काठमाडौं — काठमाडौंको कीर्तिपुर नगरपालिका–१ ट्याङ्लाफाँटमा मंगलबार बिहान भएको आगलागीमा ज्यान गुमाउनेको परिचय खुलेको छ । जिल्ला प्रहरी परिसर, काठमाडौंका एसपी पवन भट्टराईका अनुसार ज्यान गुमाउने काठमाडौं–२६ स्थायी घर भइ हाल ग्रिनउड भिलामा बस्दै आएका ७० वर्षीय सुरेशचन्द्र श्रेष्ठ हुन् ।

‘परिवारसँग हामीले सम्पर्क गरिसकेका छौं, वृद्धकी श्रीमती भावविह्वल अवस्थामा हुनुहुन्छ, धेरै सोधपुछ गर्न पाएका छैनौं,’ उनले कान्तिपुरसँग भने ।शवलाई पोष्टमार्टमका लागि प्रहरीले त्रिवि शिक्षण अस्पताल, महाराजगञ्ज पठाएको छ ।हालसम्म आगलागीको कारण खुलेको छैन ।

प्रहरीले घटनास्थल आसपास रहेको सीसी क्यामराको फुटेज समेत हेरेको छ । त्यसक्रममा आगोलागी रहेको देख्ने स्थानीयले कारको ढोका खोल्दा उनले निस्किने प्रयास गरेको नदेखिने अनुसन्धानमा खटिएका अधिकृतहरु बताउँछन् । 

‘उहाँ ड्राइभिङ सिटमा सिटमा बसिरहेका बेला आगो लागेको देखिन्छ,’ ती अधिकृतले भने, ‘आगो लागेको देख्ने बित्तिकै अरु मानिस गएर ढोका खोलेको देखिन्छ ।’