काठमाडौँ — काठमाडौँ उपत्यकामा बढ्दो आपराधिक गतिविधि नियन्त्रण गर्ने उद्देश्यले काठमाडौं प्रहरीले गरेका चार फरक अपरेसनमा १३ जना पक्राउ परेका छन् । मोटरसाइकल चोरी गर्ने समूहदेखि श्रोत नखुलेको करोडौं नगद–गहना, अवैध हतियार र बीमा ठगीसम्मका गतिविधिमा संलग्नलाई प्रहरीले पक्राउ गरेको हो।

जिल्ला प्रहरी परिसर काठमाडौंका प्रवक्ता एसपी अपिलराज बोहराका अनुसार मंगलबार वृत्त कालिमाटीबाट खटिएको टोलीले धादिङ घर भएका ६ जनालाई नियन्त्रणमा लिएको थियो ।

सीसीटीभी फुटेज मार्फत उनीहरु सहित चोरीका ३ मोटरसाइकल, ६ मोबाइल फोन, ५ हेल्मेट र लक फोड्ने उपकरण बरामद गरिएको थियो । त्यही दिन  काठमाडौं महानगरपालिका–२६, गोंगबुमा रहेको विनोदकुमार श्रेष्ठको घरबाट प्रहरीले ४ करोड २५ लाख ५० हजार रुपैयाँसहित ९.५ केजी सुन र ३.२ केजी चाँदी बरामद गरेको थियो ।

प्रहरीले उनका छोरा राजकुमार श्रेष्ठले भाडामा लिएको नयाँबजारको घरमा पनि छापा मारेर थप नगद र गहनाहरु बरामद गरेको थियो । काठमाडौं प्रहरीले नक्कली दुर्घटना खडा गरी बीमा रकम असुल गर्ने समूहसमेत पक्राउ गरिएको छ। नक्कली घाइते देखाउने, अस्पतालका फर्जी कागजात प्रयोग गर्ने कार्यमा संलग्न भएको भन्दै ६ जनालाई पनि नियन्त्रणमा लिइएको एसपी बोहराले जानकारी दिए । 

प्रहरीले ठमेलको एक होटलबाट सिरक भित्र लुकाइएको पेस्तोलसहित २१ वर्षीय कर्मसाङ्पो ठकुरी समेत पक्राउ गरेको थियो । उनले पेस्तोलको तस्बिर र भिडियो सार्वजनिक गरेको सूचनापछि निगरानी बढाएको प्रहरीले उनलाई प्रक्राउ गरेको थियो । 

काठमाडौं प्रहरीका प्रमुख एसएसपी विश्व अधिकारी साँघुरा गल्ली र शंकास्पद स्थानहरूमा निगरानी बढाएर अपराध नियन्त्रण र अनुसन्धानलाई अझ सशक्त बनाइएको बताउछन् ।