बसको ठक्करबाट संखुवासभाका ६८ वर्षीय जशबहादुर मगरको मृत्यु भएको हो।
काठमाडौँ — काठमाडौँको वनस्थली चोकमा आज बिहानै बसको ठक्करबाट पैदलयात्रीको मृत्यु भएको छ।
काठमाडौं महानगरपालिका–१६ बनस्थली चोकमा बिहान करिब साढे ५ बजेको समयमा बसको ठक्करबाट ६८ वर्षीय जश बहादुर मगरको मृत्यु भएको हो।
संखुवासभाका उनी हाल बालाजु बनस्थलीमा बस्दै आएका थिए । उनलाई रिंगरोड चल्ने माहानगर यातायातको बाग्मती प्रदेश ०१–००६ ख ७५४३ नम्बरको बसले ठक्कर दिएको जिल्ला प्रहरी परिसर काठमाडौंका प्रवक्ता प्रहरी उपरिक्षक अपिल राज बोहराले जानकारी दिए ।
मगरको दुर्घटना स्थलमै मृत्यु भएपछि स्थानीयवासी करिब ७०–८० जना भेला भई चालकको खोजी र मृतकको शव तत्काल नहटाउन माग गरेका थिए। बस र शवलाई हटाउन रोक लगाइएको घटनास्थलमा प्रहरी नायब उपरीक्षक ज्ञान बहादुर बिष्टको कमाण्डमा करिब ३५ जना सुरक्षाकर्मी परिचालन गरिएको छ। अहिले पनि शव सडकमानै छ ।
प्रहरीका अनुसार ठक्कर दिने बस चालक फरार छन् र उनको खोजतलास तथा घटनाबारे थप अनुसन्धान जारी छ।
