ऊर्जामन्त्रीले राजदूतलाई सोधे, 'चिनियाँ कम्पनीले नेपालमा किन काम ढिला गर्छन् ?

कान्तिपुर संवाददाता

काठमाडौँ — चिनियाँ राजदूत होउ यान्छीसँगको भेटमा ऊर्जामन्त्री वर्षमान पुनले चिनियाँ कम्पनीले काममा ढिलाई गरेको भन्दै समन्वयको लागि पहल गर्न आग्रह गरेका छन् । ऊर्जा मन्त्रालयमा मंगलबार भएको भेटमा मन्त्री पुनले अरु देशमा काम गर्ने चिनियाँ कम्पनीले नेपालमा काम नगर्नुको कारण राजदूतसँग जिज्ञासा राखेका थिए ।

‘चिनियाँ कम्पनीले अन्य देशमा राम्रो काम गरिरहेका छन् । यहाँ किन गर्न सकिरहेका छैनन् । समस्या के हो जसका कारण काममा ढिलाइ भइरहेको छ ?,’ राजदूतसँग मन्त्री पुनले राखेको जिज्ञासा उद्धृत गर्दै मन्त्री पुनको सचिवालयले जारी गरेको विज्ञप्तिमा भनिएको छ, ‘हाम्रो कारणले काममा ढिलाई भएको हो भने संयन्त्र सुधार्छौं ।’

जवाफमा राजदूत यान्छीले चिनियाँ कम्पनीको काममा भएको समस्याबारे अध्ययन गरिरहेको बताइन् । चिनियाँ कम्पनीले निर्माण गरिरहेको त्रिशूली थ्री ए र कुलेखानी तेस्रो आयोजना सम्पन्न हुने तरखरमा रहेको भए पनि चिनियाँ कम्पनीले काममा ढिलाइ गरिरहेका छन् । त्रिशूली थ्रीको पहिलो ३० यूनिटबाट उत्पादन थालिए पनि दोस्रो यूनिटको काम भने सुस्त छ ।

मन्त्री पुनले राजदूत यान्छीसँग यी आयोजनाको काम सम्पन्न गर्नको लागि चिनियाँ कम्पनीसँग समन्वय गरिदिन आग्रह गरेको मन्त्री पुनको सचिवालयद्वारा जारी विज्ञप्तिमा छ । मन्त्री पुनले दूधकोसी जलविद्युत् आयोजनामा लगानी जुटाउन सहयोगको लागि पनि राजदूसँग आग्रह गरे ।

दूधकोसी जलविद्युत् आयोजनामा विश्व बैंकले ५ सय मिलियन डलर लगानी गर्ने भन्दै उनले अपुग हुने २ खर्ब जुटाउन सहयोग मागेका हुन् । नेपालको कम्तीमा २४ वटा जलविद्युत् आयोजनामा १४ वटा चिनियाँ कम्पनीले काम गरिरहेका छन् ।

चिनियाँ कम्पनीले निर्माण गरिरहेका परियोजनामा प्रवेशाज्ञा, प्राकृतिक प्रकोप र जग्गाको अधिग्रहण लगायतका समस्या रहेको चिनियाँ राजदूतको भनाइ थियो ।

प्रकाशित : असार १०, २०७६ १७:५९
प्रतिक्रिया
पठाउनुहोस्
ADVERTISEMENT

अस्ट्रेलियाद्वारा युद्धग्रस्त क्षेत्रबाट ८ बालबालिकाको उद्धार

कान्तिपुर संवाददाता

अस्ट्रेलिया — अस्ट्रेलियाले युद्धग्रस्त क्षेत्र सिरियाको शरणार्थी शिविरमा रहेका ८ बालबालिकाहरुलाई उद्धार गरेको छ । उद्धार हुने बालबालिकाहरु आतंकवादी संगठन इस्लामिक स्टेटका लडाकुका छोराछोरीहरु हुन् ।

अस्ट्रेलियाका प्रधानमन्त्री स्कट मरिसनलेबाबुआमा इस्लामिक स्टेटमा आबद्ध भएपछि सिरिया पुगेका अस्ट्रेलियाली बालबालिकाहरुलाई उद्धार गरिएको पुष्टि गरेका छन्। उनले आफ्ना अभिभावकहरुको अपराधको सजाय बालबालिकाहरुले भोग्न नहुने बताएका छन्।

उनले उद्धारमा संलग्न सबैलाई धन्यवादसमेत दिएका छन्। उनले उद्धार गरिएका बालबालिकाहरुको सहयोग र सामाजिक सहायताका लागि अस्ट्रेलिया सरकारका सम्बन्धित निकायहरुले विचार गर्ने समेत बताएका छन्। उद्धार गरिएका बालबालिकाहरु २ वर्षदेखि १८ वर्षसम्मका रहेका सञ्चारमाध्यमहरुले जनाएका छन्।

इस्लामिक स्टेटको कथित जेहादी युद्धमा सहभागी हुन केही अस्ट्रेलियालीले समेत देश छोडेका थिए। जसका कारण उनीहरुको परिवारहरु समेत प्रभावित थिए।

तर, पछिल्लो समयमा इस्लामिक स्टेटले हार ब्योहोरेपछि शरणार्थी शिविरमा रहेका आफ्ना नागरिकहरुलाई फिर्ता लैजानुपर्ने मानव अधिकारको क्षेत्रमा काम गरिरहेका विभिन्न संघसंस्थाहरुले आग्रह गर्दै आएका छन्। अस्ट्रेलिया सरकारले सामाजिक क्षेत्रमा काम गर्दै आएका संस्थाहरुको सहकार्यमा उनीहरुलाई उद्धार गरेको सञ्चारमाध्यमहरुले जनाएका छन्।

सञ्चारमाध्यमहरुले मानव अधिकारको क्षेत्रमा काम गर्ने संस्था सेभ द चिल्ड्रेनलाई उद्धृत गर्दै अहिले पनि सिरियाको उत्तरपूर्वी शरणार्थी शिविर क्षेत्रमा ३ हजार ५ सय बढी विदेशी बालबालिकाहरु रहेको जनाएका छन्।

त्यसमा पनि करिब १ सयको कुपोषणका कारण मृत्यु भएको छ। अहिले पनि कम्तीमा ५० जना इस्लामिक स्टेटसँग आबद्ध भएका बालबालिका तथा महिलाहरु सिरियाका शरणार्थी शिविरमा छन्।

सिरियामा दशकसम्म चलेको कथित जेहादी युद्धमा हजारौंले ज्यान गुमाइसकेका छन्। हजारौंको संख्यामा सिरियाका विभिन्न शरणार्थी शिविरमा रहेका छन्। उक्त क्षेत्रमा रहेका आफ्ना नागरिकहरुलाई सम्बन्धित देशले फिर्ता लैजानुपर्ने आवाज मानवअधिकारवादी संस्थाहरुले उठाइरहे पनि सुरक्षाको कारण देखाउँदै फिर्ता लैजाने क्रममा ढिलाई भइरहेको सञ्चारमाध्यमहरुले उल्लेख गरेका छन्।

प्रकाशित : असार १०, २०७६ १७:३८
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT