काठमाडौं — अख्तियार दुरुपयोग अनुसन्धान आयोगले खाद्य प्रविधि तथा गुण नियन्त्रण विभाग बबरमहल, अनुगमन तथा निरीक्षण शाखा काठमाडौंमा कार्यरत प्राविधिक सहायक सन्जय चौधरीलाई सेवाग्राहीबाट लिएको घुस रकमसहित पक्राउ गरेको छ ।

अख्तियार कार्यालय टंगालबाट खटिएको टोलीले उनलाई सेवाग्राहीबाट लिएको ३० हजार रुपैयाँसहित नियन्त्रणमा लिएको हो । अन्तियारका प्रवक्ता सुरेश न्यौपानेद्वारा जारी विज्ञप्तिमा भनिएको छ, 'उद्योग नवीकरण गर्ने प्रयोजनार्थ सेवाग्राहीसँग घुस/रिसवत माग गरी दु:ख हैरानी दिएको भन्ने सूचना एवं उजुरी निवेदनका आधारमा अख्तियार दुरुपयोग अनुसन्धान आयोग, टंगालबाट खटिई गएको टोलीले चौधरीलाई सेवाग्राहीसँग ३० हजार घुस/रिसवत लिइसकेको अवस्थामा उक्त रकम र मोबाइल थान-२ सहित खाद्य प्रविधि तथा गुण नियन्त्रण विभागको परिसरबाट मिति २०८२।१२।१६ गते नियन्त्रणमा लिई थप अनुसन्धान भइरहेको छ ।'