काठमाडौँ — नेपाल प्रहरीको  साइबर ब्युरोले विभिन्न सरकारी तथा गैरसरकारी कार्यालयहरूको सूचना प्रणालीमा अनधिकृत पहुँच पुर्‍याएको आरोपमा दुई जनालाई पक्राउ गरेको छ।

पक्राउ पर्नेमा झापा मेचीनगरका २० वर्षीय सन्तोष चिमरिया र दमकका १९ वर्षीय विकास पौडेल रहेका छन्। उनीहरूलाई जिल्ला प्रहरी कार्यालय झापा र सिन्धुपाल्चोकको सहयोगमा पक्राउ गरिएको साइबर ब्युरोले जनाएको छ । ब्युरोमा नेपाल मेडिकल काउन्सिल, निर्वाचन आयोग र राष्ट्रिय परिचयपत्र तथा पञ्जीकरण विभागबाट उजुरी परेको थियो ।

साइबर ब्युरोका अनुसार पछिल्ला केही महिनादेखि वेबसाइट ह्याकिङ तथा डेटा चोरीका घटनामा संलग्न भई सीएमडी नेपाल र नेपाली फर नेपाल नाम प्रयोग गरी सामाजिक सञ्जालमार्फत दाबी र प्रचार गरिएको थियो। प्रारम्भिक प्राविधिक विश्लेषण र अनुसन्धानका क्रममा उनीहरूको संलग्नता खुलेपछि विद्युतीय कारोबार ऐन, २०६३ अन्तर्गत अनुसन्धान अगाडि बढाइएको हो।

अनुसन्धानका क्रममा उनीहरूको कब्जाबाट ल्यापटप, मोबाइल फोन, हार्ड ड्राइभलगायत विद्युतीय उपकरणहरू बरामद गरिएको प्रहरीले जनाएको छ।