काठमाडौँ — सामाजिक सञ्जालमार्फत नाबालिकाको चरित्रहत्या गरेको आरोपमा प्रहरीले एक युवकलाई पक्राउ गरेको छ । काभ्रे नमोबुद्ध नगरपालिका–८, दारीमबोट घर भई हाल काठमाडौं बस्ने २२ वर्षीय अशोक लामालाई प्रहरीले पक्राउ गरेको हो ।

टेलिग्राममा पीडितको अन्तरंग तस्विर तथा भिडियो राखेको उजुरीको आधारमा साइबर ब्युरोबाट खटिएको प्रहरीले उनलाई आइतबार पक्राउ गरेको हो ।  

प्रहरीका अनुसार लामाविरुद्ध विद्युतीय (इलेक्ट्रोनिक) कारोबार ऐन, २०६३ अन्तर्गतको कसुरमा जिल्ला अदालत काठमाडौंबाट पाँच दिन म्याद थप अनुमति लिएरअनुसन्धान भइरहेको ब्युरोका प्रवक्ता एवं सूचना अधिकारी दीपकराज अवस्थीले जानकारी दिए ।