देउवाद्वारा आलमको बचाउ- समाचार - कान्तिपुर समाचार

देउवाद्वारा आलमको बचाउ

कान्तिपुर संवाददाता

काठमाडौँ — कांग्रेस सभापति शेरबहादुर देउवाले १२ वर्षअघिको हत्या आरोपमा पक्राउ परेका पार्टीका सांसद मोहम्मद अफताब आलमको बचाउ गरेका छन् । पुरानो मुद्दा ब्युँताएर आलमलाई पक्राउ गरिएको भन्दै देउवा सरकारविरुद्ध आक्रामक बनेका हुन् ।

फाइल तस्बिर ।

‘१२ वर्षअघिको घटना ल्याएर अहिले पक्राउ गर्न पाइन्छ ?’ कांग्रेसको नीति तथा प्रशिक्षण प्रतिष्ठानले भक्तपुरमा आयोजना गरेको प्रशिक्षण कार्यक्रममा देउवाले भने, ‘त्यतिबेला के हेरेर बसेको ?’


कांग्रेसबाट निर्वाचित स्थानीय तहका अध्यक्ष तथा उपाध्यक्षका लागि आयोजना गरिएको दुईदिने प्रशिक्षणमा देउवाले राम्रो काम गरेर देखाउन जनप्रतिनिधिहरूलाई निर्देशन दिए । ‘कम्युनिस्ट र कांग्रेस फरक छन् भन्ने कुरा जनताको मन जितेरै देखाउनुपर्छ,’ स्थानीय तहका जनप्रतिनिधिलाई निर्देशन दिँदै देउवाले भने, ‘आगामी निर्वाचनमा पार्टीले जित्ने गरी काम गरेर देखाउनुहोस् ।’


शनिबारसम्म चल्ने प्रशिक्षण कार्यक्रममा वरिष्ठ नेता रामचन्द्र पौडेलले लोकतन्त्रको उपलब्धिलाई कमजोर बनाएर सरकारले हस्तक्षेप बढाएको बताए ।


पूर्वमहामन्त्री कृष्णप्रसाद सिटौलाले समेत आलमको घटनालाई कांग्रेसविरुद्धको षड्यन्त्रका रूपमा लिए । सञ्चारमाध्यमसमेत कांग्रेसीविरुद्ध लागिपरेको उनको आरोप थियो । ‘पत्रपत्रिकालगायत सञ्चारमाध्यमसमेत कांग्रेसविरुद्ध लागेका छन्, आलमविरुद्ध आएको समाचार यसको नमुना हो,’ सिटौलाले भने ।

प्रकाशित : कार्तिक १, २०७६ २१:२३
प्रतिक्रिया
पठाउनुहोस्

कार्तिक १० देखि हिमालयको बेइजिङ उडान

कान्तिपुर संवाददाता

काठमाडौँ — हिमालय एयरलाइन्सले लक्ष्मी पूजाको दिन (कार्तिक १० गते) देखि काठमाडौंबाट चीनको राजधानी बेइजिङ उडान गर्ने भएको छ ।

हिमालय एयरलाइन्सको ब्रान्ड तथा सर्भिस प्रमुख उज्वला दलीले पहिलो उडान कार्तिक १० गते हुने पक्कापक्की भएको बताइन् । चिनियाँ राष्ट्रपति सी चिनफिङले आफ्ना नागरिकहरूलाई नेपाल भम्रणमा उत्प्रेरित गर्ने अभिव्यक्ति दिएपछि नेपालमा चिनियाँ पर्यटक भित्र्याउने व्यवसायीलगायत सरोकारवालासँग पर्यटन बोर्डले बिहीबार गरेको अन्तर्क्रियामा हिमालय एयरलाइन्सले उडानको मिति घोषणा गरेको हो ।

संस्कृति, पर्यटन तथा नागरिक उड्डयनमन्त्री योगेश भट्टराईलगायत उपस्थित कार्यक्रममा बोल्दै दलीले काठमाडौं–बेइजिङ सिधा उडान हिमालय एयरलाइन्सको न्यारोबडी जहाज एयरबस ३२० बाट हुन लागेको बताइन् ।

उनका अनुसार हिमालयले सातामा तीन दिन बेइजिङ उडान गर्ने छ । हिमालयले चीनको गुइयाङ, छाङसा र नानछाङमा सातामा एक/एकवटा उडान गर्ने भएको छ । हालसम्म नेपालको राजधानी काठमाडौं र चीनको राजधानी बेइजिङमा सिधा उडान भएका थिएनन् ।

हिमालयले दुई मुलुकका राजधानी जोड्ने सिधा उडान पहिलोपटक हुन लागेको जनाएको छ । हाल हङकङ तथा चीनका चारवटा सहर ल्हासा, छेन्दु, ग्वाङजाव, कुनमिङबाट काठमाडौंका लागि सातवटा एयरलाइन्सले उडान गर्दै आएका छन् । हिमालयले बेइजिङ उडान थालेपछि नेपाल र चीनबीच आठवटा एयरलाइन्सले ६ वटा स्थान जोड्नेछन् । हिमालय एयरलाइन्स नेपाली र चिनियाँ व्यवसायीहरूको संयुक्त लगानीमा स्थापित एयरलाइन्स हो ।

प्रकाशित : कार्तिक १, २०७६ २१:२०
पूरा पढ्नुहोस्
प्रतिक्रिया
पठाउनुहोस्
×