भरतपुर — काठमाडौं महानगरपालिका–२४, मखनटोलस्थित महादेव चोकमा बुधबार बिहान दयाराम श्रेष्ठको चारतले घरमा आगलागी हुँदा एक वृद्धको मृत्यु भयो । चारतले माटो र काठले बनेको कच्ची घरको तेस्रो तल्लामा ग्यास चुहिएर आगलागी हुँदा चौथो तलामा रहेकी ८० वर्षीया विष्णुमाया अधिकारीको मृत्यु भएको हो । सँगै तीन जना घाइतेका थिए । 

आगलागी भएको श्रेष्ठको घरसँगैको रुकेश श्रेष्ठको पाँचतले घरमा पनि आगो सल्कँदा माथिल्लो तला पूर्णरुपमा क्षति पुग्यो । त्यसको भोलिपल्ट बिहीबार काठमाडौँको चन्द्रागिरि नगरपालिका–११, सतुंगलमा रहेको दुई तले व्यावसायिक भवनमा आगलागी भयो । २०७२ सालको भूकम्पले पुरानो घर भत्किएपछि राजकुमार सिंह महर्जन र उनकी पत्नी गुनुमाया महर्जनले व्यावसायिक उद्देश्यले सोही ठाउँमा आरआर कम्प्लेक्स नाम दिइएर जस्तापाता र फलामको डन्डीबाट दुई तले घर बनाएका थिए । 

प्रहरी परिसर काठमाडौँका प्रहरी प्रवक्ता एसपी अपिलराज बोहराले कम्प्लेक्सको भुइँतलामा रहेको कल्पना बुटिकबाट विद्युत् सर्ट भएर आगलागी भएको हुनसक्ने बताए । उनका अनुसार कम्प्लेक्ससँगै रहेको कल्पना महर्जनको दुई तले घरमा समेत आगो सल्किएको थियो । जसबाट ज्ञानमतिदेवी गुप्ताको मिठाई पसलसमेत जलेको थियो । दुवै घटनाको क्षतिको विवरण संकलनको काम प्रहरीले गरिरहेको छ ।

जिल्ला प्रहरी परिसर काठमाडौँका प्रमुखमा एसएसपी विश्व अधिकारीका अनुसार काठमाडौँमा बिजुली सर्ट भएर, ग्यास चुहिएर, ट्रान्सफर्मर वा बिजुलीको पोलमा आगलागीको घटना धेरै हुने गरेको छ । प्रहरी तथ्यांकअनुसार उपत्यकामा मात्र वैशाख महिनामा मात्र ३२ वटा आगलागीका घटना भएका छन् । आगलागीबाट १ जनाको मृत्यु र १० जना घाइते भएका छन् । आगलागीबाट ५ घरमा क्षति पुगेको छ । यही समयमा देशभरि ६१५ आगलागीका घटना भएका थिए । १० जनाको मृत्यु भएको थियो भने ६९ जना घाइते भएका थिए । आगलागीबाट पशुचौपाया, गोठ, विद्यालय, सरकारी कार्यालयमा पनि क्षति पुगेको प्रहरीको विवरणमा उल्लेख छ ।