ललितपुर — ललितपुर महानगरपालिकाले जावलाखेलस्थित रातो मत्स्येन्द्रनाथ संग्रहालयका लागि ऐतिहासिक सामग्री संकलन सुरु गरेको छ । स्थानीय जनजीवन र संस्कृतिसँग सम्बन्ध राख्दै आएको रातो मत्स्येन्द्रनाथसँग सम्बन्धित वस्तु, तस्बिर तथा अभिलेख संग्रहालयमा राख्ने तयारी छ ।

ललितपुर महानगरपालिका–४ का अध्यक्ष सन्तोष खड्काका अनुसार संग्रहालयमा राख्न गुठी संस्थान तथा रातो मत्स्येन्द्रनाथसँग सम्बन्धित विभिन्न संघसंस्थालाई पत्राचार गरिएको छ । 'केही तस्बिर संकलन भइसकेका छन् भने अन्य सामग्री संकलनको प्रक्रियामा छन्,' उनले भने । यस अभियानमार्फत ऐतिहासिक, साँस्कृतिक तथा धार्मिक महत्वका सामग्री सुरक्षित रूपमा संरक्षण गर्ने लक्ष्य छ ।

वर्षा र सहकालका देवताका रूपमा पूजिने रातो मच्छिन्द्रनाथको रथयात्रा ललितपुरको प्रमुख सांस्कृतिक पर्वमध्ये एक हो । प्रत्येक वर्ष आयोजना हुने यो जात्रा उपत्यकाकै सबैभन्दा लामो र ऐतिहासिक रथयात्रा मानिन्छ । यही विशिष्ट परम्परा र ऐतिहासिक पृष्ठभूमिलाई व्यवस्थित रूपमा संरक्षण तथा प्रदर्शन गर्न संग्रहालय निर्माण गरिएको हो ।