काठमाडौँ — काठमाडौं महानगरपालिकाले ‘मानवीयताको सहर’ का रूपमा विकास गर्ने संकल्प अघि सारेको छ ।

आइतबार २०८३/०८४ को नीति तथा कार्यक्रम सार्वजनिक नगरसभाको १९ औँ अधिवेशनमा कार्यवाहक प्रमुख सुनिता डंगोलले यस्तो संकल्प सार्वजनिक गरिन् । नीति तथा कार्यक्रमले कंक्रिटको सडकभन्दा माथि उठेर सामाजिक न्याय, नागरिक संवेदना र पर्यावरणमैत्री कल्याणकारी अभ्यासलाई अभूतपूर्व प्राथमिकता दिएको छ ।

महानगरले आगामी वर्षको बजेट तथा कार्यक्रममा ‘मानवीयताको सहरः काठमाडौं’ भन्ने मार्गनिर्देशक सन्देशलाई कार्यान्वयन गर्न थुप्रै प्रयोगात्मक र सिर्जनात्मक योजनाहरू समावेश गरेको छ । यस अन्तर्गत महानगरवासी र यहाँ आश्रय लिने सम्पूर्ण प्राणीहरूको हितलाई रक्षा गर्ने प्रतिवद्धता जनाइएको छ । 

‘ज्येष्ठ तथा अशक्त नागरिकसँग महानगर अभियान’अन्तर्गत अब महानगर क्षेत्रभित्र बस्ने वृद्धवृद्धा र अशक्त नागरिकहरूले उपचारका लागि अस्पताल धाउनुपर्ने वा लाइन बस्नुपर्ने झन्झट अन्त्य हुने उनले बताइन् । ७५ वर्ष उमेर पूरा गरेका वरिष्ठ ज्येष्ठ नागरिक र पूर्ण अपाङ्गता भएका अशक्त नगरवासीहरूलाई पोषक आहारको सुरक्षाका लागि नियमित पोषण भत्ता उपलब्ध गराइनेछ । 

काठमाडौंका सडकहरूलाई मानवीयताको प्रतिबिम्ब बनाउन योजना अघि सारिएको छ । सहयोगापेक्षी, घरबारविहीन र सडक आश्रित नागरिकहरूको उद्धार, तथा व्यवस्थापनका लागि साझेदार संस्था र गैरसरकारी निकायसँग संयुक्त समन्वय गरी काठमाडौंलाई ‘सडक आश्रित मानवमुक्त शहर’ घोषणा गरिने नीतिमा उल्लेख छ ।

कार्यवाहक प्रमुख डंगोलले महानगरको मानवीयता केवल मानिसमा मात्र संकुचित नभएको बरु यसले पशुपंक्षी र प्रकृतिको सहअस्तित्वलाई समेत हार्दिकताका साथ समेटेको बताइन् । चराचुरुंगी संकटमा पर्दै गएको सहरी पर्यावरणलाई महसुस गर्दै महानगरभित्रका सम्पूर्ण टोल, विद्यालय, समुदाय र पार्कहरूमा पंक्षीमैत्री अभ्यास सञ्चालन गरिने उनको भनाइ छ । यसका लागि चराचुरुंगीलाई स्वच्छ पानी उपलब्ध गराउन हजारौंको सङ्ख्यामा ‘पानी पात्र’ स्थापना गरिने महानगरको घोषणा छ । सडकका कुकुर र बाँदरको नियन्त्रण गर्दा निर्दयी विधि प्रयोग नगरी पशु कल्याणका सिद्धान्तअनुसार मानवीय र वैज्ञानिक उपाय मात्रै अवलम्वन गरिने महानगरको स्पष्ट पारेको छ  ।