काठमाडौँ — काठमाडौं महानगरपालिका–६ चेमजुङ गल्लीमा बिहीबार दिउँसो भएको आगलागीमा एक अपांगता भएकी महिलाको ज्यान गएको छ ।
जिल्ला प्रहरी परिसर काठमाडौंका सूचना अधिकारी प्रहरी उपरीक्षक अपिलराज बोहराका अनुसार हरिप्रसाद गौतमको साढे तीन तले घरको भुइँतलामा बस्दै आएकी ६५ वर्षीया उर्मिला तामाङको कोठामा दिउँसो ४ बजेतिर आगलागी हुँदा उनको मृत्यु भएको हो ।
काभ्रे चौरीदेउराली–३ स्थायी घर भएकी तामाङ कोठामा सुतिरहेको अवस्थामा आगलागी भएको थियो । उनको समयमै उद्धार हुन नसकी जलेर मृत्यु भएको सूचना अधिकारी बोहराले बताए । उर्मिला बायाँ खुट्टा नभएकी महिला थिइन् । उक्त कोठामा तामाङ र उनका छोरा बस्दै आएका थिए । उनका छोरा आफन्तकहाँ गएको अवस्थामा आगलागी भएको जानकारी प्रहरीले दिएको छ ।
स्थानीयवासी र प्रहरीको सहयोगमा आगो नियन्त्रणमा आइसकेको बौद्ध प्रहरी वृत्तबाट प्रहरी निरीक्षक जयशंकर रिमालले जानकारी दिए ।
आगलागीबाट कोठाभित्र रहेका झ्याल, ढोका, लत्ता कपडा लगायतका सामग्री पूर्ण रूपमा जलेर नष्ट भएका छन् । आगलागीको कारणबारे प्रहरीले अनुसन्धान गरिरहेको छ ।
