काठमाडौँ — भदौ २४ गतेको प्रदर्शनका क्रममा प्रहरी वृत्त बानेश्वरको भवन तोडफोड, आगजनी, हातहतियार लुटपाट तथा सुरक्षामा खटिएका प्रहरी कर्मचारीलाई दुर्व्यवहारको घटनामा संलग्न एक युवालाई प्रहरीले पक्राउ गरेको छ ।

जिल्ला प्रहरी परिसर काठमाडौंका सूचना अधिकारी प्रहरी उपरीक्षक पवनकुमार भट्टराईका अनुसार सिराहा नगरपालिका वडा नम्बर ४ का २२ वर्षीय सेख सिद्धिकी पक्राउ परेका हुन् । उनी हाल काठमाडौं–३१ आलोकनगर बस्दै आएका थिए । प्रहरीले उनको कोठा खानतलासी गर्दा ग्यास गनको २ वटा सेलसमेत बरामद गरेको थियो । 

आपराधिक उपद्रव गर्न नहुने र हातहतियार तथा खरखजानासम्बन्धी कसूरमा जिल्ला अदालत काठमाडौंको अनुमति लिएर उनीविरुद्ध प्रहरीले थप अनुसन्धान गरिरहेको छ । सूचना अधिकारी भट्टराईका अनुसार उक्त दिन प्रदर्शनको नाममा तोडफोड, आगजनी, हातहतियार लुटपाट तथा सुरक्षामा खटिएका प्रहरी कर्मचारीलाई दुर्व्यवहार गर्नेहरु माथि  खोजी तीव्र पारिएको छ ।