृष्णराम पोटामाहा, अर्जुन कोजु, उत्तम साखकर्मी, राकेश सुवाल, सुमना कार्की, जीवनचन्द्र अधिकारी, संगीता पौडेल आचार्य, सुजता देउजाले उम्मेदवारी दिएका छन् । उम्मेदवारी दर्ता लागि मुख्य दलका कार्यकर्ताहरू नेवारी बाजागाजा, जुलुससहित मुख्य निर्वाचन कार्यालय पुगेका थिए ।

०७४ मंसिर २१ को निर्वाचनमा तत्कालीन एमालेबाट निर्वाचित लामिछानेले १२ हजार ७ सय ८९ मत प्राप्त गरेका थिए । उनका निकटतम प्रतिद्वन्द्वी कांग्रेसका जीवन खत्रीले ९ हजार ९ सय ७७, नेमकिपाका निरज लवजुले ७ हजार ११ मत ल्याएका थिए । तत्कालीन नेकपा माओवादी केन्द्रका उम्मेदवार देवीप्रसाद ढकालले उम्मेवादी फिर्ता लिँदा पनि ७ सय ८४ मत पाएका थिए । ढकालले उम्मेदवारी फिर्ता लिएर लामिछानेलाई समर्थन गर्दा पनि ७ सय मत पाएका हुन् ।

यो प्रदेशमा चाँगुनारायण नगरपालिकाको ९ वटै वडा र भक्तपुर नगरपालिकाको १० नम्बर वडा पर्छ । यस क्षेत्रका ४५ हजार १५ मतदाताले प्रदेशसभा उपनिर्वाचनमा मतदान गर्नेछन् । उपनिर्वाचनका लागि २२ मतदान स्थलमा ५४ मतदान केन्द्र तोकेको जनाएको छ ।

प्रकाशित : कार्तिक २२, २०७६ ०८:४७
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT