पत्रकार भण्डारी र भट्ट पक्राउ

कान्तिपुर संवाददाता

कञ्चनपुर — महेन्द्रनगरबाट प्रकाशित हुने ‘मानसखण्ड दैनिक’ का सम्पादक खेम भण्डारी र कार्यकारी सम्पादक जी भट्टलाई प्रहरीले शनिबार दिउँसो पक्राउ गरेको छ ।

स्थानीय महेन्द्रनगर बजारमा होटल व्यवसाय सञ्चालन गर्ने २ युवतीलाई प्रहरीले पक्राउ गरेको विषयमा उक्त दैनिकमा गत साता  समाचार प्रकाशित भएको थियो । उक्त समाचारले छोरीको चरित्र हत्या र बेइज्जत भएको भन्दै शुक्लाफाँटा नगरपालिका–५ गर्जमनिका खेमराज नाथले प्रहरीमा सार्वजनिक अपराधको मुद्दा दिएपछि पत्रकारद्वय भण्डारी र भट्ट पक्राउ परेका हुन् । प्रहरीले सार्वजनिक मुद्दा दर्ता भएपछि अनुसन्धानका लागि पक्राउ गरिएको जनायो । 

समाचार लेखेकै आधारमा प्रहरीले पत्रकार पक्राउ गरेको भन्दै सञ्चार सम्बद्ध संघ–संगठनहरूले विरोध गरेका छन् । पत्रकार महासंघ कञ्चनपुरका अध्यक्ष विष्णु अवस्थीले शनिबार एक विज्ञप्ति जारी गर्दै समाचारको विषयमा आपत्ति भए प्रेस काउन्सिलमा गएर कानुनी उपचार खोज्ने बाटो सुरक्षित हुँदाहँुदै प्रहरीले क्षेत्राधिकार नाघेर षडयन्त्रपूर्ण ढंगले पत्रकारहरूलाई फसाउन खोजेको आरोप लगाए ।

पत्रकार महासंघका केन्द्रीय महासचिव उजिर मगरले पनि विज्ञप्ति जारी गर्दै प्रहरीले स्वतन्त्र प्रेसमाथि हस्तक्षेप गर्न खोजेको भन्दै पक्राउ परेका पत्रकारको तत्काल रिहाइको माग गरेका छन् । पत्रकारहरूका विभिन्न पेसागत संघसंगठनहरूले समेत पक्राउप्रति विरोध जनाउँदै रिहाइको माग गरेका छन् । न्यूनतम पारिश्रमिक निर्धारण समितिका निवर्तमान अध्यक्ष समेत रहेका भण्डारी महेन्द्रनगरबाट प्रसारण हुने महाकाली एफएमका प्रबन्ध निर्देशकसमेत हुन् । 

प्रकाशित : असार ३, २०७४ २०:३५
प्रतिक्रिया
पठाउनुहोस्
ADVERTISEMENT

मुखर्जीद्वारा ३० अपराधीको माफी अस्वीकार

सिन्हवा

नयाँदिल्ली — भारतका राष्ट्रपति प्रणव मुखर्जीले आफ्नो पाँचवर्षे कार्यकालमा मृत्युदण्डको सजाय सुनाइसकिएका ३० अपराधीलाई माफी दिन अस्विकार गरेका छन् । उनको कार्यकाल आउँदो महिना सकिँदै छ ।

पछिल्लो पटक मे महिनाको अन्तिम साता मुखर्जीले दुई जनालाई माफी दिन अस्विकार गरेका थिए । उनले माफी दिन अस्विकार गरेकामध्ये एकजना चार वर्षीया बालिकालाई बलात्कार घटनाका अभियुक्त पनि थिए । इन्डोरको मध्य सहरमा भएको उक्त घटनामा उनीसँगै अरू तीन जना पनि संलग्न थिए । 

त्यसैगरी, माफी नपाउने अर्का व्यक्ति भने सन् २००७ मा पश्चिमी सहर पुनेमा मानव हत्यामा संलग्न व्यक्ति हुन् । यी दुई घटनामध्ये पहिलो घटनामा संलग्न तीन जना र दोस्रो घटनामा संलग्न दुई जनालाई अदालतले मृत्युदण्डको सजाय सुनाइसकेको छ । राष्ट्रपतिले उनीहरुको आममाफीको अपिल नसुनेपछि अब उनीहरुलाई झुन्डयाएर फाँसीको सजाय दिइनेछ । 

राष्ट्रपति मुखर्जीले मुम्बईमा सन् २००८ मा भएको नरसंहारमा संलग्न अजमाल अमीर कसाबको आममाफीको अपिल पनि अस्विकार गरेका थिए । उनका पूर्ववर्ती प्रतिभा पाटिलले दोषी ठहर भएका ३४ जनालाई माफी दिएकी थिइन् । 

प्रकाशित : असार ३, २०७४ २०:२७
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT