काठमाडौँ — आमसञ्चारमाध्यमले सामाजिक उत्तरदायित्वको रुपमा समावेशी मुद्दालाई प्राथमिकता दिनुपर्नेमा सरोकारवालाले जोड दिएका छन् ।

एकता फाउन्डेशनले बिहीबार काठमाडौंमा आयोजना गरेको  ‘समावेशी पत्रकारिता : सीप, क्षमता र सहकार्य’ विषयक अन्तरक्रियामा सहभागी अधिकारकर्मी र सञ्चारकर्मीले समावेशी पत्रकारिताको आवश्यकता औंल्याएका हुन् । 

कार्यक्रममा नेपाल पत्रकार महासंघकी उपाध्यक्ष नितु पण्डितले समावेशी पत्रकारितामा भौतिक उपस्थिति मात्रै नभई समानताका पक्षमा प्राथमिकता दिने सम्पादकीय दृष्टिसमेत आवश्यक रहेको बताइन् । उनले पछिल्लो समय पत्रकारिताको सामाजिक उत्तरदायित्व नै कमजोर हुँदै गएको भन्दै सिमान्तकृत दलित, महिला, जनजाति, लैंगिक अल्पसंख्यकलगायतका समुदायको आवाज नै आमसञ्चार हुनुपर्ने धारणा राखिन् । ‘मिडिया समाज रुपान्तरणको आधार हो,’ उपाध्यक्ष पण्डितले भनिन्, ‘आवाजविहीनको आवाज बन्नुपर्छ, त्यो मिडियाको कर्तव्य हो ।’