काठमाडौँ — भद्रकालीस्थित नेपाली सेनाको मुख्यालयमा बिहीबार बेलुकी १० बजेतिर एक्कासी ठूलो विस्फोटको आवाज आयो । नजिकै रहेको जिल्ला प्रहरी परिसर, काठमाडौंको टोली चनाखो भयो । सैनिक अधिकारीहरूले पनि आसपासमा बुझ्न थाले ।

जिल्ला प्रहरी परिसर, काठमाडौंका एसपी पवनकुमार भट्टराईका अनुसार केही समयपछि थाहा भयो, खासमा सैनिक हेडक्वार्टर छेउमा विवाहमा गएको एउटा टोलीले पटाका पड्काएको रहेछ ।

‘धेरै पटक आवाज आएपछि खोजी गरेका थियौं । त्यसक्रममा बेहुलाले पटाका पड्काएको भन्ने थाहा भएको छ,’ उनले कान्तिपुरसँग भने, ‘थप सोधपुछ गर्न भोलि कार्यालयमा बोलाएका छौं।’