काठमाडौँ — गृहमन्त्री रमेश लेखकले अपराधका नयाँ आयामहरु थपिएको भन्दै नयाँ तरिकाले अपराध अनुसन्धानको दायरा विस्तार गर्न प्रहरीलाई निर्देशन दिएका छन् । आइतबार काठमाडौंमा नेपाल प्रहरी स्टाफ कोर्सको उद्‌घाटन कार्यक्रमलाई सम्बोधन गर्दै गृहमन्त्री लेखकले अपराध अनुसन्धानको दायरा विस्तार गर्न निर्देशन दिएका हुन् ।

उनले नेपाल प्रहरीले अहिले गरिरहेको अपराध अनुसन्धानले मात्रै नपुग्ने भन्दै अझै अनुसन्धानको दायरालाई फराकिलो बनाएर शान्ति सुरक्षा कायम गर्नुपर्ने बताए । 

२५/३० वर्ष पहिलाकोभन्दा अहिले धेरै राम्रो भए पनि पछिल्ला समयमा आएका अपराधका नयाँ आयाम अनुसार नै प्रहरीले पनि अनुसन्धानलाई नयाँ ढंगले अघि बढाउनु आवश्यक रहेको उनको भनाइ थियो । 

अनुसन्धानमा नयाँ प्रविधिको माध्यमबाट पहुँच बढाउन प्रहरीलाई गृहमन्त्री लेखकको निर्देशन थियो । उनले भने, ‘आजभन्दा २५/३० वर्ष पहिला म वकालत पनि गर्दथेँ । वकालतका क्रममा मैले अपराधिक मुद्दाहरुमा पनि धेरैमा aहस पैरवी गरेको छु । त्यो बेलाको अनुसन्धान र आजको अनुसन्धानमा मैले धेरै फरक पाएको छु । राम्रो भएको छ । त्यो बेलामा प्रहरीको अनुसन्धानमा धेरै ल्याप्सेसहरु हुने, अनुसन्धानमा मात्रै होइन, प्रसिक्युसनमा पनि तमाम ल्याप्सेसहरु हुने अनि कहिले कहिँ के हुने भने डिफेन्स लयर्सका लागि त्यो अनुसन्धान त प्याराडाइज अफ लयर्स हो नि । अनुमान र आशंकाको आधारमा गरिने अनुमानजन्य विषयहरु घटेका छन् । प्रमाणिकता, वैज्ञानिकता, प्रमाणको ठोस मूल्यांकनका  कुराहरुमा परिवर्तन भएको मैले देखेको छु । कमी कमजोरी हुन्छन्, त्यसलाई सच्याउँदै ठीक गर्दै जाने हो । तर अझ राम्रो गर्नुछ, यत्तिले पुगेन । यत्तिले पुगेको छैन । किनभने नयाँनयाँ कुराहरु आइरहेका छन् । नयाँ विषयहरु प्रवेश गरिरहेका छन् । शान्ति सुरक्षा, अपराध नियन्त्रण, अपराधको अनुसन्धान गरेर अगाडि बढ्ने सवाल वा प्रहरी ल इम्प्लिमेन्टेसनको महत्त्वपूर्ण एजेन्सी भएको कारणले कानुन प्रचलनको सवाल होस्, नयाँ चुनौति, जोखिम र विषयले होस्, तदनुकुल तयार गर्नुछ आफूलाई ।’