योजना आयोगका पूर्व उपाध्यक्ष डा. विश्व पौडेलले नेपालको कानुन उद्योगमैत्री भएपनि कार्यान्वयन पक्ष कमजोर भएको भन्दै समग्र देशलाई नै माथि उठाउने किसिमको सशक्त योजनाको खाँचो औंल्याए ।

नेपाल उद्योग वाणिज्य महासंघका केन्द्रीय सदस्य मनोज पौडेलले आर्थिक सुशासन र सार्वजनिक निकायप्रति आम मानिसको विश्वास नभएसम्म सफल हुन नसकिने बताए । प्रत्येक गाउँ र पालिकामा गएर उद्यमशीलता प्रबर्द्धन गर्न आवश्यक रहेको उनको भनाइ थियो ।

नेपाल उद्योग वाणिज्य महासंघका पूर्व केन्द्रीय सदस्य रञ्जित आचार्यले स्टार्टअपका लागि कर्जा प्रवाह गरेर मात्रै राज्यको दायित्त्व नसकिने भन्दै यस क्षेत्रमा हात समातेर नै डोहोर्याउन आवश्यक रहेको बताए ।

कार्यक्रममा उद्योग मन्त्रालय अन्तर्गतको औद्योगिक विकास प्रतिष्ठानका इन्जिनियर उमेश गुप्ताले सरकारले उपलब्ध गराउने स्टार्टअप कर्जाबारे जानकारी दिएका थिए ।

उद्यमशील कांग्रेसका अध्यक्ष अश्विन सिटौलाले उद्यमशिलताको मुद्दामा सरोकारवालाबीच प्रभावकारी छलफलमार्फत साझा धारणा बनाउने उद्देश्यले छलफलको आयोजना गरिएको बताए ।

उद्यमशील कांग्रेसका महासचिव मोहन गजुरेलले उद्यमशीलताका मुद्दाहरुलाई निरन्तर रुपमा उठान गरिरहने र आगामी दिनमा सरोकारवाला पक्षसँग छलफल जारी राख्ने बताए ।

कार्यक्रममा नवउद्यम क्षेत्रका विज्ञ कविराज जोशी, ट्याक्स एड्भोकेट प्रतिष्ठा भण्डारी, आकाश सुवेदी, लगायतले धारणा राखेका थिए । कार्यक्रममा उद्यमशीलता क्षेत्रमा कार्यरत जेनजी पुस्तादेखि नीति निर्मातासम्मको उपस्थिति थियो ।